Bastianu Clessi

 

Girandulata nant’à u Monte Cintu - Pumonte

Ghjera a matina di Penticosta ! Infini erami pronti à parta ! Dapoi sittimani aviami appruntatu una girandulata nant’à u Cintu.

Semu partiti da Purtivechju à sei ori è mezu è semu ghjunti versu 10 ori nant’à a piazza. C’era un fritu ! Ghjuvan’ Lucca, un amicu ci feci sapè ch’iddu facia solamenti 5 gradi. Ci semu spicciati pà piddà tutti l’attrazzi chì ci ghjuvaiani è ci semu missi in istrada. Aviami un saccu par omu nant’à u spinu induva c’era una tenda, un saccu à chjinà, una zucca è robba da manghjà pà a sittimana, affari propii è un telefunu purtabili in casu di bisognu. Ghjunti ch’è no erami à mità strada, avemu dicisu di rifiatà una stonda quandu un fumaccionu pagnu si stallò.

Avemu dunqua dicisu di metta in piazza i tendi. U lindumani appena scitati, semu surtiti fora è ci semu avvisti chì l’altra tenda era sparita.

Oimè, chì sarà successu ? O li tintacci ? Briumaiami com’è addispirati. Ci semu missi à circà li u dopu meziornu sanu quandu Ghjaseppu ci chjamò pà dì ci chì i nosci amichi si n’erani falati in un tafonu prufondu. Emu caminatu è semu puri ghjunti, supra locu. Parechji lagni si faciani senta.

– « Seti ferti ? »

– Iè, feti qualcosa, semu mali.

– Ùn vi feti pinseri, semu quì avà, ùn seti più soli, v’avemu da caccià da quì è prestu ! »

Azzingatu bè à una funa, falaiu, piamamenti è bè.

Ghjuntu inghjò, aghju vistu i me amichi. Erani tramindui ferti, ma furtunatamenti ci hè statu più paura chè dannu ! Qualchì truncatura, à u più ! Avà eru arrichitatu. Ma una quistioni firmaia senza risposta.

– « È comu aveti fattu pà falà vi ni quì indrintu !

– Pà ghjunghja più prestu, avemu dicisu di viaghjà ancu di notti, è com’è sapiami chì ùn sariati micca stati d’accunsentu ùn v’avemu dittu nudda ! »

• Ah vo’ po allora ! »

-------------------

Girandulata nant’à u Monte Cintu - Cismonte 

Ghjera a matina di Pentecoste ! Puru puru eramu pronti à parte ! Dapoi settimane aviamu appruntatu una girandulata nant’à u Cintu.

Simu partuti da Purtivechju à sei ore è mezu è simu ghjunti versu 10 ore nant’à a piazza. C’era un fretu ! Ghjuvan’ Lucca, un amicu ci fece sapè ch’ellu facia solu 5 gradi. Ci simu spicciati per piglià tutti l’attrazzi chì ci ghjuvavanu è ci simu messi in istrada. Aviamu un saccu per omu nant’à u spinu induve c’era una tenda, un saccu à chjinà, una zucca è robba da manghjà pè a settimana, affari propii è un telefunu purtabile in casu di bisognu. Ghjunti ch’è no eramu à metà strada, avemu decisu di rifiatà una stonda quandu un fumaccione pagnu si stallò.

Avemu dunque decisu di mette in piazza e tende. U lindumane appena discitati, simu surtiti fora è ci simu avvisti chì l’altra tenda era sparita.

Oimè, chì sarà accadutu? O li tintacci? Briunavamu cum’è addispirati. Ci simu messi à circà li u dopu meziornu sanu quandu Ghjiseppu ci chjamò pè dì ci chì i nostri amichi si n’eranu falati in un tufone prufondu. Emu caminatu è simu puru ghjunti, sopra locu. Parechji lagni si facianu sente.

– « Site feriti ? »

– Iè, fate qualcosa, simu male.

– Ùn vi fate penseri, simu quì avà, ùn site più soli, v’avemu da caccià da quì è prestu ! »

Azzingatu bè à una funa, falai, pianamente è bè.

Ghjuntu inghjò, aghju vistu i mo amichi. Eranu tremindui feriti, ma furtunatamente ci hè statu più paura chè dannu ! Qualchì truncatura, à u più ! Avà eru arrichetatu. Ma una questione firmava senza risposta.

– « È cumu avete fattu per falà vi ne quì indrentu !

– Pè ghjunghje più prestu, avemu decisu di viaghjà ancu di notte, è cum’è no’ sapiamu chì ùn sariate micca stati d’accunsentu, ùn v’avemu dettu nunda ! »

• Ah voi po’ allora ! »