Narcisiu, Efisiu, Narcoticu, A Voce

Narcisiu (da daretu à a lamaghja) : Ùn ci hè nunda nè nimu quinci per lu Mundacciu arrabiatu ! A Voce hè scappata ma avà, mi li achjiccu daretu è a mi hà da pacà, a mi hà da... ! Eiu mi chjamu Narcisiu è ùn sarà detta ch’elli mi piglinu à a risa cusì faciule ! a mi anu da pacà, a mi anu da... Aghju da move mezu mondu s’ellu ci vole ! Ma l’aghju da truvà ! Spianaraghju l’Olimpu è u Caucasu ma l’aghju da inguccià è fà li la pacà !

(si sente a so voce chì si alluntana in fondu)

Efisiu (vultendu in scena) : Oimè ! chì furia sulenne ! Si ne hè andatu ! Megliu megliu ! Quandu u vecu in collera cusì, hè megliu ch’ellu si tenghi à u largu chè di avè lu à vicinu ! Ùn si sà mai quand’elli sò scatenati cusì ! Smanitteghjanu, erziculeghjanu, zerpiteghjanu : tù passi à cantu è pabà ! ti ne pigli unu in piena fronte...

Narcoticu (vultendu ancu ellu, losciu losciu) : Ai vistu : colla cum’è u latte à u focu ! Ùn sò cum’elli facenu chì li piglia è li colla in capu in un lampu ! Ancu di grazia chì à mè, a Natura mi hà fattu calmu è tranquillu...

Efisiu : Ah, per quessa, u benedica, ùn sì propiu di quelli chì piccianu focu, vai puru ! Cù tè, i spenghjifocu ponu andà à porghje a manu è dumandà a limosina per i carrughji !

Narcoticu : Ùn dì quessa chì ùn hè ghjusta. Sò passiunatu ancu eiu, ma soca ùn si vede... passiunatu à modu meiu. Ùn sò micca per lampà mi à scimesca, eiu. Feghju, studieghju u colpu è mi lampu à l’ultimu, solu quandu sò sicuru chì a femina ùn pò scappà ! L’ai vistu, issu malabiatu cum’ellu si hè ciuffatu in u machjone ! Credi ch’ellu hè cosa chì u face corre ?

Efisiu : A collera !

Narcoticu : U culu ! u culu sì ! hè furibondu chì cridia di inguccià a ninfa è in fatti ùn hà nunda per e mani...

Efisiu : Ma guarda à pena certe volte cum’omu si sbaglia ! Narcisiu passa per unu chì l’amore u face fughje è chì e femine in un certu sensu li facenu a paura...

Narcoticu : Chjachjare dopu cena è fughjichje in sempiternu ! Tutti issi persunagi mitichi, ne aghju per sopra à e ciuffe ! Volenu passà belli è acconcianu sempre a realità pè i so tornaconti. È cum’ellu ci hè sempre qualchì scrivanu leccaculu à l’appollu, ùn fussi chè per buscà si duie baiocche, li scrivenu una bella legenda ch’ella si tramanda dopu a tradizione orale. Invece noi, i puveretti, basta ch’è no faccimu u minimu sbagliu è simu lecchi. Un gestu, una parolla di traversu, basta una volta è passemu per pruverbiu... È cum’è pè i cugnomi... Basta un difettucciu di nunda... Ma cum’hè ch’è tù ridichjuleghji...

Efisiu : Innò, vengu di capisce perchè chì ti si chjama Cuglietta !

Narcoticu : Eh vai à spassu ! Vai chì, s’ella mi riesce, un ghjornu aghju da scrive u librone di tutte e bugie chì l’omi facenu corre da seculi è seculi cù u fine di piattà u mullizzu di ciò chì i move, e so mutivazione più prufonde, cum’elli dicenu. Allora senterai tù a Patria, l’Onore, u Duvere, u Rispettu è tutti quanti !

Efisiu : È puru in quantu à Narcisiu, tuttognunu dicerà ch’ellu hè u mudellu di e virtù maschile è di l’amore di sè stessu. Ùn tene caru altru chè sè stessu è disprezza qualsiasi amore. Un bellu giovanu... vittima di una cundanna murtale : era scritta ch’ellu saria innamuratu di sè stessu...

Narcoticu (stumacatu): Un bellu giovanu !

Efisiu : Ammiratu è tenutu caru da tuttognunu chì u vede, sia donna sia omu...

Narcoticu (stumacatu): Ai vistu! Quand’ellu affacca ellu nasce u scappa scappa !

Efisiu : Dici cusì ma i miti, a legenda...

Narcoticu : ... a merenda, sì ! Merenda, pranzi è pranzetti ! tutti manghjoni, tutti furdani ! a vuluntà di passa bellu è di ficcà ci la oghje, dumane è per i seculi di i seculi !

A Voce : Amen...

Narcoticu : Oh oh ! Ai intesu ?

Efisiu : È cume ! (parla à voce bassa) Stà à sente : femu quelli chì ùn anu intesu nunda è cuntinuemu à chjachjarà, è tuttu chjachjarendu quandu ti facciu cennu, ci lampemu à dossu tremindui à tempu...

Narcoticu : (à voce bassa) Iè ma chì segnu ? chì signale ?

Efisiu :  (à voce bassa) Aspetta ! U signale sarà quandu dicu : « Purteremu in pienu lume

Issa voce è u so ribombu » Ai capitu ?

(Narcoticu li face segnu di sì è mettenu dinò à parlà à voce alta)

Efisiu : Quandu pensu, caru Narcò, à tutte ste fureste, à sti monti è à sti fiumi, mi sentu cullà l’estru pueticu in pettu :

Quandu vecu sta furesta

Aghju in pettu u veranu

Tandu cacciu la mo vesta

A frumbuleghju luntanu

Sò cum’è cane di arrestu

Chì annasa a tramuntana

(cuntinua Narcoticu)

Quandu ci colla à la fronte

A vampa di u vinu novu

Si abbughja u nostru orizonte

Simu pieni cum’è l’ove

L’alba ci pare tramontu

Eo tracorgu è tù ùn ti movi

(cuntinua Efisiu)

Tandu, à francà un fiume

Chì ci hè bisognu di ponte ?

Legeri cum’è piume

Curagiosi cum’è à u fronte

Purteremu in pienu lume

Issa voce è u so ribombu !

(lampanu in pianu e lamaghje è si scopre solu un scogliu. Un scogliu stranu)

Narcoticu : Aù ! Ùn ci hè nimu, ùn ci hè ! Mi pare propiu un incantesimu una magia, ci sarà passatu qualchì innuchjatura ! Mamma ! o Narcò, eiu quì, ùn mi sentu tantu bè, à dì la franca ! Ùn sarà megliu à vultà ind’è lochi più... più... menu... strani, menu salvatichi !

Efisiu :È chì tante magie ! Sarà qualchì fullettu burlascone chì ci hà intesu è chì face e voce cusì, da ride si di noi... Alè, o maè ! Sorti di quì, è prestu mì ! chì ti avemu sculinatu ! Sors de là, tu es refait mon gars !

A Voce : Tu es refait mon gars ! (si sente un fremitu in i frundami)

Efisiu : Iè, grachja grachja, o curnachjò, ma fà ti vede una volta (i frundami si movenu : qualchissia si avvicina) Anh anh ! Ai vistu, o Narcò, cum’è lu ci vole à parlà li à e soi-disant streghe ! Alè, fà ti avanti o cumpagnò !

(I frundami si scartanu. Surpresa : affacca Narcisiu in persona, malandatu, stracciatu, sfiatatu. Piglia è si lampa in pianu davanti à i dui altri, attuniti)