Un giru in Sicilia cun Lidia MORFINO vi cambia tuttu. Micca solu dimensione, paisaghju, fenomeni migratorii è altri, ma puru a vitalità di a lingua lucale è u so statutu in a mente di issa pupulazione di quasi 5000000 persone.

L’esempiu individuale è famigliale di Lidia MORFINO, issa Messinese ghjunta in Bastia è chì ci hè stà, tenendu sempre cuntatti stretti cù a cultura siciliana è taliana dice propiu quant’ellu ci vole à manighjà cun prudenza è ghjudiziu nuzione è cuncetti chì parenu stabiliti una volta per sempre. A situazione ch’ella discrive hè quella di a diglussia ma cù u cunflittu diglossicu trà lingua alta è lingua bassa nancu purtatu à palesu pè a cuscenza pupulare. Hè tandu ch’ella ghjoca quella regula di spartera funziunale trà u sistema linguisticu ricunnisciutu altu è chjamatu “Lingua” è l’altru, ristrettu –s’ellu si pò dì cusì-à l’adopru non furmale (famiglia, intimità, relazione pupulare, tema, sugetti è quistione di tutti i ghjorni...). Or issu sistema linguisticu minurizatu hè chjamatu “dialettu” senza disprezzu o, sempre cun amore è tennerezza“lingua di u core”. Via, ùn cambiarà tantu a pertinenza scentifica di l’analisi sociolinguistica ccunnisciutu, ma e testimunianze cum’è questa ci portanu à rivene, sempre sempre, nantu à a quistione –cumplessa assai- di a diversità di e situazione linguistiche. Tantu più chì u ragiunamentu di Lidia si arremba nantu à esempii da fà riflette. Assai. Cume in u casu di l’opera di un Camilleri...