Cunversa

Ghjirald’Antone Antoni (natu in parighji in u 1963), hè u figliolu di Petru Antoni, u scrivanu cruzinese. Prufissori di filusufia in Angulema, ha fattu i so armi ind’è a Scola Nurmali Superiora di Parighji (Ulm). Duttori di Filusufia, spicialistu di Sant’Austinu, hè l’autori di La Prière chez Saint Augustin, D’une philosophie du langage à la théologie du Verbe (Editions Vrin, 1997)

Francescu-Micheli Durazzo (natu in Parighji in u 1956). Allevatu fora di l’isula ma in relazione permanente cù ella, Francescu Micheli Durazzo à l’ultimu hè statu quasi trenta anni senza vultà ci. Pè u più si hè datu à l’opera di traduzzione literarie in parechje lingue rumaniche ( (catalanu, corsu, francese, galizianu, purtughese, spagnolu è talianu) … ).

Agregatu di lettere classiche hè prufessore in Prima Superiore in Angulema. Trà altru, hà publicatu una racolta di puemi ; Finitarri (Albiana, 2002) chì hè tradutta in Finisterres (La librairie bleue / Le Noroît, 1998).

O amicu littori, v’eccu u chjama è rispondi di un paghju di amichi, tramindui nati in issu cuntinenti tramindui pruffisori in Angoulême, l’unu, Francescu-Micheli di reffica sartinesa, è l’altru, Ghjirald’Antone, urighjinariu di u Cruzinu è fiddolu di Petru Antoni, l’autori di Detti è fatti è U paciaghju. Ùn ani mancu stampa a pratizioni di insignà à calchiadunu comu è ciò chì ci voli à pinsà annantu à certi cuncepiti. Innò ! D’altrondi quand’è si campa for’ da l’isula, comu schisgià i  rapprinsintazioni sbagliati ed i stiriutipa. Masò corsi ed iddi dinò si scialani raghjunendu è vanaccendu annantu à l’isula, a so storia ed u so sviluppu. Allora, non piddà li troppu à u seriu, ch’iddi dicini a soia senza primurà si di nimu è di nudda, è s’idda ti po’ ghjuvà, bona…

Francescu–Micheli Durazzo – Semu avezzi à pinsà l’identità corsa in tarmini di rilazioni incù a tarra – di duva socu ? – è a famidda – di quali socu ? –, senza veda bè sempri comu s’intrecciani l’essa, a quistioni untulogica, è l’essa à u mondu, vali à dì u cunflittu trà l’eiu ed a polis. In certu modu, l’omu corsu ùn saria mossu trà sti dui tarmini, com’iddu l’era Socratu, spartutu trà u so daimon ed i dei di a città ?

Ghjirald’Antone Antoni – “If should die, think only of me, that there’s some corner of a foreign field for ever England.” Scusa mi, o Francè, di principià incù u versu inglese : u pueta Binyon scrivia què qualchì ghjornu nanzu di esse sfracicatu in a cianga di l’Argonne. Quellu Tommy di u 1915 ci pò aiutà à capisce chì l’identità, isciuta da u filachju di i seculi, ci parle sempre di a tarra, senza puru esse schjava di u locu sputicu. Ancu sradicatu è lampatu ind’ì l’infernu di a guerra, Binyon trascine cun ellu a so identità è, ancu, face soiu u campusantu o l’arca cumuna induva ellu sarà sepoltu. L’identità supraneghje i lochi ma esce da un fundamentu lucale, un hypokeimenon, micca da a cità è nemancu da un sistema puliticu. Parli d’ontulugia : à u primu sensu, quella sarà una rilazione, un scambiu trà l’omu è a tarra sgranatu da un seculu à l’altru. Semu luntanu da un “cuntrattu suciale” o da l’ideulugia di a polis. Crergu chì u cuncepitu di polis, cum’è fundamentu di u sintimu di l’appartanenza à un populu, in Corsica ùn hè mai pussutu nasce in tuttu: u nostru daimon cum’è tù dici, hè una funa chì unisce l’eiu à a so famiglia, viva è morta, ligatu à a lege nun scritta d’una figliulanza carnale è spirituale. U capiscianu Ceccaldi è l’altri, aduniti in a cunsulta di ghjinaghju 1735, in Pedicroce : “Regina di a Corsica, Madre universale, Maria.” L’ontulugia rilighjosa di l’Incarnazione campe prima, davanti à i scopi pulitichi. L’idea di polis, ci vole à trae si la, dopu, da i ciarbelli: da una vulintà d’esse populu, di fà si populu... “À populu fattu !” U scopu di l’avvene. Oghje l’essenza ùn hè ancora pulitica.

F. M. D. – Sionti tè, u vinculu suciali à u sensu più strettu di a parolla, vali à dì, u liamu di sangui trà i membra di una comunità ed u sintimu di appartinenza à una tarra sariani cusì putenti chì ùn ci saria mai statu versu ch’iddi si suttumissini à u drittu chì in i stati moderni supranighja tutti l’altri vinculi suciali ? O pensi piuttostu chì a leghji ghjunta da u cuntinenti, una volta da l’Italia, dopu da issi Francii, ùn hè mai stata capaci di piddà u subra ind’è no parchì, ghjustu appuntu, venia da fora ? In somma comu iddi s’intrecciani, à u to parè, i caghjoni strutturali è storichi ? D’una altra banda, ci vurria à spiecà parpena ciò chì significhighja pà tè l’incarrazioni in stu cuntrastu annantu à l’identità ed a polis.

G. A. – O Francescu-Michè, a ti possu cuntà una struvula ?

Ind’ì tempi, un merru d’un paese di U Cruzinu vulia caccià sciotte è porci da i chjosi è da e lenze cumunale. Avia datu tandu, impiegu à un ufficiale per assicurà l’ordine novu.

– O Ghjasè, ùn ai chjappatu mancu un animale, sti ghjorni scorsi !

– Mancunu !

– È issa ghjumenta ind’i castagni di Sarra Piana ?

– Iè ! Ma quessa hè toia, o sgiò Mè !

– For’ da quì ! L’impiegu sarà per un altru.

Cerca lu l’altru ! Oghje, hè sempre listessa cagnara. A vulintà pulitica pò nasce è rinasce per assicurà u drittu, ma si sdrughje prestu.

Prima spiegazione : Da partuttu, u drittu hè una fola, un bellu intrecciu litterariu di regule, un carnavà, –“larvatus prodeo !”–. A regula universale hè quessa : “quellu chì t’hà soldi è amicizia, torce u nazu à a ghjustizia”.

Seconda spiegazione : In Corsica sputicamente, u drittu è a dimucrazia ùn ponu arradicà si. Perchè ? Parlendu di u sangue, l’unica forma chì dà struttura à a sucetà corsa, ghjè a famiglia. Ogni famiglia ritene a suvranità. In Ripublica, issa suvranità sarà a premincizia di u Statu ; in Corsica ella tocche à a famiglia. E vindette eranu guerre dichjarate trà famiglie. I vedi, i trattati di pace, firmati in ghjesgia, sottu u ribombu di i Te Deum.

Aristotile dicia chì a cità cumence cù a famiglia, è chì, da un circulu à l’altru, si franche pianamente è bè da a famiglia à a tribù, da a tribù à u paese, da u paese à a polis. In Corsica, stu passu ùn s’hè mai francatu : ogni cumunità naturale si ferme à a tribù. A Ripublica ùn pò esse cà un appicciu artificiale, un sistema appughjatu da fora. Mi diciarai tù, chì i Corsi anu u ghjocu di a pulitica arrabiatu ind’ì cive. Iè, maquè ùn hè “l’assunta” di l’affari dumestichi, ingrentu à u Bè Cumunu. Piuttostu, u bè dumesticu di e famiglie s’intoppe, si manghje, s’ingolle a lege urdinata prima à u Bè Cumunu.

Sè d’accunsentu o Francescu-Michè per dì chì u spiritu di a polis, “l’isonomia”, l’equalità di tutti sottu à una legge cumuna, ùn hè ancu natu in Corsica ? O allora s’ellu ci hè, ch’ellu sarà “incarnatu” ind’ì leami di u Sangue ?

F. M. D. – Ùn ti la possu dì, o Ghjirald’Antò. Hè bella faciuli, pà nò chì campemu in issi Franci di parlà cusì. Tuttu ciò ch’è tù dici era virità, forsa, in a Corsica di tandu. Forsa l’anticu spiritu di suvranità di a famidda, à u sensu clanicu di a parolla, ùn hè mortu in tuttu, a’ a raghjoni tù, ma a leghji francesa, ancu imposta da fora senza l’accunsentu di i Corsi stessi, hè a sola leghji chì ci pruteghji da a viulenza, masimu in u cuntestu ughjincu di dibulezza di i valori tradiziunali. Duranti a prima verra mundiali, chì lacò, com’è da partuttu ind’è u cuntinentu, tanti veduvi è tanti urfaneddi in ogni paesi corsu, c’era una adisioni sincera, soca, di i Corsi à u Statu francesu. Ci sò tanti provi di st’amori : par un dittu, tù credi ch’è no i Corsi avariamu straziatu tantu pà impadrunà ci di a lingua francesa è sacrificà a noscia, s’è ùn ci fussi statu un accunsentu sinceru à i valori di a Ripublica ? È quanti impiegati, masimu funziunarii di pulizza, ci sò stati ! A storia hè cumplessa, ci sarà forsa in ogni famidda u sintimu fundiu è schjettu chì i liami di sangui sò più forti chè a leghji, è chì à li volti ci voli à scedda trà a leghji francesa è a noscia tradizzioni. Ed ùn parlemu di a vindetta, chì sionti mè al di là di una tradizioni, hè unu statu di cunflittu, di verra chì pò fà smarriscia in tuttu u rispettu di a leghji, ma parlemu di i conflitta più cutidiani trà tradizioni è leghji com’è, par un dittu, tuttu ciò chì circonda à a morti, mumentu forti di a vita collettiva. In Corsica ci piaci à mora in casa. Mora fora, in ispidali veni à dì privà si di a veghja, di l’anori duvutu à u mortu da u paesi. Quanti volti l’ambulanzi ani purtatu i morti à u spidali in casa, faccendu neci ch’iddi fussini sempri vivi, pà pudè dichjarà ch’iddi erani morti in casa è lacà à a famidda goda di stu ultimu mumentu. Baddatadori, ùn ci n’hè più, ma ci ferma què, mi pari. Allora, accunsentu à a leghji francesa, ci hè, ma ci vurria ch’idda ùn fussi micca cusì sticchita. Crergu chì u cunflittu ughjincu di i Corsi incù a leghji, postu chì altra ùn avemu micca, hà cambiatu pocu è pocu è ci si pò pruvà à spiecà parchì : prima, semu ghjunti cusì luntanu in u prucessu di assimilazioni chì andà più in là saria forsa piddà u risicu di perda si in tuttu, siconda, semu com’è l’altri Francesi cuntinentali in un mumentu di asaltazioni di i valori individuali, di sbrisgiulera di u rispettu ad a leghji, ma ancu ad i ghjinitori è a famidda, mi pari. A noscia leva parpena pudia fighjulà u babbu in faccia, ramenta lu, quand’è ci bravaia. A vedi, semu passati da a filusufia di u drittu à un parè più suciulogicu. Allora, o Ghjirà, dì mi parpena quali sariani i cundizioni, micca tantu di l’adisioni, chì accunsentu ci hè, ancu s’iddu hè debuli, ma di una nova adisioni di i Corsi à a sucietà civili, aiò ! dà ci u tò parè di filosufu.

G. A. – Nanzu di parlà di l’adesione nova à a cità di dumane, vularia accunsentì à i to dì nantu a lealità di i Corsi versu a “Nazione Madre”. Gaston Vuillier cuntava chì, sintendu l’affare di Sedan, l’Aiaccini avianu cridutu à a vittoria è andavanu in prucissione ind’i carrughji, scemi di gioia ; subitu dopu, s’affaccò a nova di u straghju è di lu disastru militaru. Lascendu cascà e statule è e bandere à meza stretta, i prucissiunarii si sparghjonu, lintendu stridi è ballatendu vòciari. Elli, murianu cù a Francia vinta è murianu dinò cù a morte di l’Imperatore Nabulione, u nipote corsu. Chì vene à dì ? Chì l’adesione di i nostri babbi incù a nazione francesa hè stata cundiziunata à una ricunniscenza, micca quella di a riescita di a parsona chì intoppa l’impiegu, per manghjà u pane di u guvernu, mapiuttostu, a ricunniscenza d’esse chjamatu tra i primi di i zitelli di a Francia : “Travaglia bè in iscola, per esse un sapientone è per divintà un impiegatone !”, dicia a minnana, alliscendu u so figliulinu. Nabulione hè statu u mudellu per “l’adesione”, adesione cundiziunata à a gloria militara, pulitica, universitaria, almenu à a sicurezza di l’impieghu. À l’arritrosa di l’identità sputica, pocu disprezzata, sarà l’alterità anorata cum’è un segnu d’alizzione, chì stabulizarà l’unione di l’omu corsu incù a “Marianna”. Per dumane, l’adesione ùn sarà più quella. Prima, l’identità francesa si sdrughje ind’a mundialisazione, quella di l’Uriente o quella di l’America. Dopu, l’identità corsa, ella stessa, in puntu di more trent’anni fà, s’hè svighjata, ma l’individualisimu, i cambiamenti ind’ì a famiglia, aprenu altri riti : cum’è tu la dicii eri, i morti à u spidale eranu purtati in casa soia, pusati in vittura cum’è vivi, per pudè gode l’anori di a veghja. Oghje anzi, morti in casa, elli sò accaminati à l’appiatattella in trasportu sanitariu versu à u spidale. Omu ùn vole più veste i so defunti, nè incaricà si di a veghja. Ancu a liturgia, cacciatu u Dies irae è u Miserere, a si face à fughji fughji. Pianu pianu, sicondu l’usu di e sucetà muderne di u Punente, si cumencie ancu à piattà a morte. A ghjuventù scopre a cultura nova di u 4X4, ma, arradicata ind’ì a vulintà più chè di natura ind’ì a tradizione, cuncipeghje pratiche chì riflettenu una mitulugia di u passatu. E cunfraterne di Pasqua in Carghjese, chì alzenu fucili sopra à camisgi bianchi, tistimunieghjenu di u sognu d’esse, d’una vulintà di ritruvà un’identità ideale, mischju di a croce è di u stilu, cum’è un ribombu da un seculu à l’altru, di i Franciscani suldati di Paoli. Mudernità induva l’individualità supraneghje l’altri valori, è mitulugia chì invente torna un’identità persa : eccu i dui puntelli di l’adesione nova à a cità, quand’ì a polis divente l’urbs.

F. M. D. – S’e ti capiscu bè, o Ghjirà, pensi ch’è stariamu in un mumentu di crisi di a tradizioni. A ghjuventù saria spartuta tra i valori di u mondu ughjincu è quiddi di i nosci maiò. Vali à dì a cultura tali è quali a scoprani ind’è i mezi di cumunicazioni è a reti, quidda ghjunta da fora : a musica, u sinemà, a literatura è certa rapprisintazioni di a manera di campà di i nosci maiò, idealizzata è piena à stiriutipa, forsa quidda chì ci veni ancu in parti da a maghjina ch’è i nosci antinati ani lacatu ad i viaghjadori di u seculu scorsu. Si tratta da veru di una crisi è com’è ogni crisi, faci nascia manifestazioni ibridi. Pensu à a musica di i Muvrini, chì cerca di marità a noscia paghjella incù ritimi è strumenta frusteri. I ghjovani si ricunnoscini in sta nova cultura, mischiata. Inveci, essa propriu francesu, com’iddi pinsaiani i nosci maiò, ùn hè micca pà i ghjovani unu scopu da bramà, parchì sò assa’ più francesi chè quiddi. Quali sò i ghjovani chì ani imparatu à parlà corsu nanzi à u francesu, in carrughju o in famidda ? S’è voli bè, vultemu à pena in daretu da circuscriva meddu a difficultà di razza in l’adisioni à a cità com’è ci hè stata imposta, è, par piacé, ùn abbiimi a paura di dà di pettu à quistioni chì, ind’è no, facini ammurscià si. Culturalmente, u riatticamentu di a Corsica à a Francia hè una di sti scimità, mi pari, di a storia com’è ci ni sò tanti. S’è Ghjenuva ùn fussi stuppiciata da a Corsica – ch’è in rialità ni avia persu u cuntrollu –, quista a noscia isula avaria suvitatu forsa u prucessu di l’unità taliana centu anni più tardi ed i Corsi ùn sariani menu filici di essa taliani che i nosci vicini sardi o siciliani. Ma i fatti ci sò, vulenti o nulenti, i Corsi si so affidati in modu massicciu, com’è ghjustappuntu a dicii nanzi, à i Francii di i dritti di l’omu è di a rivulizioni. D’altrondi, in l’anni sissanta sittanta, eramu in piena sculunizzazioni, da una altra banda l’Auropa cunnuscia unu sviluppu acunomici mai vistu prima è i Corsi ebbini u sintimu di avè arti di sicuru, ma senza avè a so parti di u pasticciu. Quanti si n’andoni, propriu com’è i nosci bapa, in issi Francii da buscà da mari culandi calchì travaddu, da buscà travaddu o divintà impiegatu, propriu com’è l’atri stranieri, Purtughesi o i Magribini. Dopu sò ghjunti i pedi neri è ci hè stata l’affari d’Aleria… Via, ùn si pò sguassà duicenti anni di storia ! Ma ciò ch’è oghji ci voli à invintà turra, saria un versu di essa francesu, ma chì ùn fussi quiddu di u Statu ghjacubbinu. Forsa pudemu fà st’ipotesi ch’è l’accunsentu ad a leghji è ad a cità ùn hè mai statu chjaru in tuttu, schjettu è libaru di malintesi. U Statu ghjacubbinu, sinu ad avali, ùn hà sapputu imaghjinà che un’arti sola di essa francesu. Ciò vinia à dì a riduzzioni di i diffarenzi trà i cumpunenti di a cusiditta nazioni francesa, incù u ricusu di i so lingui, cunsidirati com’è patois da disprizzà o pruibiscia, mentri altrò, par un dittu, in Ispagna o in Italia chì ni l’unità hè stata rializata l’una, nanzi à u seculu di i luci, l’altra dopu, ùn si hè mai vistu, for’ di i parentesi fascisti è naziunalisti, sta macula di u cuncepitu di univarsalisimu accunciatu à l’idea di populu. A viulenza hè sempri da schisgià, ma ci pudemu dumandà s’è ùn hè stata a viulenza à puntà i menti cuntinintali à maturà duranti st’ultimi trent’anni. In u cuntinentu, omu s’hè avvezzu à adimetta ch’è a Corsica era un casu spiciali è micca solu una provincia com’è l’altri. Sta cuscenza nova asisti, ancu sì l’omini pulitichi cuntinentali ùn poni ed ùn sani parlà di “populi francesi” à u plurali, chì saria francà un novu rubbiconu. Questi quì sentini attacati à una ripublica “una ed indivisibuli”. Masionti me, a ripublica pò cuncipì si in modu plurali, puri firmendu unita. Essa, parlà, pinsà in corsu, campà in mezu à dui culturi, tuttu ciò cheri a cuufficialità ed, ancu assà, ùn faci mancu stampa corra u risicu di l’indipindenza. I Svizzeri chì parlani quattru lingui si sentini uniti, malgradu à i so diffarenzi. Semu ghjunti à a scimesca à una situazioni tali ch’è, s’iddu si urganizessi un referendum annantu à l’indipindenza di a Corsica, quali a sà s’è u cuntinenti ùn ni saria più a favori chè i Corsi stessi. L’accunsentu fundiu à a leghi, chì ni si parlaia à l’improntu di u nosciu cuntrastu, hè liatu, mi pari, à l’idea di cuntrattu suciali. E ùn si hè mai chertu à i Corsi, soca, di signà un cuntrattu tali. Quindi, mi chergu eu sì l’accunsentu ed a rilazioni incù a leghji sariani tantu più forti, s’è dumani a Corsica vinessi ricunnusciuta com’è populu libaru di parlà a so lingua e di campà in a so cultura. Bedda sicura, hè solu un’ipotesi, micca una brama, chì quiddi chì campani fora com’è no, ùn ani nisciun dirittu à dà lizzioni à quiddi chì sò firmati à u paesi. Ma ùn smintichemu la, semu à l’ora di a mundializazioni, a Francia stessa hè custretta da i so liama incù l’Auropa ed idda ùn faci sempri ciò chì voli. Dì mi par pena u to parè annantu à u cuntratu suciali. Quali sò i tarmini di u nosciu cuntratu cù u Statu, sionti te, for’ di i sentimi d’amori è d’odiu chì ani sprimatu sempri i Corsi versu à a Francia, è dopu dì mi ciò ch’è tù pensi di u cuncepitu di innucenza, in casu di ricusu di a leghji.

G. A.– O Francescu-Michè ! Ti ne arricordi ciò ch’ellu dicia Jean-Jacques Rousseau ? U Cuntrattu Suciale ghjè a nascita da e forze individuale spaperse d’una parsona cullettiva, un corpu puliticu novu. Ogni citatinu cuntratante ùn s’appartene più, ùn hè più soiu ; perde a so “libertà naturale” per accede à a “libertà civile”. Quellu ch’ùn vole entre, sarà “furzatu à esse libaru”, dice Rousseau. Què ghjè una logica di tarrore, aduprata, dopu, da a Cunvinzione per mantene u putere di u “Populu Suvranu”. U citatinu chì ùn si dà d’accunsentu, si rende numicu di u populu sanu. Ghjè una criminalizazione di u ghjudiziu criticu individuale. Tandu, u cuntratante leale, ancu s’ellu lampa a petra cù l’altri per ammazzà u “traditore”, sarà sempre innucente : “a viulenza mimetica”, cum’ellu dice Girard (in A Viulenza è u Sacratu), unisce a cità sana contru à u “beccu missariu”. Eccu a radica di u “cuntrattu suciale”.

Per perde a sò innucenza, ci vole à cunnosce è sceglie u bè da u male, apre u sò ghjudiziu faccia à i puteri è e parsone. Quellu chì si sà rispunsevuele ùn hè più ind’ì l’innucenza main tarra d’etica. Quella etica hè cuntrattu da sè à sè, da a raghjone à a norma di u bè naturale impresa in cuscenza, cuntrattu incù a polis, micca u Leviatanu, l’ammostru hobbesianu, nè u corpu culletivu di Rousseau, maa polis d’Aristotile. In ella, a sucietà muderna pudaria ritruvà a sò chiave : s’eiu possu traccià cù u steccu nantu à a rena, diciaraghju chì u cuntrattu tutalitaristu da Hobbes à Lenin, sicondu a metafora di Hanna Arendt (Crisa di a Cultura), si pò paragunà cun una civolla : caccia a prima buchja, a siconda hè listessa, ancu a terza... tutti i rughjoni di a società sò mudellizati sottu a listessa ideologia statica ; ogni citatinu hè militante ufficiale di u partitu. Invece a polis hè cum’è chjerchjuli cuncentrichi, u più chjucu à u centru ghjè a famiglia, cità piccula, microcosmu di a maiò, dopu u razzinu, u paese, a cità : invece chì u totalitarisimu ammazza a famiglia, a polis lascia à u nodu famigliale u sò funziunamentu sputicu è a libertà di tramandà i so valori frà l’educazione. Si diciaria cun Aristotile, chì a famiglia ghjè u paradigmu di u Statu. Ogni guvernu sarà appughjatu à u mudellu di leame famigliale ; a dimucrazia incù l’amicizia trà fratelli, a munarchia incu l’autorità di u padre. Dunque, a cità si face sicondu a struttura di a famiglia ; s’ella si sdrughje, si sdrughje a cità ; a lege di u bè cummunu, impresa ind’u drittu naturale, sarà disprezzata cum’è l’autorità di i parenti, di i “sen-ze”, cum’è dicenu i ghjapunesi, “i primanati”. Platone vidia u scumpientu di a dimucrazia ind’è a vargogna di l’anziani, di i parenti, di i maestri faccia à a ghjuventù ; quandu l’autorità si face vergugnosa di sè stessa è chì i so capimachja tremanu di paura davanti à sculari è ghjovani scrianzati, a cità s’accammina à caternu. I chjerchjuli di a famiglia, di a ghjustizia, di u drittu publicu perdenu tutti inseme u so ordine.

Eccu ! Allora cun u ritornu à un’innucenza chì hè niscentria edonistica : ponu more i vechji assiccati da a sciappitana, soli in casa soia senza mancu un vichjere d’acqua, a leva nova in vacanze si primureghje più di “livellu di vita”. Ùn hè gativezza di core, pò dà si ch’ell’ùn sarà chè smintecu è sturditezza. Madi issa niscentria, nè semu rispunsevuli, ghjè una scelta suciale di u piacè individuale sopra à l’altri valori. L’Africani ghjunghjiticci in Auropa sò sbiguttiti è scandalizati di vede l’anziani cusi abbandunati è soli, chì ind’ì elli i soi morenu tutti in casa, circundati da l’affezione di u parintatu.

Eccu lu u primu cuntrattu suciale, u veru, chì tene primura di a parsona. Chì nè sarà di a Corsica dumane ? Dimu chì e so radiche cattoliche è latine avaranu un pocu ammattatu i disguasti di issa crisa.

F.M.D – S’è ti capiscu bè, o Ghjirà, u cunflittu mezu da u Statu francesu è a Corsica t’avariani una di i so radichi in a diffarenza fundia di natura mezu da u cuncepitu di polis, arradicata ind’è a famidda – quissa saria a noscia tradizioni miditarrania – à un cuncepitu di cuntratu suciali, chì nega a famidda è ublighighja à l’omu à cunsidarà si com’è citadinu, nanzi à un fiddolu, un maritu o un frateddu – è quissa saria a tradizzioni francesa isciuta da a filusufia di Rousseau è a Rivuluzioni francesa. A sbrigiulera di a famidda duranti sti dui seculi scorsi forsa saria duvuta à u fattu ch’è pocu è pocu l’anticu cuncepitu di polis si saria sguassatu davanti à l’imposta tiranica di u cuncepitu di cuntratu suciali. Ma ùn impidisci micca ch’è sta cuntradizzioni fundamintali ùn sighi puntiddata da altri caghjoni. L’emu vista, a noscia storia hè mori cumplessa, eppò a noscia cultura sputica ùn hè micca quidda di i Francesi in ghjinirali. Ciò ch’è si pò veda avali, mi pari, saria una altra uppusizioni, quidda mezu da u cuncepitu d’Auropa – ed ancu di mundializzazioni in tarmini macrocunomichi – à u cuncepitu di rughjonu in tarmini microcunomichi. Incù a crisa di sti ultima vinti anni, ci semu abbadatu ch’è spessu i suluzioni lucali erani più ghjuvativi, ch’è a pulitica lucali è a diccintralizzazioni pudiani cuntribuscia à u binistà di i populi meddu ch’è u statu centrali chì spessu guvarna à a cechesca. Ùn sarà ch’è guattu guattu s’intrudusci l’idea ch’è u cuncepitu di polis, tali è quali u difinii nanzi, devi supranà quiddu di cuntratu suciali à la Rousseau ? Forsa pà buscà una nova virsura di cuntratu suciali, arradicata in i chjerchi di a famidda, u paesi, u rughjoni, è cet., dunca in a cultura lucali ? In issu mentri, ci hè statu prupostu à i Corsi una nova virsura di unità tarrituriali, forsa u prima passu, micca versu à l’indipindenza, ma versu à certa autunumia chì ci ublighighja à piddà i nosci rispunsabilità di pettu à l’avvena cunomicu è culturali di a Corsica. Ma l’alizzioni ani palisatu a paura di scambià u liamu incù a Ripublica Pà compia stu chjuccu cuntrastu filusoficu, di mi u to parè à nantu à stu particulari, è di mi parpena, comu vedi u nosciu avvena.