InterRomania avia in core di fà vi cunnosce appena di più st'"essere" di l'attivisimu culturale. S'ellu si face discretu assai, Guidu Benigni ùn manca d'arricchisce tempu ch'ellu pò l'edifiziu di a pruduzzione literaria corsa. Sia da sè stessu, sia fendu participà à l'altri, e so pruduzzione venenu numerose, curate è impuntellate cum'è di si dè. Chì u so travagliu, spressione di una passione stizzosa, hè di qualità ùn simu micca noi à dì la, ma sò i so pari chì, pocu tempu fà, anu sceltu di dà u prima premiu di u libru corsu à un so libri : "Amadeu u Turcu".

Guidu Benigni hè natu in Marseglia in u 1931. Hà fattu carriera à l'armata cun parechji sugiorni ultramarini in ciò chì fù a Culuniale, da u 51 à u 75. Passiunatu di cavallina, s'hà datu, pigliata a ritirata, à a creazione di l'Associu di Turisimu à Cavallu Corsu è à a sparghjera di issa attività chì l'à permessu di girà a Corsica sana. Militante culturale, s'hè datu à a scrittura à prò di a lingua nustrale. Premiatu à u cuncorsu di nuvelle di a Biennale di Prosa Literaria Corso Sarda, in Ozieri (1996-1997) cun "A mula di Ciccolu" (in Vicini, Albiana/CCU 1998). Selezziunatu per u Premiu di u Libru Corsu, cù "À cavallu" (Sammarcelli, CCU 1999). Pueta, favulistu, traduttore, participeghja à a rivista literaria di u Centru Culturale Universitariu : Bonanova. "Amadeu u Turcu" publicatu à l'édizione ALBIANA hà ricevutu in u 2002 u premiu di u Libru Corsu.