Petru Santu MENOZZI - PASSU D’UN PUEMA

PASSU D’UN PUEMA

 

è l’inforse appiccicatu li – a cunclusione capunanzu è annullisce la ;

 

non finito u prusaicu di u nome (và dirittu u prusaicu,

frezza perentoria lentata, tocca è imperna)

da ammasgiulà a sperienza –

megliu à ùn principià, u principiu hè trappula

agguantà lu u discorsu quand’ellu hè per strada

è ammantà si ne

nè toiu nè meiu da sugellà ne l’attu di pruprietà

- cum’è l’ascesi di u scalpellu

risparmiatu ti u mondu à suppisà,

ma l’interrugazione, a ganga matrice liquida,

a prova di u rispiru è l’affondu, si cuntorce u musculu –

u paradossu di l’intenzione

vai, pocu preme l’arretta ; u chjassu francu di sboccu

varcatoghju stinzatu si –

e vene di u marmaru rozu castizzeghjanu –

 

pigliatu u sbilanciu, si manganeghja l’azardu trà testa è gigliu,

l’incertezza sfacciata di u ghjocu –

 

u riverbaru incappiatu trà parentesi, l’azardu di un spechju –

 

misfidà si di a munutunia tradimentosa di i curridori                                           listessa senza esse

u passu losciu ùn si sà arregulà trà indifferenza finta è attenzione tagliva               l’architettura muvente di a tela

quandu u muru pare cecu hè l’inciampu di chì si crede spenseratu                      un’arte di a memoria

l’allusingu di un puntu interrugativu appesu à un chjodu mischinu ;                    ogni mutivu un fruttu da sbaccà

tandu,

trà sè è sè

a cunghjunzione apre u spaziu di un dialogu fattiziu

 

Petru Santu MENOZZI