U più bellu ghjornu di a so vita.

 

L'ispettore Chiaroni chjamò subbitu u cumissariu Mosconi per dumandà li d'inchiestà nant'à l'omicidiu d'una damicella d'onore chì era stata scuperta morta ind'è i cacatoghji, durante un matrimoniu. Era longatirata in terra cum'è s'ella durmia. Ùn ci era nisuna traccia accantu à ella chì pudia fà suspettà à qualchissia. Di prima, prevenia u cumissariu chì u raportu medicale indicava nisuna traccia di suicidiu, a damicella d'onore avia purtatu cù ella ghjustu u so macchittera, ciò chì lasciava pensà ch'ella si facia una bellezza. A morta si chjamava Rinata, era una giovana bellissima chì era cunnisciuta  per sbrembà i cori di l'omi. A so arruganza è a so pruvucazione avianu annerbatu più d'un zitellone o omu fattu.Tandu, l’affare lasciava suspettà ch’ella avessi avutu un'altercazione cù unu di issi omi, cum'è unu di i servori  chì era innamuratu di ella, allora chì a damicella ùn li lasciava mancu un'ochjata. È si sà chì un omu ammusciatu per via d'una donna hè capace di fà n'importa chè. U cumissariu Mosconi andete nantu à u locu subbitu dopu avè riappiccatu.  Appena ch'ellu era ghjuntu, l'ispettore li insignò chì, secondu u duttore legistu, a morte di Rinata lasciava pensà à un avvelenamentu per via d'un russore anurmale di l'iride, è di u so epidermu surzu. Mosconi è Chiaroni andonu à interrugà a sposa è u so maritu per avè appena più infurmazione nant'à a so morte :

- Madama, sò u cumissariu Mosconi, è eccu l'ispettore Chiaroni. Secondu a vostra depusizione à a pulizza, avete dichjaratu d'avè scupertu u corpu di a vostra damicella d'onore versu 21 ore. Chì s'hè passatu? Dicia u cummissariu.

- Ùn capiscu micca. Era à u tavulone, quandu s'hè aisata per andà à rifà si una cria di bellezza. Era cù i mo amichi è Fillippu, u mo maritu. Quandu aghju vistu ch'ella ùn ghjunghjia più, sò andata à vede la per dì li di spiccià si, è, l'aghju trova in terra cusì, ùn ci era chè u macchittera cù u rossu à labbre ch'o li avia accattatu. Ma, quale hè chì l'hà tomba? Rispondia a spusata pienghjendu.

- Madama calmate vi. Aghju intesu certi invitati chjachjarà quandu aspettava u mo cullegu, è dicianu chì Rinata si era azzuffata cù un servore perchè l'avia mandatu à cacà. Pare ch'ellu hè innamuratu di ella dapoi parechji anni, dichjarò l'ispettore.

- Stà tranquilla, o Ghjulietta. Ùn vidite micca chì a mo moglia hè traumatizata? Andate puru à interrugà u servore ; si chjama Matteu, è sò sicuru chì ghjè ellu chì l'hà tomba, hà insultatu à Rinata è l’hà trattata di tuttu ! Rispose Fillippu annerbendu si.

Allora, era venutu u tempu d'andà à interrugà à Matteu. Mosconi è Chiaroni andonu versu e cucine per truvà lu.

- Matteu Bozzi ? Dumandò u cumissariu.

- Iè sò eiu. Rispose Matteu.

- Avemu intesu certe vuciate nant'à u vostru azzuffu cù Rinata. Erate innamuratu di ella à ciò chì pare. Ghjè vera chì era una donna bellissima, è chì era soprattuttu arrugante. Cumu avete pigliatu u fattu ch'ella ùn vi guardava mancu, è ch'ella avia un piacè scemu à mandà vi à spassu? Sapete chì Rinata hè morta avvelenata? Pò esse chì una goccia di velenu hè stata messa ind'è u so bicchieru nò ? Dumandò cù un’aria suspettosa.

- Arrestate! Mi suspettate d'avè tombu à Rinata! Era innamuratu di Rinata è ùn li averia mai fattu qualcosa ancu s'ella era una strega cù mè! È què u possu pruvà! Mughjava Matteu.

- È cum'è u pudete pruvà? Rispose Mosconi.

- Ùn sò micca eiu chì aghju servutu à Rinata. Quandu Rinata hà pigliatu u so bichjeru, eiu facia una pausa, è era u mo cullegu chì l’hà servuta. Pudete verificà e mio ore di punteghju, è ancu dumandà à u mio cullegu. Si sà chì Rinata hè stata ritruvata morta versu 21 ore, è eiu l’arretta, l’aghju fatta da 20.45 sin'à 21.15. Ùn sapia mancu chì Rinata era stata avvelenata.. Dicia Matteu pienghjiendu.

L'ispettore Chiaroni è u cumissariu Mosconi andonu à verificà l'ore di punteghju è cù surpresa indicavanu chì Matteu dicia à verità. Per alluntanà i suspetti andonu quantunque à interrugà u servore chì u rimpiazzava. U so cullegu era un pinzutu chì ùn cunniscia mancu à Rinata, ùn avia dunque nisuna ragione di tumbà la. Ci vulia dunque à circà altre piste è altri suspetti. I dui inchiestatori andonu à vede l'altri invitati per truvà qualchissia chì avia intesu qualcosa di stranu. Ci era un’invitata chì annunziò à u cummissariu è a l'ispettore chì a sposa è a so cugina carnale si eranu liticate per una storia di damicella d'onore. Paria chì a cugina avia rimbeccatu à Ghjulietta d'ùn avè la micca scelta à ella per esse a so damicella d'onore. I dui cullaburatori eranu nant'à un’altra pista, ci vulia dunque à truvà una certa " Davia Rossi ".

- Davia Rossi ? Dumandò l'ispettore.

- Iè sò eiu, perchè? Rispose Davia.

- Mi presentu : sò l'ispettore Chiaroni è eccu u mo cullegu u cumissariu Mosconi. Avemu duie ò trè quistione nant'à l'omicidiu di Rinata, a damicella d'onore di a vostra cugina. Una invitata ci hà dettu ch'ella avia intesu una disputa trà voi è Ghjulietta perchè un erate micca voi a damicella d'onore. Ghjè vera chì sceglie una amica piuttostu chì una cugina hè inamissibile. Dunque, ghjè per què chì vi dumandu induve erate versu 21h ? Interrugò Chiaroni.XXXXXXX

- Ispettore Chiaroni, era ghjelosa ma micca scema. Aghju avutu una discussione cù Ghjulietta nant'à issu sughjettu. Ghjè vera chì mi sò annerbata perchè dapoi ch'è no simu chjuche Ghjulietta  m'avia prumessu ch'ella mi scigliaria per esse a so damicella d'onore, ma accapate vi megliu a prussima volta per piacè, ci simu appaciate. È versu 21 ore era à u tavulone accanta à quellu di Ghjulietta è Fillippu, andate dumandà li. Rimbeccò d'un ariu arrugante Davia.

- Videremu allora sè vo site una bugiarda o nò, anderemu interrugà quelli chì eranu à u tavulone cù voi, è anderemu aslcoltà e parolle di Ghjulietta ! Dicia l'ispettore annerbendusi.

Chiaroni è Mosconi si sò messi à circà u pianu di u tavulone induve Davia era messa per interrugà quelli chì eranu à u so tavulone. Pianu pianu, andavanu parlà cù elli è in effettu l'invitati puvianu cunfirmà chì Davia era custì. Ci vulia à parlà cù Ghjulietta avà per avè a cunfirmazione chì e duie cugine si sò appaciate in vera. Andendu à circà la, d'un colpu, una cunversazione chì puvia schjarisce tuttu, sbucciò..

- È bè, andemu torna à vede à Ghjulietta ! A mumenti ùn ne puderà più di noi. Hà da torna dì listesse cose "l'aghju trovu cù u so macchittera". Mamma ne aghju una techja di sente tutte isse piste false ! Dicia suffiendu Chiaroni.

- Ma cum'è no simu baulli ò Chiaroni ! Mughjava Mosconi.

- Chè ?! M'ai fattu a peura ! Chì ci hè ? Dumandò u cullegu.

- Ùn trovi micca quantunque chì qualcosa ùn hè micca nurmale ? Tuttu hè sottu i nostri ochji dapoi nanzu ! Rinata hè morta avvelenata, d'accordu? È ùn ci era ghjustu chè a so macchittera cù ella ? Interrugò u cumissariu.

- Iè è allora? Chì hè u raportu cù l'inchiesta ? Si dumandava d'un’aria persa l'ispettore.

- È bè, ùn vedi micca chì ghjè a so macchittera chì l'hà tombu ? Quandu simu andati per a prima volta à parlà à Ghjulietta, hà dettu ch'ella l'avia trovu ghjustu cù a so macchittera ! Mughjò torna Mosconi.

- Iè ghjè vera, mi ricordu, hà dettu què, è hà ancu dettu chì ghjera ella chì avia accattatu u rossu à labbre... Rispose Chiaroni.

- Madonna, pò esse ch'avemu una pista. Ci vole subbitu à analizà tutta a macchittera è sopratuttu u rossu à labbre... Disse Mosconi.

I dui amichi decisenu di sparte si ne u travagliu : u cumissariu Mosconi andò à interrugà à Ghjulietta, è l'ispettore Chiaroni duvia analizà cù a pulizza scentifica tutta a macchittera chì era una bella prova à cunvinzione. Tandu, Mosconi truvò a sposa pusata à u so tavulone chì aspettava a fine di e ricerche cù u so maritu, per entre ind'è ella.

- Madama, aghju qualchì quistione à dumandà vi. Avemu circatu cù u mo cullegu tutte e piste pussibile è quasi tutte mi portanu versu à voi. Simu andati à vede a vostra cugina Davia, perchè un'invitata ci hà dettu ch’è vo vi site liticate per via di Rinata, dunque vi dumandu per principià s’è vo vi site appaciate ? Cherse u cummissariu.

- Iè mi sò appaciata cù ella, ma perchè dite chì tutte e piste vi portanu ind'è mè ? Ci hè un prublema ind'è l'inchiesta? dumandò Ghjulietta inchietendusi.

- Madama, quandu simu ghjunti à interrugà vi per a prima volta avete dettu chì a vostra damicella d'onore era sola cù a so macchittera è u rossu à labbre ... (sona u telefonu). Scusate mi, una seconda.

U telefonu di Mosconi sunava. Era Chiaroni chì u chjamava per dì li chì u rossu à labbre era l'arma di u crimine è ch'ellu avia qualchì restu di cianuru. L'inchiestatori anu capitu subbitu chì Rinata era stata avvelenata per via di u rossu ch'ella si mittia sempre. Issa dichjarazione palisava tuttu : ùn ci era più chè una suspetta, è era un'evidenza chì ghjera Ghjulietta u culpevule. Era ella chì avia compru un rossu à labbre Chanel avvelenatu è chì avia trovu à Rinata. Era ora di riappiccà è d'arrestà la, ma nanzu què, u cumissariu dumandò à Chiaroni d'andà ind'è a casa induve s'era appruntatu Fillippu per vede s'ellu ùn era micca cumplice.                                                       

- Ghjulietta, era u mo cullegu, è si trova chì l'arma di u crimine hè u rossu à labbre ch’è vo li aviate compru, ciò chì prova chì site voi u nostru culpevule ! V'arrestu subbitu. Disse Mosconi.

Tuttu u mondu di i sposi partia in pezzu. Ghjulietta si facia arrestà sottu à l'ochji di u so maritu scuzzulatu da l'avvenimentu. Ci vulia à purtà la ind'è a gendarmeria per sapè e ragione chì l'avianu arricatu à fà què, è dinù per sapè cumu avia pussutu buscà u cianuru. Mosconi li messe e manette, è a purtò sin'à u camiò di a pulizza. Arrivati à u parking, incuntrò à Chiaroni chì venia. Insignò à u so cullegu ch'ellu avia trovu ind'è a casa induve Fillippu s'appruntava una lettera di Rinata nentru un tirettu. A lettera ùn dicia nunda impurtante, era vechja è senza prove ma ci vulia quantunque à avè certe spiecazione di u sposu. Li dumandonu s'ellu avia qualcosa à vede cù l'assassiniu. E riposte di Filippu eranu senza interessu, u so alibi era cuncretu : ùn pudia micca avè ligame cù l'omicidiu chì ùn pudia micca appruntà si da cantu à a sposa è à Rinata, perchè a tradizione l'impedia. Si era dunque appruntatu cù i so testimoni chì pudianu cunfirmà a so depusizione. L'inchiestatori fecenu dunque imbarcà à Ghjulietta nentru à u camiò pulizzeru. Ùn era micca pussibile per Fillippu di lascià a so moglia sola, vulia andà cù ella sin'à a gendarmeria. D'un colpu, un papeu cascò di a so stacca. Chiaroni u riguarò è vidì qualcosa di stranu.

- Aspettate ! Aghju un elementu impurtante ind'è a mio manu. Dite mi appena Fillippu, vi piace a macchittera ? Cumu si face ch'è vo abbiate una fattura di rossu à labbre Chanel ind'è a vostra stacca ? A marca Chanel hè quella di u rossu à labbre rigalatu à Rinata, mi pare nò ? Interrugò l'ispettore.

- Chè ?! Chanel ? Ùn aghju mai rigalatu à Rinata un rossu à labbre Chanel ! Eiu aghju accattatu un rossu Dior ! Vi la ghjurgu ! Andate ind'è mè à circà a fattura sì ùn mi credite micca. Mughjava Ghjulietta.

Mosconi è Chiaroni si guardonu stupefatti.

- Mustrate mi e vostre stacche subbitu ! Disse Mosconi

U cumissariu guardò ind'è a so vesta è truvò un tubu quasi viotu chì cuntenia un restu di cianuru. Tuttu era chjaru : u veru culpevule ùn era micca Ghjulietta ma Filippu. Avia cumbricculatu tuttu per fà accusà a so moglia. Avia compru anch'ellu un rossu à labbre è l'avia rimpiazzatu cun quellu di a so moglia. Pensava chì a pulizza ùn truverebbe mai a so cumbina perchè u so alibi era cuncretu è pudia pruvà lu. Solamente ùn era micca à bastanza astutu, ùn avia micca pensatu à fighjà a marca di u rossu chì Ghjulietta avia rigalatu. Ùn restava più chè à sapè perchè è cumu avia buscu u velenu. U sposu era cottu, ùn pudia fà più nunda. Palisò à Mosconi è a Chiaroni e so ragione. In prima, era faciule per ellu di truvà appena di cianuru chì travagliava ind'è una farmacia. È po avia tombu a damicella d'onore perchè avianu avutu una relazione senza lindumane dopu una serata alculizata. Rinata era cascata incinta, è u minacciava di tene u ciucciu è di contà tuttu ciò chì s'era passatu à Ghjulietta s'ellu ùn li dava micca a soma di 55 000 €. Ùn ci era ch'una soluzione per chì Rinata tenissi a bocca chjosa... Tuttu era veramente finitu, u matrimoniu, issa ghjurnata negra è soprattuttu l'inchiesta. Ùn restava più chè Ghjulietta è e so lacrime, per via di u tradimentu di a so amica è di u so maritu. I dui culleghi caccionu e manette à Ghjulietta scusendu si per issa gattiva arrestazione. Mosconi messe e manette à Filippu, è ghjurò à Ghjulietta di fà tuttu ciò ch'ellu pudia per chì u so maritu stessi u più pussibile in prigiò.