Sò venuti tutti quelli

Chì stiman'à Jean Laurelli

Apressu à un professore

Ghjè u scontru d'un pastore

Ghjunghje incū la so ghjente

Cum'è un grande presidente

 

Bancalaru impiegatu

Pecuraiu diventatu

E so prime pecurelle

L'aleva cum'è zitelle

Denduli u puppatoghju

Senza u minimu alloghju

 

A banda prestu cresciuta

D'una manera astuta

Da centu à ottu centu

Eccu un omu di talentu

Chì offre à la discendenza

A vitale sussistenza

Inghjilocu cunnisciutu

Sempre prontu à dà aiutu

È cū l'antica spartera

Jean in tempu di tundera

Facia feste famose

Dopu le pecure tose

 

L'anghjuli l'anu mandatu

In custodiu delegatu

Hè santa la so missione

Cantà corsu cū passione

D'elli hà a voce d'oru

Un musicale tesoru

 

Artistu benevulente

Ūn risponde mai assente

Accumpagna gioia è dolu

Da cità à paisolu

Ind'a Corsica Regina

Pare a so forza divina

 

Si dumane u Signore

Ci cuncede u favore

Di mantene st'isulella

Corsa un pocu ribella

Si ferà a trasmissione

Di i pastori in canzone.

 

C   Cathy Campana 10/6/23