Bastia : Una casa per addunisce l'attori di a lingua corsa

Corse ⦁ ViaStella
Haute-Corse
Bastia
A cità di Bastia dispone oramai d’una "Casa di e lingue", a prima di Corsica. A struttura hà per scopu di prumove a lingua corsa in tutti i duminii di a vita culturale, suciale è ecunomica.
 
Tout savoir sur : La Fête des Lumières 2022 à Lyon
 
Ghjè in l’anzianu cunventu  Sant’Anghjuli chì a « Casa di e lingue » apre e so porte. Sti locali anu da accoglie parechje strutture chì volenu travaglià à prò di a lingua corsa in parechji duminii.
Nant’à piazza, ci seranu sempre quattru operatorii sedentarii. A casa hà da agrottà u serviziu lingua corsa di a cità di Bastia, a Canopé, l’associu Praticalingua è a fundazione di u Patrimoniu. Ci sò dinù sale mutualizate per accoglie associ o gruppi per fà cullocchii o residenze.
Per Lisandru De Zerbi, aggiuntu à a merria di Bastia in carica di a lingua corsa, sta struttura hè un veru puntellu "Pensu chì oghje Bastia arreca à a Corsica un arnese ineditu in Auropa, ghjè u più grossu investiscimentu dopu à l’università à prò di a lingua"
Un spaziu di travagliu in cumunu 
Per a Canopé, u fattu di pudè travaglià in u spaziu cumunu hè una vera ricchezza. Tutti i so arnesi pedagogichi, libri è videò sò avà prisenti in stu locu à u serviziu di a lingua corsa "U fattu d’esse in una casa di e lingue piglia tuttu u so sensu. Tuttu hè quì per pasce l’insegnamentu di u corsu è ghjè à prò di l’insegnanti, di i zitelli è di a sucetà. U scopu hè di fà sapè chì i libri sò dinù dispunibili è gratisi per tutte e scole"  dice Sonia Moretti incaricata di i prugetti Canopé.
L'astru scopu hè dinù di fà sbuccià una scola internaziunale di e lingue. "L'emu da custruisce, avà avemu l'ecchipamentu. Tutte e sale anu screni numerichi, di tuttu ciò chì ci vole, di risorza umana è pedagogica per chì sta scola vedissi u ghjornu abbastanza prestu" lampa Lisandru De Zerbi. Ùn arnese chì secondu à l'aggiuntu di a merria di Bastia permetterebbi d'apresi à u mondu.
A municipalità di Bastia hà spesu 500 000 euri per a creazione di a "Casa di e lingue".
lingua corsa