Amiga, amigu

tèngio su praghere a nòmene meu e de su Coordinamentu pro su Sardu Ufitziale de ti cumbidare a sa de tres editziones de sa Festa de su Sardu Ufitziale. Ocannu l'amus a fàghere in Bonàrcadu (Aristanis) sàbadu merie su 24 e domìniga mangianu su 25 de custu mese de cabudanni.

S'idea est de cunfirmare sa renèssida de sas festas de Sedilo (2014) e Oschiri(2015), cun un'addòbiu in ue si presentant sas mègius fainas (de artu livellu ti asseguro) e sas mègius testimonias e esperièntzias de sa limba sarda pro ocannu in cara a sos ativistas, espertos, maistros, operadores, amantiosos, simpatizantes chi ant a chèrrere bènnere.

Semus chirchende de batire finas ispàssiu cun musica, giogos pro pipios, bisitas archeològicas e disvagos. Amus a organizare a baratu (belle 10 èuros) sa chena sotziale de su sàbadu e su pràngiu de sa domìniga.

Su programma est belle cumpletu e luego l'amus a publicare e l'amus finas a imbiare. In su mentres mi podes fàghere giai ischire si ses interessada/u. Finas si cheres faeddare o presentare calicuna esperièntzia o atividade de giudu. Podes finas batire àtera gente a praghere tuo e ispainare custa mail e sa prima manu de su manifestu de sa festa. Sunt agradessidos contributos dae artistas chi cherent sonare o cantare a sa festa. O finas chie cheret bèndere carchi produtu de sa terra de s'arte nostra.

As a retzire de seguru un'àtera lìtera

Gràtzias medas e a nos bìdere sanos in Bonàrcadu

Giuseppe Pepe Coròngiu