CACCARU

CACCARU

Dapoi a morte di a mo mamma, aghju di più tempu per cullà più spessu in paese è i ricordi mi revenenu à a mente... Di più, da quì à un annu, sò l'ottant'anni di a liberazione di a Corsica è un articulu in u giurnale lettu qualchì settimane fà m'hà ramintatu ‘ssu testimoniu d'una vita passata.

Allora, oghje, vulerebbe cuntà vi a storia di a mo famiglia è rende umagiu à u mo caccaru maternu ch'ùn aghju cunnisciutu ma chì fù cusì presente in e nostre vite.

Vi cuntaraghju quì, a storia o piuttostu a ferita di tutta a mo famiglia, cum'è l'aghju sempre intesa d’a mo mamma, a mo caccara avendu sempre elusu e mo questione, è ancu d'appressu à e mo ricerche per sapè ne di più è capì.

 A storia hè poca cunnisciuta, hè quella di u mo caccaru maternu, Ghjan’Battì Baldi, mortu u 15 di ghjunghju di u 1939, sò ottentatrè anni, in u naufragiu di u sottu-marinu Phénix chì cruciava à u largu di u Vietnam, lascendu una moglie, a mo caccara Maria è duii figlioli, Francescu chì avia 6 anni è Ghjuvanna, a mo mamma, 2 anni tandu.

Maria Catalina Alessandrini, nata in Canari u 31 d'aostu di u 1905 è Ghjan’Battì Baldi, natu u 5 di settembre di u 1905 in Pinu, si scontrenu in Canari è si namureghjenu à a cumuniò d'una cugina cummuna (a mamma di  Ghjan’Battì,  Valeria,  era nativa di Canari è hà spusatu Dumenicu-Simone Baldi di Siscu ; u coppiu s'hè finalmente stallatu in Pinu, à u gratu di l'impieghi di u mo arcibabbone).


Prestu, Maria et Ghjan’Battì si sposenu. Di st' unione nasceranu  duii figlioli, un maschju,  Francè,  u 26 di ghjennaghju di u 1933, u mo cumpare è una femina, Gjuvanna, a mo mamma, l' 8 di maghju di u 1937. Ghjan’Battì hè marinaru è u coppiu parte à stallà si in Tulò, vicinu à u portu d'imbarcamentu di Ghjan’Battì .
Prima di parte, Ghjan’Battì è quella ch'ellu chjama amurosamente Mimi, sò davanti à a so casa in Canari, in u paisolu d’E Chine, in faccia à u mare immensu è averà tandu 'sse parolle tragiche è premonitorie :

"Vedi, Mimi, què serà a mo tomba !"

U 4 di  nuvembre di u 1938, i sottu-marini "l'Espoir " è "Phénix " chitenu a cala di Tulò, per "l'Indoscina francese ", in u mare di Scina,  duve ghjunghjeranu u 16 di decembre di u 1938. Durante tutta a  traversata,  u Phénix subiscerà numerose avarie chì  l'obligheranu à finisce a traversata in area.

U Phénix hè un sottu-marinu francese dettu di "grande crucere",  longu di 92 metri è largu di 8 metri,  messu in serviziu u 21 d'ottobre di u 1932 ; hà un tirante d'acqua di 4m40 è pò ciumbà sin'à 80 metri.

 Subisce unipoche riparazione è quande l'isulazione d'una di e batterie fù ghjudicata curretta, fù decisu in a notte di u 14 à u 15 di ghjunghju di u 1939 di pruvà una "carica di tempu di guerra", à u massimu d'intensità.  L'operazione fù decisiva, u 15 di ghjunghju di u 1939 à l'alba,  u sottu-marinu participa à manopere d'addestramentu : u Phénix è l’Espoir chì devenu "attaccà" u cruciatore "Lamotte Picquet" davanti à Cam Ranh  (attuale cala d'Hą Long) ciumbenu.

L'eserciziu finitu,  u Phénix ùn ricolle micca. À a fine di a ghjurnata, una tacca di carburante hè sculinata nant'à l'acqua.  U Phénix ripone per 105 metri di fondu. E sferente operazione per pruvà à rimette à gallu u battelu fiascanu è u 5 di lugliu di u 1939, una ceremonia d'adiu è d'umagiu à e vittime hè celebrata à 12 nautichi à u nordeste di l'isula di Hon Chut. U naufragiu farà 71 smariti.


Per u stalvatoghju, u cane bagnile di u Phénix hà rifuittatu di cullà à bordu di u so sottu-marinu è averebbe imbarcatu nant'u à l'altru,  l’Espoir...

Cosa s'hè passatu esattamente ?

 

 Unipoche ipotese sò state evucate ma a mo mama mi cuntava ch'ellu averebbe splusatu per via di i vapori d'idrogenu sgagiate da è batterie in statu pessimu (eiu pensu chì hè à versione ufficiale chì fù data à a mo caccara da i ministeri di a guerra o di a marina... ma chì era pittostu un’errore umana, unu di i pannelli di daretu era restatu apertu è l’acqua si saria infultrata in a nave).

U misteriu ferma sempre oghje.

Frà i smariti, u mo caccaru maternu, Ghjan’Battì Baldi, un figliolu di u Capi Corsu, annosu di quasi 33 anni, smaritu à u serviziu di a Francia in l'adempimentu di a so missione.

Un umagiu li fù resu in Siscu, qualchì anni fà,  a u Monumentu à i Morti induve una placca fù posta. U so nome figura dinù nantu à quellu di Canari è ancu à u  Memuriale Naziunale di i sottu-marinari morti per a Francia, in Tulò.

 Tandu a mo caccara rientre in Canari, in a casa familiale chì li vene di a so mamma à E Chine (chì ironia) cù i so duii ciucci. Ùn sarà mai ricunnisciuta vevula di guerra ma vevula fora di guerra, perchè chì a seconda guerra mundiale principiarà duii mesi più tardi, di settembre di u 1939.  A so vita è quella di i so figlioli serà assai difficiule, ùn si rimetteranu mai di 'ssa disgrazia.

 Per ‘ssa testimunianza, vulerebbe rende umagiu à 'ssu caccaru ch' ùn aghju cunnisciutu ma chì fù purtantu cusì presente in e nostre vite è ancu à a mo caccara per u so curagiu è per avè ci datu a maravigliosa mamma piena d'amore, sempre quì per noi è à fianc’à noi.

 
Spergu chì a mo storia familiale averà  sucitadu u vostru interessu. M'hè piacutu in tutti casi à cuntà vi la. D’a mo parte, mi tocche à dì vi chì mi sò arricurdata di a mo storia materna cù tant’emuzione.