LES BOUDINS PETRU MARI

Lettu da Cathy Campana

LES BOUDINS PETRU MARI

 

Lettu da Cathy Campana

 

 

"Le monde n'est pas fait pour les boudins ». Issa frasa l'hà cappiata, ghjacciata, madama Sinibaldi, caschendu nant'à Galatée chi cullava pè e scali. Galatée, a so vicina di sottu. Una

pinzuta veduva d'un gendarme di Peru Casivechje. Ün aghju micca ascultatu u restu di a ragiunata trà d'elle perchè chì l'affirmazione m'hà lasciatu pensosu. Sò sicuru chì madama Sinibaldi, dicendu chi u mondu un era fattu pè i scogli, pensava à Galatée, ch'ella un pò pate. Galatée, magra è goffa cum'un difettu, senza nè cule nè petti, nasilonga, Galatée, ella, si dicia in sè, chi più bellu scogliu chè madama Sinibaldi ùn ci era, una ciccia oliosa è gattiva.

Madama Sinibaldi ci vede chjaru in fatti, hà ragiò. Le monde n'est pas fait pour les boudins. Rimarcate chì un « boudin », in francese, hè peghju ch'è un scogliu in corsu. Les boudins, carche di laure è diplomi, sò obbligate d'esse assai di più intelligente chè l'altre. Senza, un trovanu travagliu. È quand'elle trovanu à impiegassi, ùn ponu cresce in a ghjerarchia. Ci vole ch'elle sianu gattive cum'è a pesta. Goffe, intelligente è gattive. Cusì, ci hè una prubbabbilità, puru debbule, per ch'elle finiscanu capu d'un scagnu qualunque, temute è odiate da tutti.

Le boudin, dopu si vole marità. Per quessa hà bisognu, in più, di nasce ricca. Goffa, intelligente, gattiva è ricca. Unu u truverà. È puru, si à a felicità un hà dirittu, postu ch’ella hè un boudin, qualchì brusgiulu u si strapperà, s'ella si cuntenta di pocu. Campemu in un mundacciu, sottumessu à a dittatura d'un' estetica nurmalizata.

S'è vo' un site magri è alti, u mondu ùn hè fattu per voi, filate a vostra strada. Si u vostru modu di pensà ùn hè lisciu, u mondu ùn hè fattu per voi, filate a vostra strada.

S'elli un vi piacenu i chjassi trabattuti, u mondu ùn hè fattu per voi, filate a vostra strada.

Almenu...Almenu d'ùn esse un guerrieru Masai.

Chì parla pocu è face assai.