Pedilestu, un ghjattinu manzu manzu, si porta in sulaghjolu a  so suredda Mustaccina chì  era famita , pà fà un beddu pranzu.
 
-« Ma attenti o Mustaccì, d’ùn micca manghjà l’amanduli senza sciappà li,  chì ti ponu strangulà »
 
Ùn avia ancu finitu i so paroli di bon’ sensu  chì a ghjattina s’era inguditu un’ amandula incù a curteccia,  chì hè ferma in a canedda. 
 
Senza un  pezzu di lardu pà innulià u passaghju, a tinta ghjatta saria morta assuffucata  in pochi tempi, sturzata è bè !
 
Pedilestu corri versu un armadiu è dici :
-« Armadiu, armadiu, apri ti subitu pà piàcè  chì mi ci voli un pezzu  di 
     lardu pà salvà à Mustaccina  chì s’hè sturzata inc’una amandula ».
 
-« Va’ à veda u stazzunaghju è fà ti fà una chjavi.» dissi l’armadiu.
 
Tandu corri ind’è u stazzunaghju
 
-« Stazzunaghju, stazzunaghju, mi devi fà una chjavi pà  apra  l’ armadiu
   pà piglià  un pezzu  di lardu pà salvà à Mustaccina  chì s’hè sturzata
   inc’una amandula
-« Allora mi ci voli trenta scudi pà fà a chjavi. S’è t’ùn’hà, dumanda li 
   à u marcanti di casgiu. »
 
-« Marcanti di casgiu, marcanti di casgiu, dà mi ternta scudi  chì u stazzunaghju  mi devi fà una chjavi pà  apra  l’ armadiu,    pà piglià  un pezzu  di lardu pà salvà à Mustaccina  chì s’hè sturzata  inc’una amandula.
 
-«  I ti docu ma prima, diciarè à i vacchi di dà mi più latti quandu i munghju. »
 
Corri apress’à i vacchi :
 
-«Vacchi, vacchi , ci voli à  dà più di latti à u marcanti di casgiu parchì mi devi dà trenta scudi di manera à pagà u stazzunaghju pà  fà una chjavi  chì devi      apra  l’armadiu   pà piglià un pezzu  di lardu pà salvà à Mustaccina chì s’hè sturzata   inc’una amandula.
 
-« Iè ma diciarè à i prati di dà ci più d’arba à manghjà ! »
 
U nostru ghjattinu cumencia à faticà ! Comu fà, in tuttu issu cumbugliu, pà ghjunghja à salvà  Mustaccina, sarà ancu  dighjà troppu tardi.
 
 -« Prati,  prati,  ci voli à dà   più d’arba à manghjà à i vacchi , cusì daranu
  più di latti à u marcanti di casgiu,  chì mi devi dà  trenta scudi di manera à pagà pà u stazzunaghju pà   fà una chjavi  chì devi   apra  l’armadiu   pà piglià 
un pezzu  di lardu pà salvà à Mustaccina  chì s’hè sturzata   inc’una amandula !
 
-« Più arba, voli dì più acqua ! O Pedilestu, dumanda à Diù di fà piova in quantità !
 
-« Socu stancu è addispiratu ! Mustaccina sarà morta quandu tutti issi manghjoni avaranu toccu ciὸ ch’eddi volini,  chì ùn sò mai techji !
 
 -«  O Diu Caru fà piova ma sarà troppu tardi ?    Allora ti dumandu di salvà Mustaccina,   tù solu  a po’ fà senza tanti strazii !
 
Diù hà  intesu u lamentu di Pedilestu. Hà inviatu una bedda piuvita, l’arba devi nascia in grossu, i vacchi saranu beddi grassi, u marcanti darà trenta scudi à u stazzunaghju  chì  farà a chjavi  chì devi apra l’armadiu, è si puderà piglià u pezzu di lardu.
 
Ma intantu, Mustaccina era dighjà morta !  
 
Pedilestu hà pientu tanti ghjorni,  è pà vindicà a so suredda Mustaccina , hà dicisu ch’eddu ùn pigliaria più manc’un topu in casa di u stazzunaghju.
 
Allora dopu  a banda d’ i topi hà crisciutu  in quantità,  à un puntu  chì un ghjornu eranu tanti numarosi  chì  si sò manghjati u patronu.
 
Di colpu, u marcanti, arruvinatu,  ùn hà più vindutu casgiu , i so vacchi sò andati 
à  a malavia, Diù ùn hà più fattu piova, è l’arba di i prati si n’hè secca !
 
Hà custatu l’amandula micca schiappata  chì hà sturzatu à Mustaccina !