Ci insegna Corse-Matin in a rubrica "Corse informations"
chì in u quatru di u Cuncorsu “Gestione integrate di e zone custiere”
sò stati premiati dui laureati - U Cismonte è Osani.

Per contu soiu u Cunsigliu Generale di u Cismonte hà sceltu di applicà i principii di a gestione integrata di e zone custiere à a riserva naturale di u stagnu di Biguglia. U prugettu cumporta trè aspetti: a prumuzione di l’agricultura durevule, biulogica in particulare; a rializazione di un pianu di paisaghju di u lido di A Marana è l’elaburazione di un pianu di gestione di l’allevu di pesci.Cusì u dipartamentu hà l’ambizione di accresce a qualità ambientale di u situ è à tempu di mantene l’attività ecunomiche chì ci si sviluppanu è dinù di favurizà l’accuglienza di u publicu, in cuncertazione cù i varii attori lucali.

Ognunu trà i laureati tuccherà una subvenzione furfettaria di 60000 euri, finanzata da u Fondu Naziunale per l’Assestu di u Territoriu (FNADT) . Issu aiutu vole accumpagnà quelli chì portanu i prugetti da mette in ballu attrazzi di ingenieria è di cumunicazione è dinù altre azzione chì sò in u settore di a sperimentazione.

U Prefettu di Corsica curerà dinù chì i servizii di u Statu, digià belli impegnati in a fasa di preparazione di i cartulari di candidatura, si tenghinu à dispusizione di e cullettività laureate ad accumpagnà le pè a messa in opera di i so prugetti.