à Anghjulu ‘Vanni, pueta è pastore, doppia nubiltà.
Attività altre
à Anghjulu ‘Vanni, pueta è pastore, doppia nubiltà.
O pastore
Amicu pastore d’antica memoria,
appesu à li monti, à l’alte pascure,
à fresche surgente, à grotte sicure
duv’ella s’hè scritta tutta la to storia.
È sunnieghju di tè, di le to sciagure,
di beli d’agnelli, di mandrie piene,
di soli ardenti, di notte serene
duv’elle sò scritte tutte le to cure.
Ti vecu pusatu à l’orlu d’un sassu.
Ti vecu avviatu d’un ligeru passu.
Amicu pastore d’anima nustrale,
di stintu paceru, di versu scherzosu
o puru à lode, d’improsa laziosu
duv’ellu si scrive cantu originale.
O dà mi una voce, da lu to altu chjosu,
ti vogliu una stonda tene cumpagnia,
ascultà le fole è stà mi una cria.
Di tè n’aghju brama, ne sò invigliosu.
Sorti da to grotta è veni à discore.
Sorti da to grotta chì sò dolce l’ore.
Guidu BENIGNI