Di regula allocc’à a fine di l’annu caccemu 5 publicazione ch’è no stemu preparendu cù un tamantu piacè:

BONANOVA n°41: A rivista cuntinua cun cambiamenti è crescita di robba scritta.

Si hè vulsutu accresce u postu di e rubriche è accresce u spaziu di u corsu scrittu. In u numeru 40 eranu 72 e pagine è cun assai illustrazione. Per stu numeru 41, passemu à 104 pagine scritte.

E rubriche fermanu listesse cù, in quella “Creazione” un postu più ampiu à e creazione di l’attelli di u CCU è di a ghjente più giovana.

A redazzione accoglie 4 giovani chì studieghjanu a literatura corsa, facenu publicazione è articuli critichi nantu à e pruduzzione è i currenti literarii di eri è oghje in corsu.

Ci n’arricurderemu di Pasquale BALDOVINI cun 104 pagine spiccate in 19 capituli arremba a so finzione nantu à un episodiu tragicu di a vita studiantina di sti pochi anni in Corti. L’ambiente è u versu di a narrazione sò di quelli chì celebranu u ricordu è insegnanu, senza muralisimu inutile, u rispettu di a vita cun ghjente, famiglie, lochi è storia di u cumunu.

Fiaschi ed altri scumpienti di Paulu DESANTI ci offre una trentina di nuvelle uriginale è mudernissime di scrivitura. Una musaica scritta cun l’estru d’issu scrittore forse mal cunnisciutu per via -hè paradussale!- di u versu comicu di u so teatru. A musaica di issi trenta raconti corti chì ùn cappianu irunia nè comicu ci spechjanu un mondu oghjincu, corsu è universale ch’omu vede è sente campà, parlà è pensà in u destinu oghjincu è perenne accinnatu da e so 174 pagine.

Piuma Albeghja  di Petru CANON ci offre u bellu mazzulu di a puesia cum’ella hè praticata in Corsica, vulemu dì sempre in relazione, più o menu evidente cun musica è cantu. Issu membru di Voce Ventu a ramenta, senza discorsu nè spiigazione retoriche ma solu cù a so puesia fine è sparta in ogni scornu è in ogni seconda, lumi, culori, aliti, soni è sintimi dilicati è cumuventi. È ci dà u laziu di cunvince ne tutte e critiche pronte à spiccà a literatura in generi ghjerarchizati!

Dumenicu BIGHELLI hà compiu i so Raconti pupulari di l’Isula di Corsica. À chì sequita à www.Interromania.com sà u travagliu fattu. A racolta sana hè propiu un’opera patrimuniale viva chì tramanda un inseme diviziosu di raconti vechji ma ùn l’aggranca mancu à pena. Di fatti a dicitura, di quelle vere è nustrale, face vene à u lettore u laziu di amparà si issi raconti... è di mette ci sempre qualcusella di soiu! Via una lettura creativa s’ellu si pò dì!