Centru Culturale BIGUGLIA

Ci sò parechje direzzione da piglià s’omu vole discorre inseme d’issu u tema.

A prima chì vene à a mente in a circustanza saria di difende a lingua è porghje li aiutu è spannamentu. Si pò ancu fà cusì ma saria un peccatu di strumentalizà a riflessione. Hè sicura chì a spressione teatrale pò vene à ghjuvore di l’amparera è di u sviluppu suciale di a lingua, ma ùn si definisce cusì u teatru in u modu più sputicu soiu.

Un’altra direzzione pò esse u scopu educativu ? Serà più interessante è più pruduttivu ; u teatru hè è sarà un puntellu pedagogicu di primura : scola di sucializazione è amparera, perfezziunamentu di e capacità individuale di spressione è di cumunicazione. Per ciò chì tocca a lingua corsa è u so trattamentu didatticu u teatru hè un spechju interessante di u bagnu linguisticu spessu difficiule da sculinà in a Corsica d’oghje.

Ma sarà più utile di cunsiderà u teatru in sè cù e so esigenze generale, u so garbu originale ed e risolse ch’ellu porghje qualsiasi u tempu è l’epica cunsiderata. U discorsu tandu hè quellu più generale di l’arte è di a literatura in situazione di diglussia, situazione ch’ellu si tratta di rivalutà è forse da ùn cunsiderà più solu da pedica è trampalu ma ancu da risolsa è materia di spressione.

Di fatti si hè circatu solu à mette qualchì lume nant’à e mutivazione prufonde chì spiecanu

l’affaccà è u sviluppu di l’opere chì ghjustificheghjanu a spressione « teatru corsu », a parolla « teatru » significhendu custì una literatura dramatica nata è per dì cusì cunsumata secondu e lege è cunvenzione estetiche chì sò quelle di l’Europa di i tempi muderni.

U barattu hà permessu di vultà nantu à l’opera di UTEATRINU da parechji anni è i prugetti in ballu è da vene. Di sicuru a discussione ùn hè stata chjosa nantu à una cumpagnia teatrale è basta è cum’ellu si vede è sente in u ducumentu videò si hè ammintatu una pruspettiva è issa quistione chì vale per tutti i raporti trà lingua è cultura