U spostu di Francescu GALGANI discorsu, ùn ci vole à mancà ne mancu un brisgiulu!

Per ciò ch’ellu dice di prima:
un messagiu direttu è cuscente in quantu à u statu di un mondu d’oghje avvelinatu è assuffucatu da a so manera di purtà u prugressu è di cumpurtà si –ch’elle sianu cullettività o persone individuale- manghjendu, biendu è cunsumendu senza fighjulà e cunsequenze, è cuntinuà cusí, di capu in a sacchetta...
Ma ancu pè u modu ch’ellu a dice:
quì, ùn si trova da issu custattu nisun attitudine muralizatrice, nisun passatisimu, nisuna nustalgia tonta è di poca utilità pè oghje nè dumane. Innò, a parolla hè quella di un scentificu veru chì arremba a so demustrazione nant’à 30 anni di travagli precisi per l’oceani di u mondu sanu, è in dimensione microscopica quant’è macroscopica.
In quantu à a manera ch’ellu spone issa sapienza persuasiva, ùn si pò mancu caratterizà in modu ghjustu: verità scentifica, generusità umanistica, puesia è garbu di a simplicità di unu chì ùn hà bisognu di fà si la valè cù a retorica di i “mudelli”.

Via, un discorsu cusì veru chì, à sente lu sbucinà longu à a presentazione di i so diaporama, s’è vo vi sentite cullà indrentu qualcosa chì pare ghjelusia, ùn vi sbagliate chì ghjelusia hè. È ci hè da chè...