Scontru culturale in caffè cū Maï Pesce
Puesia
*Ghjè bè, ma ...
Scontru culturale in caffè cū Maï Pesce accumpagnatu da Armand Paoli à l'organettu
S'hè intesu dì ch'in Bastia
Ind'un caffè si pudia
Mette u corsu à l'onore
Cū Maï u cantadore
Allora l'ammiratori
Ghjunghjenu à corri corri
St'artistu abituatu
À e scene grande à stadu
Accetta quella ristretta
Di a nostra, a scenetta
Ghjè a so voce potente
Calamita pà a ghjente
Noi ne simu pocu fieri
Ch'ellu venga volenteri
À sustene una parlata
Da chjucucciu praticata
U scontru piglia valore
Cū un tale animatore
À a scola di a cantina
È famiglia canterina
Senza corsi hà amparatu
Di prisente è di passatu
Quel'versu di Cursichella
Da liricu à paghjella
Quanti giri di paesi
Cun Canta o Chjam'Aghjalesi
Stu gruppu talentuosu
Macagnone è festosu
Nū u settantà creatu
È da San Ghjisè scalatu
Poi hà fattu dischi solu
Tandu prontu à piglià volu
Era ellu stu zitellu
Chì ghjovava di mudellu
Cumpunendu ancu canzone
D'amore è di passione
Bancalaru voce d'oru
D'un raru timbru sonoru
Maï Pesce entre ind'a storia
È si loderà a gloria
D'un tenore talentosu
Quant'è Vezzani famosu.
Cathy Campana 17/6/2023
*Ghjè bè, ma... era a frasa ripeticula (leitmotiv) impiegata da u babbu di Maï mentre chì u gruppu ingrandava.