A CORSICA È A SO LITERATURA
   

   U 10 di decembre ci hè statu un scontru à l'Università di Corsica cù i laureati di l’ultimi dui premii literarii corsi. Si vulia di sicuru salutà l’autori, ma ancu di più parlà di libri, di scrittura, d’edizione è di lettura… Pare ch’ella vachi cù i so pedi, ma cum’è spessu spessu o forse ... cum’è sempre, si hè parlatu assai di lingua. Hè più chè ghjusta, ci dicerete, è ùn averete mancu tortu chì cum’ellu dicia unu, senza a lingua ùn si scrive è in un certu modu un scrittore hè dinù unu chì senza a lingua si ne stà à... penna in manu losciu losciu. Ma senterete in un dibattitu di sta sequenza videò cum’ella hè scumbattuta una volta di più a quistione di a lingua. Riteneremu chì e pusizione sò cuntrastate è chì ognunu dice a soia, ma dinù chì quelli chì scumbattenu si rispettanu è si stanu à sente. Fussi ella puru sempre cusì!
    U fattu si stà chì si hè pussutu fà una spechjata d’issa parte di una bella pruduzzione 2013. Si spera di pudè urganizà altri scontri è in particulare cù i laureati di u “Premiu di u Libru Corsu” è quelli di u “Prix des Lecteurs de Corse”.
Isse iniziative custì è quelle di i librarii, editori, associi, bibbiuteche è caffè literarii sò propiu custitutive di ciò ch’omu chjama “literatura”. Un libru senza lettura nè cumenti nè parè critichi sarà sempre un libru? Un libru annunziatu, premiatu, ma micca lettu, micca stimatu, micca criticatu sarà propiu un libru compiu? È ùn si parla di i libri stampati, premiati è... ch’ùn si trovanu inlocu!
Pè u scontru presentatu quì eranu stati invitati:
Premiu Don Ghjiseppu Morellini
• Stefanu Cesari : U minimu gestu/Le moindre geste (Ed.Colonna) 
• Michel-Edouard Nigaglioni : Encyclopédie des peintres actifs en Corse (Ed.Piazzola)
• Ghjuvan Petru Ristori : Posu è pensu (Ed.sammarcelli
• Sampiero Sanguinetti: La violence en Corse (Ed.Albiana)
Premiu di u Libru di a CTC.
• Marie Ferranti : Marguerite et les grenouilles (Ed.Gallimard)
• Jean-Guy Talamoni : Littérature et politique en Corse (Ed.Albiana)
• Rosa Alice Branco : Anthologie de la poésie corse en portugais (Ed.Albiana-CCU)
• Ghjacumu Thiers : I Misgi (Ed.Albiana)
À presentà li è interrugà li (Stefanu Cesari è Michel-Edouard Nigaglioni ùn eranu pussuti esse presenti in Corti) era u Prufessore Pasquale Ottavi, Deganu di a Facultà Lettere Lingue è Arte di l’Università di Corsica Pasquale Paoli, anch’ellu scrittore in prosa è puesia. Hà purtatu a parolla in modu à fà spiccà u cumunu d’issi scrittori cusì diversi. I temi accustati sò stati parechji: u statutu di u scrittore, a divisione generica, a sparghjera, l’istituzione literaria, l’imaginariu literariu corsu è, di sicuru l’estru literariu è e lingue (corsu è francese). Un scontru fruttiferu chì si turnerà à urganizà da pudè cunnosce sempre megliu i chjassi duv’ella pedieghja a nostra literatura.