Michel Feltin-Palas

Scontri di 26.02.2022

In u 2022 à chì ghjova à parlà lu, u corsu. À issa dumanda, Michele Feltin-Palas, capiredattore à L'Express è propiu appassiunatu di e lingue regiunale, hà pruvatu à risponde ci erimatina à L'Alb'oru, à l'uccasione di a Festa di a lingua materna. Da agguantà si u so publicu, Michele Feltin-Palas principia cuntendu un racontu. Imagineghja, in u 2222, un’Europa unificata chì l’inglese hè diventatu a so lingua ufficiale è ubligatoria. Cum’è tutte l’altre lingue eurupee, u francese hè pruscrittu è finisce per sparisce. « S’ella accadia quessa, si rivultaria u populu cù i pulitichi nustrali. È puru, issa situazione hè ciò ch’è no campemu tutti i ghjorni cù e lingue minuritarie », preciseghja u giurnalistu. Tandu u publicu hè subitu chjappu per via chì issa fola linguistica li ramenta un passatu ch’ùn hè tantu lundanu. Era l’epica quandu quella lingua corsa ùn si devia usà in scola ch’osinnò vi falanu e punizione à dossu, è tandu isse lingue rigiunale eranu cugnumate « patois »; eranu parechji l’omi pulitichi à disprezzà le, cù a scusa di l'unità naziunale. Preciseghja Michele Feltin-Palas : « D’issa fola a murale hè chì i Francesi ci vole ch’elli capischinu ch’una lingua, ùn hè solu un mezu di cumunicazione. Da custindi, ponu imaginà cum’hè ch’ellu ci tocca à salvà u corsu o u brittonu. Una lingua t’hà tante altre funzione ch’è no avemu da ammintà una dopu à l’altra ».

 

 

Visionner la vidéo