E tui a fai luxi

a pustis est arribada sa morti

a s’edadi mia toccat a essi sempri prontus

i’ nais tendint a terra grais

stibbadas in sa distanzia de casi unu silenziu

ma est aintru chi murmuttat sa cuscienzia

de s’acabu - diaderus non seus mai prontus

in totu - sa vida stremèssiri comenti aintr’e una rezza

si trobeddat in dd’unu nienti su cabudu estremu

su suìdu, est aici chi s’intrat in sa storia

ripitiri a boxi arta is urtimus fueddus de su liburu

sa pregadorìa chi segundu is intenzionis

depit lompiri a su scopu umili e schetta

coment’est schetta sa morti chi benit a si ndi pigài

non promitiri nudda prus de sei e totu

e intamen ghettat tribulìa in is aquas asselias

perda chi revelada su giogu de is circulus

aintru di aundi si cundulit totu sa vida nostra

giai cun totus is frunziduras de i’ beccius de scontai

deu femu nai de un’ollastu innestau cent’annus fait

e òi ala truncada comenti ossus

m’hanti limpiàu is ainas de maistru Sciola

immoi seu s’immagini de Gesus Crocefissu

- atera olìa - appiccau a custa gruxi

e tui ses s’ollu ermánu chi benit de su fruttu

miu de candu fia tambèni arburi biu

e seus torraus impari in cust’artari :

deu pesau po sempri

e tui a fai luxi