“U FUCARÈ DI SAN GHJUVÀ ”

(cù un eserciziu di ascoltu è di ripetizione)

 

Cità di Bastia le 23 juin à 10:30  ·

 

#Crònache
U fucarè di San Ghjuvà

La veille de la Saint-Jean, les Bastiais ne manqueraient pour rien au monde le spectacle du fucarè (prononciation bastiaise de « fucarellu »). Il marque la première sortie nocturne de l’été. Il y a quelques années, les gamins faisaient provision longtemps à l’avance de tout ce qui pouvait alimenter leur feu : cascette, baulli, cartoni, etc., et les gens vidaient pour eux caves et greniers.

 

Voici un extrait du roman de Ghjacumu Thiers « A Funtana d’Altea », dans lequel l’auteur décrit les fucarè bastiacci de son enfance :
 

« A festa di i Fucarè era vicina. Si era capulatu a medità di ghjugnu. U carrughju era in sussuru più chè mai, chì ci vulia à curà u tesoru di i cartoni, carree sbrembate è anticogliule riguarate à porta à porta da un mese in quà. Ci era vulsutu à entre in e corte mucidose duv’elli s’infracicavanu i mullizzi lampati da e terrazze, di notte tempu, pè rincrescenza di falà in purtò i stagnoni. A matina à l’alba, i spazzini passavanu, si attaccavanu lite, ma in e corte, ùn c’entrianu mai à dà una pulita. Cuntava solu ch’ella fussi spazzata da a banda di A Traversa : l’altru latu, da a banda di e corte, pudia stà mullizzosu chì ùn si vidia. In i recintuli ch’elle facianu e corte, trà una cosa è l’altra, ci era sempre da graspullà qualchì tavula o un restu di carrigone scurdatu custì da un pighjunante chì avia pensatu, durante l’anni è l’anni, di pudellu purtà ind’è u bancalaru. Ogni cummercente di u carrughju si facia un duvere di purtà u so affollu à l’intrapresa zitellesca… Tuttu tenia à l’altezza di u catastu di ogni banda, di ogni carrughju. U soiu, ci vulia à ingrandallu sempre di più, ch’ellu fussi più bellu è più furnitu chè quelli altri : e spie andavanu da unu à l’altru è dicianu chì San Ghjisè, Terranò, A Piazza è Paratoghju eranu miraculi ciò ch’elli ci avianu pussutu trascinà nantu. »


(Fonte : Almanaccu di Bastia / « A Funtana d’Altea », Ghjacumu Thiers, Edizione Albiana, Livia, 1990. Futugrafia : S’appronta u fucarè à A Marina, in Bastia, di ghjugnu di u 1963. « Blog Hier en Corse ».)

 

 

A festa di i Fucarè era vicina. Si era capulatu a metità di ghjungnu. U carrughju era in sussurru più chè mai chì ci vulia à curà u tesoru di i cartoni, carree sbrembate è anticogliule riguarate à porta à porta da un mese in quà. Ci era vulsutu à entre in e corte mucidose duv'elli si infracicavanu i mullizzi lampati da e terrazze, di notte tempu, pè rincriscenza di falà in purtò i stagnoni. A matina à l'alba, i spazzini passavanu, si attaccavanu lite, ma in e corte, ùn ci entrianu mai à dà una pulita. Cuntava solu ch'ella fussi spazzata da a banda di A Traversa: l'altru latu, da a banda di e corte, pudia stà mullizzosu chì ùn si vidia. In i recintuli ch'elle facianu e corte, trà una cosa è l'altra, ci era sempre da graspullà qualchì tavula o un restu di carrigone scurdatu custì da un pighjunante chì avia pensatu, durante l'anni è l'anni, di pudellu purtà in u bancalaru. Spessu vi venia u fretu in a lisca quand'ellu affaccava qualchì topu grossu cum'è un cunigliulu chì scappava cù un frischju striduliu è minacciosu. Ma u più chì ripurtava era a visita ind'è e butteie. Ogni cumercente di u carrughju si facia un duvere di purtà u so affollu à l'intrapresa zitellesca. Micca ch'elli sianu stati propiu à a manu cù i sgaiuffi chì girandulavanu da unu à l'altru; era piuttostu una manera di esse fidu cù a so propia zitellina, è di mantene issa infilarata di gesti, di attitudine, di parolle è di sintimi mezu pensati è mezi risentuti ch'è no chjamemu l'usi, senza sapè à u ghjustu nè ciò ch'elli volenu dì nè s'è no ci simu attaccati in veru. Cusì, pè a preparazione di i Fucarè, da u quindeci di maghju à u ghjornu di a festa ci era cum'è a tregua trà grandi è chjuchi, affacendati à l'opera cumuna.

 

 

Tuttu tenia à l'altezza di u catastu di ogni banda, di ogni carrughju. U soiu, ci vulia à ingrandallu sempre di più ch'ellu fussi più bellu è più furnitu chè quelli altri: e spie andavanu da unu à l'altru è dicianu chì San Ghjisè, Terranò, A Piazza è Paratoghju eranu miraculi ciò ch'elli ci avianu pussutu trascinà nantu. I Lucchisacci di U Portu Novu -ùn era pè nunda chì i citadini schjappati, u locu, u chjamavanu U Picculu Livornu- si dicia chì ci l'avianu fatta à buscassi ancu un manicchinu di moda. U tenianu piattu è à l'ultimu, cuntavanu di schjaffallu in cima da incurunà u so muntinu. Quellu chì avia fattu issu donu era un sartore di A Traversa chì vendia pè i signori. U gestu avia palisatu a so lucchisia è insignava u tradimentu ch'elli cumpluttavanu i Parigini da in faccia, scurdatusi a differenza suciale chì, di regula è di solitu, i devia separà trà ricchi è puveretti.

 

 

Tutti i ghjorni, à cinque ore dopu scola, i capitani accuglianu a so ghjente. Quella sera cherchissia avia purtatu una nutizia capitale. In a matinata i Campodonico avianu sbarrazzatu a buttea. Ci era ùn sò quanti fangotti in purtò: ci tuccava à mandacci, à fruchignà, i trè più astuti è più lesti di a banda. Pè l'altri, u pianu di l'arricugliera era cum'è tutte e sere. À Niculà, li era toccu U Pensionnat, casu ch'ellu ci avia una cugina di terzu. L'avia vista solu una volta, pè una cuminiò, chì i parenti si frequentavanu pocu è micca, causa di una litica à pressu à una piana in Casevechje chì era tuccata à i Giambelli, per via di un bappè falsificatu. A piana era ghjuntà à ingrandà i terreni di a famiglia chì n'avia da ùn sapè mancu più cosa fanne. Dunque ci era a bischizza, ma a scusa era bella pè pichjà à a porta di u Pensionnat Giambelli. In u carrughju u casamentu facia cum'è un purrione di signuria.