Santa Lecca - video

Ghjè una strega cù l’ochji cusì chjari chì ne sò guasi tralucenti, u so sguardu hè cutratu è si dice « Santa Lecca s’ella ti guarda ti secca ! ».

Stà indu i circondi di u paese di a Venzulasca, per u Pentetu, locu vicinu à u fiume, fattu à scoglii tamant’è case, accumpulati. U locu hè periculosu chì si sguille nant’à e petre lisce è ci sò tanne prufonde. Ghjè quì ch’ella campa Santa Lecca. Sventura à quelli chì ci battenu !

Ma li piace ancu à affaccà si in paese, à l’ore di riposu, quandu e strette sò chiete, chì a ghjente dorme, guai à chì li s’intoppa !

Ghjè ella à vene à circà l’anime debbule, quelle chì sò per more, è chì ùn anu avutu una vita onesta. E si trascina in e so tanne prufonde.