Ùn hè faciule nè pè a critica literaria nè per l’autore di rumanzi ellu stessu di situà l’opera trà mudernità, mudernisimu o postmudernisimu.

Quand’ellu si ammenta «l’aspetti « postmuderni » di certi scritti literarii, ùn si ammenta tantu un’epica bella determinata, ma di più si mette in ballu l’idea di un’attitudine. Si tratta piuttostu di a manera di quellu chì scrive di pettu à u tempu, e finalità di a vita è a vita mentale, psiculogica è suciale di l’Omu figuratu à traversu à i persunagi è e so interazzione cun l’altri in e vicende di a fizzione.

Dunque sarà menu un’epuca literaria determinata chè un certu modu di reazzione contru à e finalità determinate è -per dì la netta- simpliste di u mudernisimu è di l’ideulugie univoche ch’ellu hà pussutu inghjennà. A visione postmuderna pare ch’ella sia attente à e cuntradizzione evidente trà i prugressi tecnichi è altri è l’accentuazione di l’utilizazione inumana è ancu orrenda di u prugressi per fà danni è male.

Quand’ella si trova in a scrittura rumanzesca issa visione postmuderna cagiona unepochi fatti di scrivitura –cumu l’irunia critica o a satira pè indettu- chì hà da inserisce l’opera cunsiderata in una categuria differente di una longa tradizione di rumanzi affaccati à l’alba di i “Tempi muderni”.

A.Pomonti face un primu accostu di l’ipotesi postmuderna applichendu la à l’opera di G.Thiers.