Ghjacumu Thiers

Labirintu

Narcisiu, Efisiu, Narcoticu, A Voce

Narcisiu : Puttana maladetta ! Ùn ne possu più ùn ne possu. Fà mi vede à pena issa zucca (Efisiu feghja à Narcoticu)... innò, o stupidò, a zucca di vinu ch’o mi richjarghi à pena a cannella. L’aghju asciuta cum’è un pane d’esca (beie)...

Narcoticu : Allora, o sgiò Narcisiu ? È issa voce ?

Narcisiu : Allora nunda, niente è nulla ! Mi paria di sente è ùn aghju intesu... Mi paria di vede è ùn aghju vistu...

Efisiu : È cum’hè allora, issu spatanscime, issa fiacca, issu suspentime... ùn ete ingucciatu à nimu ?

Narcisiu : (cù l’aria fine è sudisfattu) Ùn aghju micca dettu quessa. Dicia di a voce. Pè u restu, ùn ci hè da lagnà si, ùn ci hè male (si tocca trà mezu à e gambe)

Narcoticu : (interessatu) Iè ? iè ? aiò, aiò, cuntate ? quale era a zitella ?

Narcisiu :  (cù l’aria superba è vantagiosu) Soca voli dì E ZITELLE !

Efisiu : Iè, chì credi tù ? À noi ùn basta micca una, ma duie, ma trè, ma dece...

Narcisiu : Quand’elle ùn sò di più ! Videte quì daretu, s’è vo avete l’imprudenza -a disgrazia !- di entre ci, ùn ci surtite ma’più, ùn ci surtite !

Narcoticu : Ùn cì...

Efisiu (cridendu ch’ellu sternuta) : Salute !

Narcoticu : Ùn ci si sorte ?

Narcisiu : Ah innò po ! Una furesta antica, a ghjente in generale vede tutta altra cosa chè ciò ch’ellu hè in realità ! Chì credi ch’ella sia ?

Narcoticu : Ùn la sò... Vecu un locu fattu di calma, di prufumi, di vapori suttili chì arieghjanu in u contralume. Sottu boscu, ci hè un tempiu di marmeru biancu biancu. È in giru, eccu millaie di acellucci placidi è timiculelli chì innalzanu canti di armunia in l’onore di i nostri dii chì anu fattu a Natura, chì anu fattu A Vita, chì anu fattu...

Narcisiu : Un brocciu ! Cridite mi puru, o zitè, una furesta antica hè un veru burdellu ! Ùn pudete fà dui passi chì vi saltanu à dossu accanite! Trà e ninfe di l’acqua chì vi spuntanu à davanti di colpu, crosce lapide è luccichente, è po e ninfe di e curtecce chì vi scrignanu a risa... è l’altru restu !... quand’è vo passate voi...

Narcoticu (cantendu) : ... ci nasce la calamita!..

Efisiu (interessatu è pensosu):À mè, ùn mi hè mai accaduta...

Narcisiu : Ùn ti lagnà ! un veru burdellu vi dicu ! Ci hè da perde u capu è... l’abbaghju ! Bon ! Allora sò passatu è ad ognuna ch’aghju scontru aghju pacatu... l’impositu !

Efisiu (ammirativu): Chì salute, o sgiò Narcisiu, chì salute !

Narcisiu (versu di falsa mudestia): Ùn ci aghju nisun meritu. Simu o ùn simu ? Noi altri chì simu mezu dei...

Narcoticu : ... è mezi omi...

Narcisiu : Mezu omu sarai tù, o lumbricò ! Noi altri chì simu mezu dei è mezu omi, avemu di nascita a manera di affruntà ogni circunstanza. Ma ci sò i limiti, quantunque !

Figurate vi chì mentre ch’o scurria a voce...

Narcoticu : (da banda)... Hè scimitu : si mette à scorre e voce, avale...

Efisiu : A Voce ? ! È chì voce !

A Voce : A voce !

Narcisiu : Avete intesu ? Sentite ? a sentite ? Hè ella !

Efisiu : Ella ? Ma quale ?

A Voce : Ma quale ?

Narcisiu : A voce !

Efisiu : A Voce ? ! Ma chì voce !

A Voce : Ma chì voce ?

Narcoticu : Iè, chì voce ?

A Voce : Iè, chì voce ?

Narcisiu : Iè, chì voce ? !... (si ripiglia è furibondu), Ma infine, per Atalante chì l’hà in quellu locu è li n’avanza !, a mi avete da fà finita sì o nò ? S’è vo mi interrumpite cù i vostri puttachji, cumu possu fà eiu à cuntà vi ciò ch’ella hè issu capatoghju di furesta antica ch’è no avemu ghjustu quì daretu ! (si calma) Bon ! Allora calmemu ci è ragiunemu ! Or dunque, mi era achjiccatu à pressu à issa vuciaccia ch’è no aviamu intesu tutti è trè (pianta è i feghja un pocu minacciosu

Efisiu : ..!

Narcoticu : ..!

Narcisiu (ùn dicenu nunda è cuntinueghja) : À manu à manu, in una girata trà un’onda è una leccia, chì mi ti vecu in pienu mezu di u chjassu ?

Efisiu : una donna !

Narcoticu : un camione !

Narcisiu : Mancu à pena ! un bidone, un stagnone, quoi ! O piuttostu un caratellu, via, una botte per mette u vinu..., ma senza vinu è chì paria ch’ella riminessi... Era à capu inghjò, u fondu sopra è a cima sottu, è sottu ci era qualcosa chì busgiava... Allora, chì facciu eiu ?

Efisiu : Iè, chì fate ?

Narcoticu : .Hein ! chì face u sgiò Narcisiu ?

Narcisiu : È bè, pigliu è mi fermu sopr’à piazza ! Mi avvicingu pianu, aguantu a botte è a pesu. Disgraziati ciò chì avia fattu ! Ùn avia ancu finitu u mo gestu ch’elle eranu tutte scappate...

Efisiu : Quale, ma quale ?

A Voce : Qui, mais qui donc ?

Narcoticu : Quale, ma quale ?

Narcisiu : In una botte, quale pudianu esse, mansa di gnoccari, stupidoni ! Chì vi anu amparatu à veghja ? E Danaide !? Ùn vi dice nunda a botte di e danaide, spezie di talpe ch’è vo site ! Fate vi cuntà a legenda di e Danaide è viderete chì dunnette ch’elle sò quesse custì. Belle donne ma oh ! s’elle vi mettenu e mani à dossu ci hè ancu da avè i sudori ghjalati !

A più vechja Amimona, una giuvanotta ardita è fiera, un ghjornu ch’ella era à caccia à pressu à qualchì cervu pè isse machje, scontra un satiru incazzitu. Oimè ! Quellu a vede è li si achjicca daretu ! Ella sente u rimore, è po a puzza oh ! - perchè ùn sò s’è vo avete avutu digià à l’erze unu di quessi, mezu omi è mezu becchi, ma oh ! u tanfu ch’elli cappianu in giru, ùn vi ne pudete fà idea !- Allora a zitella piglia è azzelereghja, ma quellu, più andava è più li cullava a voglia ! Allora azzelereghja ancu ellu è piglia l’accurtatoghji ! À un mumentu datu, l’arnese era prontu à inguccià si la, allora ella chjama à Ghjove, Ghjove si affacca, lampa u so tridente, quellu si cala è vene l’arma à ficcà si in un scogliu cum’è questu quì è li face trè tufoni...

A Voce : Trè tufoni !

Narcisiu (versu azezu, à Efisiu è Narcoticu) : Iè, trè tufoni... è da custì, ùn mi criderete micca ma sò zirlati trè fiumi...

Efisiu : di acqua ?

Narcoticu : di vinu ?

Narcisiu : Ma cù quale parlu ! Innò :... unu di muscatu di Patrimoniu, l’altru di Fiumiccicoli !

A Voce : È u terzu ?

Narcisiu : Ballantines, o sumerò ! Servi à tutti chì quessa hè a meia !

Narcoticu : È u satiru, chì hà fattu ?

Narcisiu : U tippu, vistu cum’ella girava, si hà ingullitu u so viziu ed hè scappatu chì in quantu à mè corre sempre ancu avà !

Efisiu : Iè, ma a giuvanotta ?

Narcisiu : Ma chì credi ch’ellu hè intervenutu à fà Ghjove custì ? A si hà incagnata ellu è dopu a si hà lasciata. Dice ch’ella hà parturitu un mostru cù cinquanta capi !

Narcoticu : L’Idra di Lerna ! Scumettu ch’ella hè L’Idra di Lerna ! chì hà cinquanta colli cum’è serpi è cinquanta capi nantu chì facenu gnere spaventose !

Narcisiu : Ah ! mì mì mì, chì principianu à capì cum’ella funziuneghja una furesta antica, una furesta magica, una furesta mitulogica !

A Voce : Oh la prise de tête ! una furesta mitulogica !

Narcisiu :Iè, mitulogica ! Ma, l’altre, ùn mi dumandate micca cum’ella hè finita a storia di u caratellu ?

Efisiu è Narcoticu : Ma chì caratellu ?

Narcisiu : U caratellu di e Danaide !... a botte, per dì megliu !

Efisiu è Narcoticu : ... a botte, per Di Meglio ! ? ? ... Anh ! a botte di e Danaide ?

Narcisiu : Bon, allora, avà sò stancu di cuntà, è po site zucche chì ùn capite nunda, allora tagliu à l’accorta. Bon ! Vi arricurdate ch’elle sò surtite in cinquanta da sottu u caratellu quandu aghju pigliatu è ch’o l’aghju pisatu, u caratellu !

Efisiu : Iè, cinquanta...

Narcoticu : Iè, cinquanta...

A Voce : Iè, cinquanta...

Narcisiu (superbu è pumposu): È bè elle eranu cinquanta ed eiu ... era solu. L’aghju fighjate ad una ad una è li aghju fattu l’amore à tutte e cinquanta è po sò passatu...

Narcoticu (mettendu à impruvisà) :

Ellu passa pè issi lochi

E zitelle sò cinquanta

U tippu po batte focu

L’hà ingannate tutte quante

Una vulia resiste

Si hè piattata in una leccia

Eiu ùn vulerebbe insiste :

Narcisiu... si hà fattu a leccia...

Efisiu (cantendu ancu ellu) :

Omu simule mi stona

Ch’ellu ùn avessi chè cinquanta

Donne n’hà più di sessanta

Narcisiu (cantendu, cù u versu di unu propiu cuntentu di sè stessu) :

Ùn avessi chè sessanta

Saria meza bastunata

Ma u mo core tamantu

Ne hà chjappu una vagunata

Danaide dunque le prime

Scappate da issu caratellu

Mi chjappa u suspentime

Tutte fatte à u pinnellu

Quandu abbracciai la prima

A segonda si hè lampata

È po l’altre, da fondu in cima

Mi sò trovu nudu è spugliatu

Issu ricordu mi scimisce

Dolce cum’è gaspe d’uva

A so pelle liscia liscia

Salita cum’è l’anchjuva

Ùn vi dicu l’altre tutte

Piatte in fondu di a furesta

À ogni passu si futte

Di u sessu hè una festa

(cambia tonu, è ripiglia losciu losciu)

À l’ultimu u troppu stroppia

È mi ne hè scappata a voglia

Sò fughjitu mucatu è stroppiu

Ed eccumi davanti à stu scogliu

(pianta è un pocu cunfusu) :

Voilà ! Scusate ! Mi hè scappata ! Ci vulia ch’ella surtissi ! Scusate ! Hè stata cum’è una chjama... Sò cose quesse, chì... la tradition orale... a puesia impruvisata... u cosu... l’estru pueticu... eccu... enfin voilà !