Ultimamente in a Sala Natale Luciani, à l’Università di Corsica l’UMR LISA è u Centru Culturale Universitariu anu presentatu e publicazione realizate in u quatru di u so prugrama d’attività : ricerche, culloquii, scontri, studii pè i circatori, cunferenze, animazione publicazione pè i culturali. Di regula si vedenu isse attività in modu spiccatu. Cumu sarà ch’elle sò state messe è presentate isse pruduzzione ? A dice a Prufessuressa Dumenica VERDONI : ùn ci hè propiu da separà l’azzione di u circatore è di u culturale chì, d’altronde, quand’ellu si feghja e cose da vicinu, sò spessu spessu e mudalità sfarente di sicuru, ma appicciate quantunque, di listessa attitudine di pettu à u sapè, a scenza, a cultura, a vita. È po ci hè a leia, dice ella, nantu à u territoriu di u patrimoniu cumunu : a lingua corsa è ciò ch’elle facenu isse attività per serve la è fà la spampanà.