Eccu duie infurmazione nantu à a Biennale di l’Isule. À e prossime messe à ghjornu vi daremu di più nutizie in modu più è urganizatu. Prima di tuttu, diceremu chì u risultatu glubale ci porta un incuragimentu à cuntinuà, à sparghje è à fà cunnosce a nostra iniziativa. I risultati cunnisciuti in stu mese di marzu sò questi quì :

- A ghjuria di E Baleare presiduta da Albert Herrantz (Palma) hà attribuitu un premiu à Miquel Ferrà i Martorell

- A ghjuria di Sicilia presiduta da Enzo Zappulla (Catania) hà attribuitu dui premii ex aequo à : Corrado Di Pietro è Finetta Guerrera

- A ghjuria di Corsica presiduta da Alanu Di Meglio hà attribuitu un premiu à : Ghjuvan Luigi Moracchini.

A ghjuria di Sardegna ùn hà ancu cumunicatu u risultatu di u so cuncorsu, ma speremu di pudè lu fà cunnosce à a prossima messa à ghjornu.

Benchè incumpletti sti risultati facenu vede chì e ghjurie anu cuncentratu a so primura nantu à a qualità di i testi premiati chì spiccanu da l’altri, elli stessi di qualità. Issa tendenza marca un prugressu di a spressione in prosa, cum’ellu a ci dice Alanu Di Meglio cumentendu i risultati di Corsica.

Ùn avemu micca vulsutu aspettà chì tutti i scritti sianu armunizati è messi in forma infurmatica da publicà li. Ci paria di interessu ch’è vo cunnoschite issa pruduzzione, ancu presentata pers ta volta in modu rozu, cù errori di stampittera è d’urtugrafia chì ùn si ponu schisà quand’ellu si travaglia cù pochi mezi è pocu tempu. Manu à manu ch’è no averemu i testi cumpletti è puliti, veneranu à rimpiazzà questi quì. Intantu speremu ch’è vo piglierete listessu piacè ch'è noi à leghje sta manata di pruduzzione chì sbuccaranu à esse publicate allocc’à a fine di u 2003.

A ghjuria cumposta da :

Di Meglio (MCF IUFM, Prisidenti)

E. Bonerandi (Cunsigliera d’orientazioni à a ritirata)

M. Versini( Prufissora di corsu in Portivechju)

D. Verdoni (MCF Università)

Ghj. Thiers (Prufissori Università)

Ghj.M. Arrighi (Ispittori Accademia, IPR di Corsu)

Ghj.M. Comiti (MCF IUFM)

si hè adunita u 5 di frivaghju in Corti di modu à valutà è primià un insemi di 16 testi ricivuti in u quadru di stu cuncursu (chì si faci di modu simultaneu trà Corsica, Sardegna, Sicilia è Baleari).

Si era dumandatu à principiu di rifletta nantu à a primiazioni di cinqui testi sicondu l’usu spartu duranti di i cuncursi passati. Una volta l’assestu di i scritti fattu in l’ordini di a sinsibulità glubali di a ghjuria, uni pochi d’elementi di valutazioni sò sbuccati :

-        a poca prisenza feminili (una nantu à sedici) ;

-        a prisenza di una generazioni ghjovana chì porghji scritti di qualità ma chì si prisenta di modu putinziali cù carattari di scrittura literaria sia da rifinì sia da maturà ;

-        Un’evuluzioni di u scrittu « etnograficu » chì s’arricchisci d’intaressu è di qualità ma chì ferma accantu à l’attesi di u premiu più indiatu versu una literatura affrancata da una pratica mimuratoghja, cugnitiva o muralista, ma chì porghji è ammaestra un ambiu literariu di finzioni (puri arrimbatu à a mimoria) ;

-        un autori chì si stacca di modu nettu in quantu à un fasciu di qualità di a prosa pruposta è propiu in lea cù l’attesa di a ghjuria (stili, sughjettu, storia, capacità à custruì un universu literariu…). 

Dui elementi sò stati cusì cacciati è ritinuti : quidda di issa sbucciata nova di scritti di qualità ma in duvintà è l’affirmazioni (o a cunferma) di un autori.

Si hè apartu tandu u dibatttitu in giru à u sensu à dà à a noscia primiazioni di modu à metta in risaltu i dui elementi impurtanti ricacciati. A quistioni di fondu hà giratu intornu à u fattu di mischià cinqui premii dendu un sensu glubali d’incuragimentu o d’impuntà, à traversu à un premiu unicu, l’autori chì si stacca di modu à porghja à a vista di tutti « u premiu di a prosa corsa 2003 ».

Fù a siconda a suluzioni scelta dendu priurità à l’emergenza di un testu chì adunisci propiu i qualità ricircati. Ma à tempu si hè prupostu un insemi d’azzioni di modu à valurizà è à prumova a generazioni nova :

-        publicazioni di tutti i testi inediti chì ani cuncorsu pà sta IVa biennali  (Albiana/CCU). U rispunsevuli di a publicazioni pigliarà bocca cù ogni autori in modu à urganizà un’edizioni degna di a qualità di i testi ricevuti. Ogni autori ricevarà 10 esemplari di u libru.

-        participazioni à azzioni di dibattiti è prumuzioni (esempiu : ghjurnata di u 26 di frivaghju « Una ghjuvintù, una literatura » urganizata da l’associu Missaghju) ;

-        pruposta di spazii di creazioni è di valutazioni cù a rivista Bonanova ;

-        apartura di i cullizziò Albiana/CCU à prughjetti di publicazioni…

L’insemi di issi custati è riflessioni hè statu ispostu à a stampa (Corse Matin è RCFM) in u quadru di un appuntamentu privistu ghjustu dopu à i deliberazioni. Par stu pocu, solu RCFM hà resu contu. Poni quissa u prublema di l’intaressu chjappu da i media lucali in generali in quantu à l’azzioni in giru à a literatura in corsu. Ùn solu di pata a mancanza d’analisi si pati ancu quì a trascurata di l’infurmazioni (1)

In cunclusioni, si pò dì chì, al di là di u solu incuragimentu à a scrittura in prosa corsa, a premiata di a Biennali hà fattu quist’annu a scelta di staccà di modu chjaru l’attu di valurizazioni è l’azzioni di prumuzioni è di sviluppu. Segnu d’evuluzioni fattiva di a participazioni è di i scopi di issa premiazioni.

A ghjuria brama di avè u sustegnu è l’appoghju di l’autori è li faci cumplimentu è ringraziu pà u piaceri di a so participazioni fruttifera.

Alanu Di Meglio

(1) Dapoi stu resucontu a stampa hà fattu escia un articulu chì riveni ancu nantu à a manifestazioni di i studianti di l’associu MISSAGHJU è intervista à Ghjuvan Luigi Moracchini.