Salute à tutti

Ancu s’ella ùn hè forse micca una tradizione, vi mandu a risposta fatta in sessione à un’elettu nant’à u CAPES è u CPER.

Sapendu ch’ella ci hè imposta una durata per risponde (4 minuti), eccu ciò ch’ellu m’hè parsu utule à spone à l’eletti di a Corsica.

In u frattempu, avemu travagliatu cù l’Università è scuntratu i sindicati di studienti.

Sappiate chì, aldilà di l’elaburazione di u CPER, o sippuru di a prussima cunvenzione, ch’è n’avemu cuntattatu prima a Rettrice poi scrittu di modu ufficiale u ministru di l’EN.

Perfine, oghje in sessione si vota una muzione per difende u CAPES, presentata da i trè gruppi di a magiurità è pruposta à l’altri gruppi di l’assemblea.

Averemu l’occasione stu pocu di parlanne cù l’associ, i sindicati è l’attori impegnati quant’è u Cunsigliu Esecutivu in stu cartulare.

Intantu un saluti à tutti è à prestu 

 

Risposta à a quistione urale di Pasquale Carlotti

 https://www.isula.corsica/assemblea/docs/Questionsorales/2021O1014-Pascal-CARLOTTI.pdf

 

O Sgiò Presidente, cari culleghi, o Pasquà, caru amicu

 

A riforma di u CAPES, o piuttostu di i CAPES di lingua, mudificheghja a so forma, ma di più chè cusì, u so sensu prufondu. È dunque, l’averete capita, quella di u CAPES di corsu.

 

Cum’è tante volte, cum’è per a riforma di u liceu è di u bascigliè, u Statu nè chjama neppuru dumanda l’avisu di l’Università è di u Cunsigliu Esecutivu.

 

Ne prufittu per salutà e reazzione diverse, quelle di l’associ, sindicati è sopr’à tuttu di l’Università cun quale simu in cuntattu permanente da u principiu.

 

Un passu in daretu per ricurdà à i più giovani sta storia di u CAPES ; eramu in tempu di lotta di liberazione naziunale, cù u ben’ di Sindicatu Corsu di l’insignamentu. Fin’ di l’87, in vigilia di reelezzione di u presidente Mitterand, aviamu dumandatu un CAPES. Mi ricordu d’un scontru cù Jospin, in l’auturnu di l’88, tandu ministru di l’Educazione, è di a creazione annunziata davant’à st’assemblea. Ma mi ricordu di l’annullazione di stu CAPES bivalente, in lu 90, è di a neguziazione per ottene perfine stu CAPES, per a sessione di u 91 – 30 anni fà. Ci eramu o Pasquà, ci eramu.

 

Simu di pettu à un antru rinculu per u spaziu di u corsu, è, anch’eiu, ùn vogliu entre quì in i particulari, belli specificati in a stampa è in a lettera mandata cù a mo cullega Josepha à u ministru Blanquer.

 

Li ricurdemu quantunque « en francais dans le texte » chì a Cullettività hà dipoi a lege di u 2002 a cumpetenza d’elaburazione di a pulitica d’insignamentu di a lingua corsa è ch’ellu ci vole à cunsultalla quand’ellu si tratta d’una riforma qualunque in stu duminiu.

 

Cusì chì l’avemu sullicitatu per un scontru cù u fine più largu di parlà di u rinnovu di u quatru di sviluppu di a lingua in u sistema educativu, à tutti i livelli.

 

Ma per turnà à risponde à a vostra dumanda, chì dite chì oghje a primura di l’insignamentu di u corsu è u bislinguisimu face l’unanimità in Corsica, s’ella ci pare à noi capita è certa, quallà, fateci casu, l’affari serebbinu sempre in francese.

 

Cuntinuemu : più in là, ammentate, in listessu filu u neguziatu indiatu trà Esecutivu è Statu nant’à a parte « lingua corsa » di u Cuntrattu di Pianu Statu Regione, u cusì dettu CPER è ci dumandate à chì ne simu inquant’à e discussione nantu à u CAPES è u CPER.

 

Averemu forse l’occasione, dumane, di turnà à parlanne, ma intantu, per faccila corta sta mane, vi possu dì chì u ministru cunnosce oramai e nostre dumande :

 

- Per u CAPES, u mantenimentu di a forma è di e prove attuale.

 

- Dinò una dumanda per mette in via un CAPES bislinguu dettu di e discipline non linguistiche per sviluppà e figliere bislingue di u secundariu.

 

Accantu, sappiate chì n’avemu prufittatu per dumandà primamente chì u cuefficiente di l’uzzione LVC Lingua regiunale à u bascigliè sia simule à quellu di l’uzzione Lingue è Culture di l’Antichità, secundaria chì a lingua detta regiunale si pudessi piglià, cum’è quelle, da seconda uzzione. L’ispezzione generale ci hà da dà una risposta stu pocu.

 

Per ciò chì tocca à u CPER, chì serà u primu cocustruitu trà u Statu è u nostru esecutivu, ci seranu ogettivi maiò à accimà, sempre à prò di a generalizazione di u bislinguisimu è d’un’apertura nant’à u plurilinguisimu.

 

Dunque un rinforzu di 4 ogettivi maiò :

 

- Immersione : sustegnu è sviluppu massiciu di e strutture d’accolta sculare è apertura di 3 centri d’immersione supplementarii,

 

- Un sustegnu rinfurzatu per e filiere bislingue è immersive cù un pianu pluriannuale d’ecchippamentu.

 

- Furmazione più chè mai :

 

o cù a cuntinuazione di u grande pianu di furmazione di u primariu chì piglierà in contu ancu l’immersivu per e scole materne

 

o cù a messa in via d’un grande pianu di furmazione per u secundariu, a creazione d’una squatra pedagogica d’accumpagnamentu è a publicazione d’una lettera quatru di a rettrice nant’à a lingua corsa à a rientrata,

 

- Infine, incalchemu in u duminiu di l’Ecchippamentu à prò d’un sviluppu generalizatu di a pruduzzione è di a sparghjera di risorse pedagogiche, didattiche è d’arnesi di nurmalizazione linguistica (CANOPE, Università, tira avant’è tocca)

 

 

Eccu. Un CPER cù un bugettu superiore à quill’altru, di circa 20 milioni per cunfirmà l’azzione è l’avviu di l’anzianu di 17,4 milioni, cù sta vulintà d’ùn cappià mai, quella chì v’invita à fanne altr’è tantu, inghjilocu, da fà di u Corsu, a lingua di tutti, propiu una lingua per tutti.

 

Saveriu LUCIANI

 

Presidente di l'Offiziu d'Ecchippamentu Idrolicu di Corsica 

Cunsiglieru Esecutivu in carica di a Lingua è di a Missione di l’Acqua

Vicepresidente di u Cumitatu di Vascone di Corsica

Président de l’Office d’Equipement Hydraulique de Corse