Hè un pezzu ch’è no cunniscimu à Mariano CORDA. Travagliemu cun  ellu sia in Cagliari in Sardegna sia in Corti o Bastia. E prime realizazione fatte inseme sò state ind’è l’anni 1990 è dapoi a cuuperazione ùn hè mai piantata sia in u campu di i Prugrami INTERREG sia in u prugrama abituali di i nostri scontri. Si truverà in a rubrica Teatru e realizazione pè a scena è in particulare u primu spettaculu: “U Medicu stranieru”, è po “I Ritorni di Pasquale Paoli”, è e duie creazione di i prugrami “Ex-voto” è “Mores”. Hè un artista pulivalente è cumplettu l’attore Mariano CORDA, regista è artisgianu di prima trinca. Ci hà animatu dinù parechji attelli di creazione per fabricà mascare, sculture è altre custruzzione artistiche. In una videò realizata in una scola sarda, spicca a maneghja di issa persona discreta, mudesta, ma cusì sgualtra è presente ind'è l'azzione culturale. Aiò, o Mariano, ti aspettemu pè un altru attellu di fabricazione di mascare in Corti, cù i studianti d'arte:

È ti filmerà l'amicu Franco FAIS, cum'ellu fece in Sardegna issa volta custì. Ti vulia dì: a sai chì pocu tempu fà si hè affaccatu Franco à dirige un attellu di arte di mima è pantumina invitatu da U TETATRINU in Furiani. Ci simu campati ci simu...

È po ci hà arricatu un bellu rigalu; unepochi filmetti ch'ellu hà fattu in Sardegna à l'occasione di feste tradiziunale. Frà pocu i mettimu in ligna.