Paghjella chì ne veni

da l’Oriente eternu

nata quale hè chì sà

da chì lettu maternu

arrembatu à chì voce

o nantu à chì quaternu

da fà lu cantu altieru

è liatu è fraternu

Paghjella chì viaghji

è ne franchi frontiere

di lochi assulanati

è di terre primiere

di paesi landani

è di centu manere

di piaghje à vista d’ochju

è di muntagne fiere

Paghjella chì ne sì

da luntanu venuta

è barcati li tempi

cù la voce tenuta

appesa à lu to filu

di memoria minuta

da ch’ellu ùn scordi u core

per ùn fermà ne muta

Paghjella ti ne sì

un ghjornu à lochi arcani

di a gloria passata

è di l’eroi anziani

à latu à fiume Bussu

calata in stretti piani

chì sottu à Santu Alesiu

t’accolse l’Alisgiani.

Ghjacumu FUSINA