L’IMMURTALITA

 

 

Grantesta era un sapienti. Un sapientonu u più famosu di u mondu. I so studii finiti à Roma, volta in casa soia pà circà di riveda pà l’ultima volta a so vechja mamma, chì n’avia pà pocu.

 

Si metti in viaghju è dopu qualchì ghjornu scontra un povaru vechju andaccianu chì avaria vulsutu viaghjà incù eddu, pensendu ch’issu ghjuvanottu u pudia aiutà à marchjà ;

 

Ma u nostru sapientonu ùn hè d’accunsentu !

 

-« Eiu ùn socu u to servu. S’è tù voli marchjà, o nò, hè u to affari. A sa’ qual’hè socu ? Socu u sapientonu Grantesta ! »

 

Di colpu, u vechju andaccianu diventa un beddu ghjuvanottu, è li dici :

 

-« Iè, socu qual’è tù sè ! Un orguliosu pocu garbatu ! Ti ne sè risu di mè videndu mi vechju è malandatu ! Ma tutt’a to sapienza ùn ni farè nudda, un ghjornu sarè mortu ancu tù è nimu si ricurdarà di tè.

-« Comu dici ? Tù sè un pocu scemu ! Mora eiu ? Ùn ci hè paura ! I me studii facini chì socu u più intiligenti di u mondu ! Ùn possu mora u me amicu. Ch’è tù sia maladettu !

  I me capacità anu da serva à truvà un locu induva ùn si mori mai. « 

  

 Scurdendu si di a so mamma chì era muribonda, si metti in viaghju, corri quì, corri quà, longu sittimani è mesi. Un bel ghjornu, à l’abrugata, si trova vicinu à una muntagna è si pudia veda, in lettari di focu, issu scrittu : -« Quì ùn si mori mai » !

 

-« Infine, aghju truvatu ! Sò puri ghjuntu à scopra issa terra biniditta ! Avà socu eternu ! « 

 

U locu era piacevule, è Grantesta si truvaia binissimu. Ma pochi tempi dopu, una timpesta scatinata si pesa, chì disfaia u mondu ! Ma ùn hè durata tantu, di colpu, u ventu s’hè calmatu, è u soli spampigliulava ancu più chè prima !

 

« Chì maraviglia » pinsava u nostru sapienti ! « Sò ghjuntu in paradisu ! »

 

Ma nant’à cresta hè affaccatu un mostru, ali d’acula sparti, u capu di un lionu, è sgrinfii arrutati chì tinianu strinti un omu mezu mortu è marturiat . L’aciddonu si cala vicin’à Grantesta, piglia in u so bizzicu una pitrucedda, è po sparisci in a furesta !

 

-« Ma chì vinarà à fà quì issa bestia cusì mala, è parchì s’hè calata à piglià una pitrucedda, è pà chì fà ? »

 

Un chjapponu chì parlava di colpu li rispondi :

- «  L’aciddonu veni quì pà sdrughja tutt’issi lochi è sparghja un’à unu pà u mondu i pisticciuli d’issi muntagni! Tuttu sarà sdruttu quandu issi muntagni, chì oghji toccani u celi , sarani tutti spianati. »

-« Ma allora, nienti quì  hè eternu ? » si stona Grantesta.

-« Innò ! Ma ùn ti ni fà , ùn hè pà dumani. Millioni d’anni anu da passà  prima ch’è tù morghi ! »

-« À mè ùn mi cunveni. Vogliu l’eternità è basta. A circaraghju finch’è a trovu, chì sò sicuru di truvà la. «

 

Ѐ Grantesta si metti tornu in viaghju, corri pà monti è pà vaddi, circhendu u paesi di l’eternità. Cusì ghjunsi vicinu à un lavu tamantu chì paria u mari! Locu tuttu fiuritu, arburi carchi di frutti di tutti maneri! Un altru paradisu!

 

In una pianura c’era una lecci tamanta chì pudia agrundà sott’à i so frondi una cità !  

Ѐ eccu chì una branca di s’arburottu si metti à parlà :

-« Dì ghjà, omu murtali, qual’sè tù pà vena quì in issu locu sacru ?

-« Tu sè una lecci urguliosa! Ma dì mi ghjà: semu quì in un locu eternu? Allora socu anch’eiu eternu è ùn aghju paùra di tè ! “

 

Di colpu, u celi si carca di nivuli neri, u ventu si scatena, accenditi è fumaccia, un tempu à disfà u mondu!

Impauritu, Grantesta pesa l’ochji com’è pà prigà u celi, ma tandu vedi à mezu fiari è fumu un aciddonu neru spavintevulu, chì si cala vicinu è piglia una goccia d’acqua in u so bizzicu.

 

-« Qual sè tu? Parchì veni quì à bia l’acqua d’issu lavu? Parchì s’hè livata issa timpesta maladetta? »

-« Sò vinutu à annuncià a morti. Tutt’i mill’anni, vengu à piglià una goccia d’acqua, è quandu u lavu sarà biotu, tandu tutti devi spariscia d’issu mondu .

  Goccia à goccia, ci n’hè pà millai è millai d’anni !»

 

-« Ma allora a lecci, m’hà cuntatu foli ! Hè baciarda postu chì m’hà dittu chì a ghjenti d’issi lochi erani eterni! Ancu pà millai d’anni eiu un vogliu mora! Dì mi indu possu truvà issu locu di l’eternità vera?’

-« Ci hè un locu comu tù dici ma ùn ti possu dì induva si trova »

-« Allora eiu u truvaraghju » rispondi Grantesta 

 

Ѐ torna, si rimetti in viaghju ! Dinò pà ghjorni è ghjorni, finch’eddu scontri una bedda ghjuvanetta, ch’in fatti, era una Fata !

 

-« Induva conti d’andà, o ghjuvanottu?

-« Cercu u locu induva ùn si mori mai! »

« Veni incù mecu, ti purtaraghju à u locu ch’è tù cerchi!S’è ùn m’avii truvatu, mai ùn pudaristi truvà issu locu! »

 

Garntesta presi piazza incù a Fata in un carrozzu trascinatu pà setti cavaddi alati, chì si mettini à bulà, pà calà si pocu dopu in u paesi eternu!

 

Anni è anni, Grantesta è a so cumpagna anu campatu felici, ma un ghjornu, s’hè ramintatu chì a so mamma sarà ancu sempri viva, è avaria vulsutu andà à veda la.

 

-« S’è tù mi vulii ascultà, ùn farii issa tuntia! dissi a Fata. Ma posta ch’è tù voli andà, piglia issu cavaddu alatu chì ti purtarà nant’à a terra. Dopu pudarè vultà quì. Ma ùn metta mai pedi in terra, stà sempri à cavaddu chì pudarii mora subitu! »

 

Ghjunsini à u paesi di a so mamma, ma nimu ùn la cunniscia! Grantesta hà circatu a so casa, hà dumandatu à tutti ma senza risultati: a so famiglia ùn avia mai asistutu quì !

 

Allora ùn firmaia pà Grantesta trist’è neru chè à vulta ind’è a so Fata! U cavaddu piglia u so bulu è si merttini in viaghju ma vicinu à un fiumu, vedini un carrettu carcu ch’ùn pudia sorta di a pantaniccia. Ci vulia à aïutà lu!

 

Grantesta si barca di u cavaddu ma appena missu pedi in terra, vedi a Morti chì s’avvicina incù a so falcia!

 

-« Tù m’a’ sempri vulsutu fughja! Sò anni è anni ch’è ti cercu! N’aghju frustu tanti paghji di scarpi à corr’à pressu à tè! . Fideghja! N’aghju pienu u me carrettu! A to vita si ferma quì!

 

È di un colpu di falcia, a Morti faci saltà u capu di Grantesta, u sapientonu chì ùn vulià mai mora !