Sappeti o sgiò Cumissariu, eiu fighjulu tuttu in paesi. Fighjulu tuttu u mondu à postu chì ùn facciu nudda quì, ùn ci hè nudda da fà in stu paesi... Ed eiu v’aghju da dì ciò chì hè accadutu sta famosa notte.

Ùn avemu mai avutu soli in paesi a matina è a sapeti ciò ch’ella hè d’ùn avé micca soli a matina: bè, hè un veru castigu, a vi dicu. Nosciu lumi era piattatu par issa muntagnaccia. Dipoi u tempu ch’ella duraia issa situazioni più nimu a suppurtaia. Dunqua par cambià què,tutti i paesani anu dicisu di fà bastà sta storia. Tutti i notti dipoi dodeci anni tuttu u mondu chì stà in paesi travaglia. Tuttu u mondu travaglia à fà vena u lumi in casi nostri . V’aghju da spiegà ciò chì emu fattu. Dipoi tutti iss’annati a sera u paesi si spartia in dui,un gruppu s’aluntanaia di u paesi par fà un fossu è un altru gruppu falaia sottu à a muntagna par spiccà la da a terra. Era un travagliu più cà difficili ma ùn era micca un prublema.È po vennari sera era u famosu ghjornu. Ùn mancaia più cà un ultimu sforzu par sbarazzà si d’ella definitivamenti. Cum’è furmiculi l’omi forti l’ani pigliata in pesu è l’ani purtata sin’à u tafonu. Anu messu cinqui ori par spiazzà la. Una volta culà l’ani lampata in dentro. Tuttu u paesi c’era par veda u spetaculu; in quattru è trè setti a muntagna s’hè ritruvata intarrata sottu à trè metri di tarra.
Sabatu matina eramu tutti fora à cinqui ori di mani, nimu s’hè chjinatu, vuliamu tutti veda u soli arrizzà si. Vuliamu tutti veda issu soli maravigliosu ch’è noi emu tantu aspittatu dipoi anni è anni…

Vincenzu