E PAROLLE DI A DIVUZIONE

 

 

 

PARPAROLLE 1

U SANTU IN GHJESGIA: Ghjè una precisione nicessaria chì u Santu si pò truvà ancu: sia in prucissiò, sia ind’una cappella, una nichjula o in una casa, u più spessu di certe bighine

 

CILIBRÀ : In u scrittu d’Ottavi si tratta di festighjà u santu patrunale di a parochja, ma altrimente si pò cilibrà un anniversariu, una vittoria, una messa, un ricordu, una nascita, è cetera...

 

A PRUCISSIÒ : Si pò dì ch’elle ci sò parechje sorte di prucissione. Parleremu di a prucessiò a più currente, quella chì cuncerna l’esce di u santu da ghjesgia, cun passeghju pè i chjassi è un giru di a piazza di u paese, è di quale u sequiteghja cumpostu di abbatini, prete o diaconu, è chjesali paisani. Ancu ci si trova pè a festa patrunale qualchì incamisgiati per cantà o per mettasi sottu à i brancali di u veculu sustegnu di u santu.

È po ci hè sta prucessiò di u Venneri Santu chì si appronta  assai capunanzu sopra à tuttu cù a fattura di e crucette è di e palme, pè a vestitoghja di croce è crucifissu di a cunfraterna lucale.Sta prucissiò cumposta anzituttu da vinti o trenta coppii d’incamisgiatidi a detta cunfraternasi ne và di notte tempu à rende visitaà u santu sepolcru di a ghjesgia di u paese vicinu.

Cume ringraziamentu à tutti i spettatori è fideli di stu paese, u capu piore di a cunfraterna in prucissiò face esequisce avanti u ritornu una granitula di quelle rimarcate. Bisogna chì a granitula sia perfetta.

Vinu è panzarotti à buzeffu cumpieranu a festa.

 

U BRANCALE:

U brancale di u testu hè quellu chì s’infilza inde i tufoni di veculu per chì u santu passighjessi cume un papachjone per sti chjassi è strette di u paese. U brancale hè ancu quellu chì ghjova per attaccà una bestia di trattu à u carru, calescia è... tutti quanti.

Per aè vissutu duie guerre culuniale u brancale quand’ellu hè impruvisatu pè a purtera di i morti è feriti si chjama ancu scaletta. A stessa scaletta accunciata pò serve pè u trascinu di l’ammanime pè certe strette troncacollu.

È po per finisce u brancale era ancu quellu catalettu per purtà i morti inde a fossa cumuna  chjamata ARCAquand’ella era stata custruita sott’à a tighjata d’una chjesa o d’un cunventu cume in Viscuvatu uve aghju stabilitu, dopu ricercheinde l’archiviu ghjesale è cumunale chì trà u 1770 è u 1797 sò stati “accasati” 1065 morti viscuvacci di tutte origine suciale.

 

I CANTI:

Quì ùn si tratta nì di canti pupulari, ni di quelli di l’acelli, ancu menu di u ghjallu, nì di paghjella, ma solu di canti ghjesali modulati sia cun tonu feminile sia cun quellu maschile.

 

E CANDELE:

Si pò dì chì e candele sò diventate, inde i nostri rughjoni cun st’epuche di mudernità, u pussessu quasi esclusivu di a ghjsgia.Secondu a stacca o a fede di singunu, à u Santu li tocca sia un candilellu o sia un cirone. A più parte di i praticanti si tenenu in u ragiunevule è accendenu una candela o una cera.

Torna candele pienu u campusantu pè a Festa di i morti.

È po per casi particulariritruvemu e candele, cume una panna d’eletricità o stu testamentu di u 25 di marzu 1600 scrittu in presenza di quattru testimoni è… “con cinque lumi di candele accese” (sic). Cusì nimu pò dì chì u testamentu hè statu scrittu à u bughju.

 

I BASGI:

Mi pare chì i basgi dati à u santu si facenu nant’à u pede. Certi fideli si cuntentanu di mandà un basgiu. D’altri ingannatori, pè paura di malannu o per schivaghju facenu finta di basgià.

 

I FIORI:

Tempi fà i santi festighjati à a bella stagione avianu divizia di fiori, quelli di l’epuca invernea pocu è nunda!

Avà basta à vulè. Ci hè tuttu... cù i soldi!

 

I VUTICHJI:

Omi è donne di tutte l’origine chì si cunsacranu à u serviziu d’unu o parechji santi.

 

A MADONNA:

Ci hè da scrive libri è libroni. In più di esse a mamma di Ghjesu Cristu ghjè torna altre cose per noi altri corsi. Mi fermu à dui fatti solu:

Dopu à u 7 d’ottobre 1551, vittoria navale à Lepantedi u cristianisimu nantu à i Turchi, tutte e bandere corse prufittanu di l’arricchimentu di a maghjina di a Vergine Maria chì calpeghja a mezaluna ottomana.

U 30 di ghjennaghju 1735° prima custituzione cunnisciuta in auropa ghjè corsa è l’articulu Primu dice “(sic) “Il regno ellege protetrice della Corsica limmaculata concezzione di maria vergine. La sua imagine sera infrontata sulli armi e standardi, e la festa sera celebrata con salvi di moscheteria e di cannoni”.

 

SANTA LUCIA:

Vergine è martiria hè festighjata u 13 di decembre. Santa è patrona di i sartori, ghjè ancu a patrona di l’Isula di malte. In Corsica una trentina di santuarii li sò cunsacrati.

 

A CAPPELLA:

Assai di più nuerose chè e chjese, postu chì dighjà, in ogni chjesa, si ne conta parechjechì a so cunsecrazione pò andà da u corpu di Cristu sinu à a madonna, passendu per tutti i santi di l’almanaccu, senza scurdà si di i battisteri. À tutte quante bisognu d’aghjunghje tutte e cappelle di e tombe è tutte quelle sparnucciate nantu  à a nostra isula per isse cuccule, circuli, morgani, poghji, piane è marine.

 

U PATRUNALE:

Accantate e feste di u Cristu o di a Madonna, u Patrunale ghjè u coccu di mamma u più sciuratu inde a magnificenza di a so festa.

Hè u santu (o a santa) à u quala a chjesa di u paese hè stata dedicata è chì porta u so nome. Di tutta manera ghjè u santu prutettore di a cumunità paisana.

 

U SANTISSIMU:

Ghjè quellu quassù: ghjè “u più altu”. Quandu l’ostia hè cunsacrata da u prete, diventa u santissimu sacramentu.

 

L'ECCELSA FAMIGLIA:

o l’Altissima famiglia o a santa famiglia. Senzavulè dispiace à nisunu, eo dicerebbe piuttostu chì ghjè l'eccelsa famiglia u caleghju di tutti i santi.

 

U SIGNORE:

...(sottuintesu) nostru diu! Ùn ci hè bisognu di cumentu...

 

I CRISTIANI:

Sò l’esseri umani praticanti di a religione di u Cristu.In sta dipendenza cristiana ci si trova; catolichi, prutestanti, ortodossi, inglicani... è cetera.Simu centu è dodeci... Più pecure, più mocci si deve dì u signore!

 

GHJUVANNA D'ARCU:

Cum’ella hè una ghjunghjiticcia, hè megliu à piglià precauzione: dunque... Acqua in bocca!

 

L'ALTISSIMA INTARCISSIONE:

pè ottene u perdonu à l’ultimu gradu, bisogna à pricurà l'altissima intarcissione, vole à dì u più altu, quellu quassù!:

 

I MUSCHI DI I MAZZULI:

Prima ch’elle venghinu e vitrere quandu i fiori urtulanu, cume a rosula, l’irice, u gigliu, u fior’di morti.... scarsighjavanu, i mazzuli pè assestà l’altare maiò o quelli sicundarii di a cappella, si facianu dinù cù i fioridimachja cume u tangu biancu, a tramuntana, u madreselva, a ghjinestra... I muschi più forti sò quelli di sti dui ultimu citati...

 

U INTRATINIMENTU, A PULIZIA, I FIORI IN LI VASETTI, A CERA NANTU À I BANGHI:

Sti quattru sugetti vanu bè inseme.Subitu si pensa à tutte e faccende chì ci vole à compie prima di festighjà un fattu chjesale.

È po subitu, à dì la franca, si pensa cumu hè dettu inde u scrittu, a chjesa ùn hè di tutti, ma prima di tuttu ghjè a cosa d’unipochi chì finiscenu per crede si ciò ch’elli ùn sò, vale à dì: capizzoni indispensevuli... cum’ellu ci ne hè pienu u cimitoriu!

 

E STATULE:

Ci ne hè di tutte e mamme.... in petra, oru, argente, ghjessu, stuccu, legnu, astracu, arzilla, terraglia, purzellana, abeliu, vetru... quasi tutte sò di fattura freta cun sguardu fissu chì ùn si pò spiicà.

 

I CANTI À VOCE RIVOLTA:

Si sentenu in chjesa è in ogni locu. Si canta à voce rivolta u più spessu di gioia, di rabbia è ancu si pò dì per passatempu. Ind’è noi si canta, sicondu u casu, ancu si canta di riscontru è po dinù di ribattu.

Mi vene in core quelli canti d’elezzione, cunnisciutu u spogliu di u scrutinu:

O voi... appruntate li turcioni

Avà colla... chì si hè cacatu inde i pantaloni

Nì ciattu ciattu, ni à voce rivolta, canti di issa scelta, ùn ne sentimu più

U SGIÒ PIUVANU:

À l’epica di e pieve, u sgiò piuvanu era u capizzonedi a pretaria anzituttudi l’abbati è i curati di tutte e parochje di a pieve.In qualchì manera era u rettore d’issa entità regiunale chì diventò u cantone cù u decretu di u 3 di lugliu 1793 è chì fù applicatu in realitàà parte si da u mese di nuvembre 1796, perchè frattempu simu stati inglesi dui anni è ottu mesi.

 

RIFÀ U TETTU DI A GHJESGIA:

À mè mi pare chì u tettu di a ghjesgia si riface un pocu troppu spessu. Mi sò lasciatu dì chì dipoi a lege di u 1905 chì tratta di a separazione di u statu èincù a ghjesgia, l’affari in stu duminiu si sò impeghjuriti. Tutti cumandanu, ognunu dice a soia, è u travagliu si face à chjochjò.Ùn ci hè chè da vede certi tetti fatti à purcellinu. À pena finiti sò digià da rifà. È a man’di Diu ùn ci hè per nunda!

 

HÈ PROPIU A MAN' DI DIU;

Ghjè una cacciata chì si adopra quandu si hè statu trinnicatu da un fattu stranu. Ch’ellu sia à prò soiu o à prò di tutti, quandu per certi affari ùn si pò dà spiecazione è ancu menu capisce l’avvenutu, si pò dì chì l’affari sò in francese. Allora davanti  l’intoppu si piglia a trincata à l’accorta è si cappia scunvintu: “Hè propiu a man’di Diu!”

dopu à a messa

 

DOPU À A MESSA:

Dopu esciuti di ghjesgia dopu à l”ite missa est!”, certi carnavali patentati è bighine puttachjone  , subitu attaccanu u sughjettu predilettu. Dicenu quant’una ratachja di u mulinu, o una ragana di a cunfraterna.

 

A CARESIMA:

Temponi fà eranu quelli 46 ghjorni di dighjunu chè si praticavanu trà u mercuri di e Cennere è Pasqua. Dopu, st’pbligu si hè allegiritu è passò da u dighjunu à u manghjà magru. Ancu à pena più tardi ne simu à dui ghjorni di magruper settimana di l’epica ì sopra, u mercuri è u vennari è i quattru ultimi ghjorni di a Settimana Santa.

È po in finiscenda eramu falati à u solu vennaricume ghjornu magru.Avà ùn si sà più chì strada piglià.Tuttu dipende s’avemu da fà incù un prete integristu o un curatu à usu d’oghje.

 

A FESTA PATRUNALE:

Quessa è a festa paruchjale hè da simile à listessu. S’omu tene contu di l’ordine stabilitu da i catolichi, vale à dì u Signore, a Madonna è i Santi, a festa patrunale cun bona vuluntà vene à pressu à Natale è l’Assunta à Santa Maria.

 

L’ADURAZIONE:

Ghjè ancu offre si à diu è cunsacrà li penseru, fatti è sentimu, vole si dì tuttu ciò chì pare degnu di un sacrifiziu tutale.

 

LU SIA RINGRAZIATU U SANTISSIMU:

Stu modu di sprime si in u scrittu d’Ottavi si pò ripiglià è fà parlà in causa finita u Santu, chì cun sensu simule pò dì: “ch’ellu sia ringraziatu u più supranu per tantu è tantu aiutu ch’ellu mi cuncede senza paga...”

A fin di bè ghjè megliu chè prufitti à qualchissia chè à nimu...

PAROLLE 2

A SO CROCE:

U Cristu, l’hà avuta a so croce postu chì ghjè nantu ch’ellu hè statu crucifissatu. A si porta dapoi dui millennii è, à dì la franca è chjara, per mai più ùn si hè fattu sente, ancu menu ùn si hè intesu una lagnanza.

S’ellu stà à fighjulà da a so croce, podasse ch’ellu pensa: “Guardate mi quanti è quanti carnevali cuntentissimi di vive inde a sucetà di u lascia andà ch’elli si sò fatti. Ciò ch’elli ùn ponu rompe, di sicuru ch’ellu hè scundisatu. Ùn ci hè più chè mocci in capu. Aghju u mo da fà da scumbulì tuttu stu mazzabugliu!”

 

ÙN HÈ GHJORNU DA PARDIUSANTÀ

Perdiusantà pò esse pigliatu cume a traduzzione d’un capatoghju certu, anzi d’un cumenciu d’inzergà, ma in nisun modu cume una ghjastema incalcata di quelle chì sapianu lentà i nostri vechji. E parolle eranu tantu inghjuliose pè u sacru chì si fermava incù e carne insischite.

 

SONA U SICONDU TOCCU:

S’è vo avete intesu u primu chjoccu di campana, ùn vi inchietate micca. A ogni volta ci hè qualchissia chì sà induve ne hè l’affare.

“Ci hè sempre u tempu” dice a spia “ancu quellu di andà à beie un colpu o parechji sinu à inturcà si”

 

MIRACULU:

Per contu meiu, cappiemu troppu spessu u parullone “Miraculu”, Allora quellu deve esse adupratu cun primura rispettosa. Perchè cuntrariu à e lege di a Natura, un miraculu ùn pò esse chè sacru. Ùn hè l’affare  di u PDG, nè di fingardi, ancu menu, benu intesu, di Pincu Appinzapalu!

 

SONA U TERZU TOCCU:

Ùn reta più ch’à sente u chjucchettu, l’ultimu richjamu di i praticanti per cumincià à cilibrà a cerimonia di u Santu patrunale. Da tandu ci vole à spiccià si, fà u corricorri per ghjunghje avanti chè u sgiò curatu ùn sorti di a sacristia per cullà à l’altare maiò.

 

U CENNU DI A CAMPANELLA:

Intervene ghjustu à puntu, cume hè dettu quì di nanzu, quandu u prete entre inde a ghjesgia per andà à l’altare. Tuttu l’auditoriu s’alza di e carreie per salutà u prete chì porta u ciboriu à pone inde u tabernaculu.

 

LAUDATU SIA U SANTISSIMU:

Ludatu, cilibratu, glurificatu sia u signore, quellu quassù. Lascemu corre u restu, ùn ci vole à schirzittà ancù u Santissimu.

 

U PRETE:

U curatu, labbate, u paroccu, u vicariu, u cappellanu, u piuvanu, u sacerdote (cun prudenza), tutti quanti facenu parte di a pretizia di u bassu.

S’è pigliemu à cullà, trà i veschi, arciveschi è i cardenali, caschemu nantu à a fiuritura di u soprapanera.

 

UN CANTU NOVU TRINCU IN FRANCESE:

Nun ci hè da stunà si à i ghjorni d’oghje, tuttu si dice in francese à u gran pregiudiziu di a lingua corsa.

Omu si hè tantu è tuttu fattu affinchè u nostru parlà smarrisci pè u sempre.

Ancu assai ch’à rombu di lotta, ci hè stata un’abbattuta di a tindenza. Si no simu in traccia di turnà à gallu, l’affare ùn hè ancu guadantu. Ci hè bisognu è necessità di avè un’attenzione cuntinua osinnò emu da esse annigati da u “trincu francese”

Persa a lingua, persu u populu

Persu u populu, persa a terra

 

A CANTERIA CHÌ INTUNAVA A VOLTA È SCRUCCULAVA A PELLE GHJALLININA À A GHJENTE:

Se ci hè un sbagliu in a marcatura di a parolla intunava à locu è piazza d’”intrunava” simu in presenza di un doppiu sensu di l’infrasata:

• A canteria chì intunava a volta: i cantori chì intunavanu ognunu per unu incù u cantu di e donne...
• A canteria chì intrunava a volta: i cantori chì intrunavanu l’invultinatu di a ghjesgia...

Micca altri cumenti......!

 

L'ABBATINI:

M’arricordu di l’epica chì sò statu abbatinu, cume a gran parte di u zitellame d’i stu tempu.

Allora ùn vi ne contu nunda, a dumenica eranu sempre cuntrasti per sapè qualessu di noi duvia risponde à u prete durante a messa.

Cume tutti l’abbatini parlichjulavamu à straccera u latinu, a chjama di u prete avia una rispostadi quelle fiurite à scuncertà i frati “ignurantini”.

Ghjè vera ch’isse risposte, vistu issu affare di u latinu, si facianu à voce rimessa. Ùn ci era di sentevule chè a prima è l’ultima parolla di u fraseghju.

 

A PREDICA:

Mi arricordu quand’era abbatinu chì u prete prununciava ogni dumenica, sempre da l’altare maiò, a so predica. Cum’eramu in tempi di guerra, u sughjettu era, u più spessu, inde u stessu suminatu. Tutt’à l’incuntrariu quandu ghjunghjia u frate predicatore, ellu si ne cullava in pulpitru, è da quassù, incù a so voce di stentore à fà trimà a ghjesgia, cuminciava a predica cun ispirazione venuta d’a teulugia. Quandu issu frate predicava a ghjesgia era piena zuffula.

 

"SIATE TUTTI RINGRAZIATI, AVARETE U FAVORE D'UN ANNUNZIU MAGNIFICU OGHJE":

Ùn sò s’ellu serà un annunziu magnificu, perchè d’appressu à u scrittu ci hè un PDG ghjunghjiticciu cù una vista interessata nant’à i lochi di u cumunu. Aghju lettu è rilettu u testu senza pudè sapè cos’ellu cuntava fà. Ma ùn ci pensemu chì assai di ste ghjente sanu sempre cumu sorte si ne à pedi asciutti. È quand’elli si ne vanu suvente lascianu l’isulani inde a dirotta. Allora prudenza avanti d’annunzià “mondi è mari”, bisognu di sapè induve si mette i pedi perchè e lezzione “moi que je sais tout” à mè mi piacenu quant’è a pena in corpu.

 

A CUMINIONE:

Hè l’attu pè u quale i cristiani ricevenu u corpu è u sangue di Ghjesu Cristu nde u sacramentu di l’eucaristia. Napulione Primu hà dettu chì u ghjornu di a so prima cuminione era statu u ghjornu u più bellu di a so vita.

Eiu ùn sò chì ghjornu hè statu, ma sò ch’eramu à pocu pressu à l’epica di quellu parapiglieteni di u sbarcu in Normandia fattu d’Americani, Inglesi è Canadiani è l’altru à l’Isula d’Elba fattu da e truppe d’Africa nera è u primu battaglione di “choc” induve servia u mo fratellu primunatu.

È cusì và u mondu, da e cose sacre, ne ghjunghjimu à parlà di u tazzeghju frà omi.

 

I CANTI SPUTICHI:

Hè vera chì u core s’empie di malincunia quandu noi altri vechji sentimu canti sputicati. Ci pare di vive à un altru tempu. Ma prestu prestu i canti à trincu francese ci ricunducenu à a realità è ci facenu capisce chì e cose ùn sò più cos’elle eranu è chì abbisugnerà ch’ellu ci piaci o nò, rimà un mondu novu

 

LA GHJESGIA ALLUMINATA :

Inde u casu di u scrittu si pò dì senza sbagliu che a ghjesgia alluminata solu dentru, osinnò saria data a precisione “alluminata dentru è fora”.

Se à i ghjorni d’oghje l’illuminazione hè pè a maiò parte fatta incù l’arte eletricu, qualchì anni fà, abbisugnava schjarì si incù cere è cironi è sopra à tuttu cun lumere à ogliu d’infernu.Si pò dì chì e cerimonie eranu cilibrate inde a bughjura.

 

L'OMI IN FONDU, I ZITELLI IN LU MEZU, E DONNE DAVANTI È U SANTU... IN PARADISU:

Simu in presenza di un assestamentu di fedeli cristiani chì s’approntanu ad andà si ne in prucissiò incù u cantu, sicondu una strada pensata di nanzu, è chì si farebbe à l’avvinta di u paese pè i chjassi più comudi è quant’è pussibule i megliu schjariti, al ritornu in ghjesgia ùn hè certu chì l’ordine di a partenza sia u stessu.

 

L'AVVINTA DI U PAESE:

Hè una di e manere per dì tuttu ciò chì tocca à u circondu custruitu di u paese. U cuncettu chì si face omu di un paese ghjè qualcosa attundulitu o accoltu intornu à u campanile. Ùn hè quasi mai cusì ma assai paesi sò lungaruti nantu à un spinu muntagnosi o incagnati trà mare è monte, o à case sparnucciate, o ancu ripicati in fianchera di un versante muntagnolu.

Di regula inde i rughjoni di e zimbriche, i fianchi inghjò si svelanu  esse spessu capulatoghji à gira capu. À tornaconti di certi paesi, l’avvinta accunsente di fà spassighjate piacevule.

 

I PURTELLI SCHJARITI À CANDELE:

E finestre eranu alluminate cun candele di cera bianca, “sticchite cume u sgiò Ghjuliu”, secondu spressione di u Cismonte o “cumu u sgiò Ghjerra” d’à pressu i Pumuntinchi. Dapoi parechji decennali, ci n’hè di tutte misure, chjuche, mizane è maiò. I culori sò assai diversi. Quantu à a forma, ci vole à aghjunghje à quella quì sopra u pallone, u vasettu, è a turcinata pè ùn mintulà chè u puntu capitale. À i ghjorni d’oghje ùn ci scurdemu di schjarì i purtelli incù ghirlande eletriche è attrecci à u neone.

 

U PRETE CANTA È E DONNE RISPONDENU:

Sò di quesse canzone ghjesale di e quale u prete canta a prima parte di a strofa è a curale di e donne l’ultimu pezzu. Stu chjama è rispondi dura fintantu chì a canzona ùn hè compia.

Quasi tutte e canzone ghjesale sò in lingua latina o lingua francese, pocu è micca in lingua corsa.

Ancu di grazia chì u “Dio vi salvi Regina” (“God save the queen” sè inglesi eramu stati dopu u 1796) ùn hè statu imbruttatu da qualchì curretta francisata cume sò state scurticate à l’accetta parechje denuminazione di i nostri lochi spapersi.

Prete è donne a si cantanu in francese è puru sò più chè sicuru chì Dio è i Santi capiscenu ancu u corsu.

 

U PATRE ETERNU:

“essere u più supranu, creatore è cunservatore di l’Universu”. Sta definizione data da u dizziunariu... à mè mi calza. Eo ùn aghju voglia di dispiace à u Patre eternu. Megliu hè di crede chè d’andà à circà ciò chì ùn si pò truvà ancu menu pruvà!

 

L'ULTIMA BINADIZZIONE:

Ghjè l’ultima di sta cerimonia bene intesu. Grazie à Dio ci ne sarà d’altre è po torna d’altre.

Inde i tempi à vene, ch’è no pregalemu per l’umanità più clementi, è più sereni chè i nostri attuali, chì pianu pianu diventanu à rombu d’aghjunghje ne, una grande caldana in bullitura.

 

BASGIÀ A STATULA:

Aghju digià dettu ciò chì pensava di tutti sti sbasgiulimi inde una di e parole di a divuzione quì sopra, ma devu precisà chì si certi basgi sò finti, grazie à Diu a gran parte sò veri, schjetti, è di sicuru divoti.

 

LAMPÀ SOLDI IN LA CURBELLA:

À fighjulà bè u... ghjesale mette a so particella inde a curbella di u Santu, si pò fà casu di parechji cumpurtamenti. Citeremu i trè più aduprati. Ci hè:

• Quellu riservatu chì face a so limosina cun dignità è secretu
• Quellu chì face u gestu tantu in fughjoni ch’ùn si pò sapè s’ellu hà lampatu o nò in a curbella
• Infine u sbaccone, quellu chì vole fà sapè ch’ellu hà lampatu un bigliettone.

 

HÈ RISANATA L'ANIMA:

Ùn hè sicuru chì dopu à a messa, a prucissiò, u basgiu à u Santu l’anima sia risanata.S’è st’anima hè impistata d’acidia, a pace è a serenità ùn ponu rivene senza u cumpiimentu di l’anima.

 

SÌ DIU VOLE:

Ci casca propiu bè per compie stu trattatu nantu à a divuzione “Si Diu vole”, ùn ci vale à sturcinà nunda, si ferà. À l’incuntrariu, si Diu vole tuttu, tuttu ghjè pussibule... ancu l’impussibule....