Lolghi di fumu.

Chi pena l’ultima sera

chena una stella ancora !

Di soli l’ultima spera

s’è ispinta mori mori

und’abà no s’aspetta

da l’umbra paci sinzera,

illa carrera, fora.

Malincuniosu un zigarru,

chici, abali, lacatu

a banda, sminticatu

come spola di tela,

fraza una brasgia stena

e a l’appusentu rigala

lolghi di fumu in bolu,

cu la flema liceri

d’un lumu di candela.

Diventani, chissi lolghi,

specchju suai d’ammentu

cun magghjni sculuriti

di tempu di ‘ita in fiori

turat’a lu pinsamentu ;

di momenti sireni

d’anni d’etài minori

di li tempi passati,

cun richjami d’amori

guduti o sunniati...

Ansii di solti middhori

in ameni ‘isioni

e timpesti finuti

a ali infusi calati.

Ma invanu cussì s’agabba

di cinnara in tristu cunsumu

lu zigarru cadutu

da manu scunsulata

d’un vacchju chi prisumu

altu no ha che d’un sonnu

abali, a capu appugghjatu

a l’azza di la banca,

in signu di dà paldonu

pa’ tuttu lu chi li manca.

Giulio COSSU