L'8 di ottobre l'università di Corsica hà presentatu a Mediateca di a Corsica è di i Corsi, un strumentu patrimuniale chjamatu ad accoglie un materiale ducumentariu diviziosu, da mette lu à dispusizione di tutti quelli chì volenu cunnosce, fà vive è tramandà u campà variu è unitu di una cumunutà umana, u so ambiente, a so cultura. 

U prugrama di a ghjurnata, zeppu è riccu, hà accoltu assai ghjente è mossu un interessu maiò. In e prossime messe à ghjornu averemu l'occasione di vultà nantu à isse stonde chì anu messu in risaltu u bellu travagliu di tutte e persone è servizii di l'università. Issa realizazione hè da tutti. È ognunu chì volesalvà un ogettu, una maghjina, una stonda o un parè di issu cumunu vivu u pò fà cunnosce è sparte lu cun l'altri senza nè perde lu nè spusessà si ne.