A muta di a farfalla…

a ci  dice Ghjuvan Ghjacumu

Uttrovi 2002, ghjungu in Corti, cità cù un passatu storicu tamantu, carca di giovanni ghjunti di a Corsica sana. Hè un locu d’amicizia duv’eddu si scontra assai ghjenti. Eramu una bedda squatra vinuti da u Fiumorbu. Da quì, ci simu imbulighjati cun d’altri ghjenti vinuti d’ogni locu. Mi ci aghju fattu assai amichi cun quali surtiamu à fà ci qualchì sirati in i caffè. Hè in sta cità chì u diu di l’amori m’hà fattu scontra a mio cara. Pari chì l’ambiu curtinesi sia fattu à posta. Quandu pensu à Corti, u primu ricordu chì mi veni à menti hè sta sirata quand’eiu l’aghju scontra. Ùn a sò cumu spiecà la ma sta sera custindi mi paria chì ogni cosa, tutti l’arburi, i casi, i vitturi,..., tuttu in fattu, mi dicissinu : « Hè da tè, Hè da tè ! ».

Saittati tramindui da Apolloni... Ascultò u mio cori in festa chì ribumbava in pettu è chì li parsi un cantu scrittu par ella, un cantu d’amori. Da tandu, simu insemi è parlendu di Corti, ci ramintemu quissa sera chì ci faci un picculu pinzu à u cori.

Ma Corti hè dinù u locu di a mio ghjuventù, di i mio primi spirienzi, i mio primi riflessioni...

Hè u mio sicondu locu di nascita. Micca di nascita biulogica, ma di nascita spirituali. Hè quì chì aghju amparatu, studiatu è riflettutu nantu à ciò chì eru è ciò chì pudariu divintà, siontu i scelti chì fariu. A ogni liveddu, Corti hè statu par mè un locu d’evoluzioni è di trasfurmazioni. Ùn muta cusì, a farfalla?