J.FERRARI, M.BIANCARELLI, F.X.RENUCCI (BU-Corti, 2010)

     Lighjendu u Bullittinu telematicu « Tutti in Paro » chì face a leia trà l’attualità culturale di Sardegna, u fora è l’emigrati sardi, caschemu nantu à un articulu duv’ellu hè ammintatu l’ultimu libru di Ghjilormu Ferrari : Le Sermon sur la chute de Rome, Actes Sud, 2012). Li saranu ancu fiscate l’arechje à u rumanzeru !
      L’accusa è i rimproveri sò tantu più inghjusti chì u persunagiu di Libero ùn hè nè ammunestatu, nè rimpruveratu, nè stigmatizatu in u rumanzu di Ferrari. Saria ancu u cuntrariu, ma u più di l’affare ùn hè custì.
     Tuttu tene, una volta di più à quella vechja cunfusione trà reale è realità literaria. Hè un peccatu una volta di più ch’ellu ùn si capisca chì una creazione literaria ùn hè micca –ma mai, è mancu à pena !- da leghje si cumu s’ella fussi un ducumentu storicu, suciulogicu o di altra natura in relazione stretta cù e cose cum’elle sò è cum’elle vanu in a vita è cum’ella e ci discrive un’osservazione netta, precisa è s'ellu si pò ogettiva...
    È puru quessu u mendu hè una tendenza forte ancu in i giurnali spezializati pè a critica literaria. Si esce da a literatura è, per curciaghjine o precipitazione si vole leghje a vita, a sucetà, l’omi , i so pensà è i so penseri in u spechju di a fizzione. Senza tene contu, à puntu, di cum’ellu si tesse l’imaginariu necessariu à l’attu literariu, propiu trà mondu cunnisciutu è mondu da cunnosce. Hè custì, solu custì chì u lettore è u scrittore ponu dì ognunu a soia, in un chjama è rispondi chì si chjama lettura-scrittura o viciversa, cacciatu di sicuru chì prima vene u libru.
     

      È quand’ellu hè libru degnu è bellu cum’è quessu, hè sprupositu ancu di più di vulè ghjudicà senza avè lettu !

L'articuli di TOTTUS IN PARI si ponu vede nantu à http://www.tottusinpari.blog.tiscali.it
Lighjite e nove è fate vi "amicu" di TOTTUS IN PARI su FACEBOOK