Cathy CAMPANA - CIUCCIARELLA

Per interromania .....Sta mamma Corsa canta una nanna à a so ciuccia

 

CIUCCIARELLA

 

O Ciucciarella

O preziosu tesoru

Di Cursichella

Dolce capilavoru

Ciucciarella furtunata

D'esse belluccia è garbata

Fà la ninna fà la nanna

Sì per noi vera manna

 

Appena nata

Sughji lingua nustrale

Una parlata

Di ceppu ancestrale

In scola di l'affezzione

Corsa hè la filiazione

Fà la ninna fà la nanna

Sì per noi vera manna

 

Ind'a pianura

À mezu à frutti è fiori

Sì criatura

Figliola d'agricultori

Onesti travagliatori

Ricchi d'amichi è d'onori

Fà la ninna fà la nanna

Sì per noi vera manna

 

E to caprette

Ūn sò per li pasciali

Campanu strette

Cun tant’altr’animali

Da la to casa vicine

Frà gatti cani è galline

Fà la ninna fà la nanna

Sì per noi vera manna

 

Toccu vaghjime

Ci chjama la muntagna

Nù l'alte cime

À coglie la castagna

Ne feremu bella farina

Torte nicci è pisticcina

Fà la ninna fà la nanna

Sì per noi vera manna

 

I t'antenati

Quassù in paradisu

Sò affaccati

À scopre lu to surrisu

Fubbe un scontru beatu

L'avvene è lu passatu

Fà la ninna fà la nanna

Sì per noi vera manna

 

O Ciucciarella

Suspirata è bramata

Graziosa stella

Di famiglia incantata

Mamma è babbu namurati

Cordoni à trè liati

Fà la ninna fà la nanna

Sì per noi vera manna.

Cathy Campana