Cust’annu a paura era in ignalocu. Tutti sapiani chì l’ira di u vechju populu si duvia scatinà sopr’à a cità.

Mesi fà, cinqui pastori erani falati pà venda i so casgi in piazza magna è s’erani azzuffati incù miliziani. Trè funi ammazzati è quidd’altri si ni turretini in i so rifughji impinzalati senza mancu lintà una parolla.

È duranti u vaghjimu, era sparitu nimu…

Quiddi di i muntagni, urgugliosi è vinditteri, ùn erani avvezzi à sminticà un affrontu cumpagnu.

Da tandu, natu in i monti è i vangoni, si sintia un frombu di tamburi è tamburini chì ùn la facia più finita. À a prima u rimori si ni firmaia luntanu è paria tonu.

Ma avali, è fà è fà, più andaghjia, più ingrussaia.

Una timpesta era pà scatinà si.

Ci vulia à rassirinà la ghjenti di u lucali è fà la finita una volta par bè incù i rituali tonti è l’usi salvatichi di i muntagnoli.

U vechju Sribonius Libo, u pracuratori, avia mandatu à chjamà u rinforzu. È avà ch’edda era quì a cuorta, l’ufficiali s’erani aduniti in palazzu publicu.

À discorra c’era u tribunu militaru Sestius Asellius cumandanti di i suldati ghjunti da Mariana, u ligatu è amicu di Libo, Domitius Bassanius.

Asellius era comu trasandatu è parlaia lestru :

- I pudemu stirpà faciuli. À senta à tutti, duman’è sera s’accoglini i muntagnoli, da cilibrà i so dii pazzi. Affacchemu tandu, li piumbemu addossu com’è u falcu annant’à levra.

- È s’eddi s’impostani in i strittoni chì coddani à l’insù ? dissi Bassanius.

Quidd’altru s’incaldamaia è di stizza, strignia u manicu di u gladiu appiccatu à a cinta.

- Chì ah ! ufficiali è citatini di sangui latinu t’avariani calcosa à tema in Corsica ? avemu da avè u sbelu di uni pochi di pasturacci puzzicosi peghju di l’animali ? femu li senta a putenza di Roma è di i so leghji. A stirpera ch’edda firmessi da pruverbiu.

Bassanius li missi una mani annant’à a spadda :

- Cheta, o Sè, a guerra ùn la li pudemu fà. S’è no mittimu u rivoltu in i paciali muntagnoli, a saparè tù dopu ciò chì pò succeda. Apprufitemu di a noscia paci è quiddi di quassù, ebbè lachemu li campà ad usu soiu. Chì ni pensi, o Libo ?

- À dì la franca, sogu com’è suvaru sopr’acqua. Ùn la mi sentu di mova una guerra, ma mi mettini u fretu addossu i raconti ch’eddi facini i paisani.

- Steti à senta, o ghjenti, dissi Bassanius, cuddà in quiddi troncacoddi di notti tempu, mancu à pinsà ci. No, quaninsù ùn semu pratichi. Inveci eddi, ci battini dipò u prima alboriu di u mondu. Sò in casa soia. È in u silenziu di a sala aghjunsi : è ci hè calcosa ch’aspetta è chì vattà quà sù…

A so facia era mutata, comu s’edd’era scritta da u pinseri, dopu à st’ultimi parolli.

S’arrabbieti Sestius :

- Innò, a Corsica hè pruvincia rumana puntu è basta. È i to chjachjari à veghja ùn mi facini paura à mè.

Bassanius ùn la vulia lacà vinta à Sestius :

- S’è ùn ci hè manera di fatti scambià di canzona, andemu ci ghjà di ghjornu quandu a luci binidetta di u soli metti à u ruveddu ogni mali… Saremu sempri à tempu à infattà li in i so casteddi.

Ma Sestius mittia di corru in a ghjerba :

- Innò po, s’è n’attimpemu, a saparè tù ind’eddi sò capaci à scaturì.

Parsi scunvintu u pracuratori. Parlendu è bè, andeti versu u balcò chì fighjulaia i muntagni grisgi.

- Eccu ciò ch’e aghju dicisu : dumani à l’abrucata, una cumpagnia pigliarà capu in sù è faremu piantà issa cumedia prima ch’eddu cunturressi calcosa chì una sciabula ùn lu pò tumbà. Intupparemu uni beddi pochi di i so strigoni è capimuntagnoli. Lacaremu ch’eddi fughjini tutti quidd’altri. Cusì s’appaciarà piaghja è muntagna.

- Semu ad ordini è cumandi, o Pracuratò, dissini insemu Sestius è Bassanius.

Pianament’è bè, u mondu pirdia a so luci è si sculuria tuttu. Si truvoni tandu. U vechju Scribonius Libo era scafiulatu ; l’ultimi spirioni chì si ni muriani si spichjaiani annant’à a so fronti fiera.

Bassanius appaghjaia i labri è stignia i masseddi com’è pà dì ch’edd’era cuntrariu. U ghjovanu Asellius, sticchitu di superbia incù a so curazza lucichenti, lampaia sguardi sprizzenti à drittu è à manca.

I lighjunarii è i miliziani, buliati è sbandati, raghjanaiani ad altu. I so boci ribumbaiani forti è sdiciani, quant’è ad essa in u tempiu di calchì diu stranu o propiu in un locu chì u si saria impussissitu a morti.

U soli chì era pà sprafundà si maculaia di sangui a cità. U rimori di i tamburi ùn piantaia mancu pà mora. U circondu tuttu quantu era intrunatu.

Quandu vensi l’ora di mova si, uni pochi di i suldati si ni firmetini insischiti.

Ma i brioni è i cumandi secchi i fecini piglià sù listessu. Aviani avutu i guai è l’arguai à scunvincia à calchissia da astradà li pà quiddi viotuli viziosi è quiddi troncacoddi voltu i pinzi. Infini chì un ghjovanu pastori di razza rumana li feci da guida.

A cuorta si muvia versu i muntagni maladetti.

In celi, a flaci d’arghjentu di a luna lucicaia da sopr’à i sarri. Parò, à misura ch’eddi cuddaiani, i tamburi, inveci di tacia, crisciani è crisciani. Pichja è ripichja è torra à pichjà in una baldenza trimenti. A prisenza di a cuorta ùn daghjia ombra à nimu. I sunadori faciani contu ch’eddi ùn ci fussini micca. Faciani da maestri eddi.

Avali, ci vulia ad aruchjà da mezu à scogli, petri, chjappi è chjapponi. À i suldati li vinia mal’assà à piglià avanti chì u stradiolu, à quandu si vidia, à quandu li sfughjia. È ci vulia à scumbatta in certi scuponi è machjoni chì v’arrampicaiani è vi sfranfagliaiani incù i so ranfii.

Ghjunsini à quiddu locu chjamatu i Strittoni nieddi, feti contu dui grossi sciappi arritti chì pariani calanchi. Si feci più forti u trambustu. In tondu à eddi, u lumu di i dedi li facia scopra un mondu di fandogna : faii invurpati, castagni è pini lampati da u ventu, sfarcagliamati, cantoni com’è bestii strasurdinarii. Tuttu paria vivu. Macari i zenni è i pini s’erani trapessi pà abadà u viaghju strapiddatu di a cuorta. I suldati viaghjaiani à pedi è dopu à una stonda, à l’ufficiali dinò l’era tocca à lintà i cavaddi. Più andaghjia, più u viotulu astrittia. Presini a dicisioni di lacà l’animali quici incù deci suldati, chì nimu vinissi à furà li.

È codda, è atteppa, è viaghja è smanca u pedi. Dopu à una stonda, a strada ùn ci era più l’arti di sceglia la indocu. Ùn era faciuli à fà avanzà duicentu omini ind’è l’aresti. Tandu, in u bughju, à l’assindotta, cuddò unu stridu chì missu u sbelu à i suldati i più vechji. Vinia da i cavaddi liati quà inghjò. Aviani stridatu i cavaddi, micca sfrimitatu innò, stridatu. Chì ci sarà po statu ?

È chjama è chjama, ma i lighjunarii stati incù l’animali ùn irispundiani. Soli si sintiani quiddi stridi chì vi mittiani u fretu addossu.

À listessu tempu, i cresti di u circondu s’infiaretini. A cuorta era accampata da u spaventu.

In testa di u stolu, u ghjovanu pastori era comu un tontu. Di colpu, presi in manu u so stilu è u s’infilzeti in mezu pettu. Inghjiru à eddu i suldati ùn potini fà nudda è fighjulaiani, sbiancati. Era sdragatu in un pozzu rossu. U so visu era unu smingulu di paura. Natu, era natu quì è i muntagnoli i cunniscia.

U lumu di i dedi vensi pocu è i brioni di i lighjunarii si mischietini incù quiddi di i cavaddi. L’aria si cutrò. A cuorta si ni firmeti susta. Intondu, si sintia un gran’ sciappitumu d’ali com’è ch’edda passessi calchì ciormula sprapusitata.

Ad un trattu, si spensini i lumi. In celi, ùn si vidia mancu più una stedda ; a strada di Roma era sparita, a luna era scappata. A notti s’inghjuttia tuttu.

U bughju inguttupeti u mondu. Ùn c’era più chè i fiari viziosi di i fochi accesi annant’à i cresti : erani rossi è ciaddi è v’abbagliacaiani.

In quà è dà, si vidiani ombri storti chì sbraccitaiani è saltarinaiani. Si piseti un ventu propiu scaturitu da l’abissi infirnali. À i suldati, li paria d’essa in un battellu sciambuttatu da a timpesta à mezu mari.

L’omini mughjaiani ma ùn si sintiani più. Ùn si sintia chè i tamburi. Appruvetini à luttà i lighjunarii di Roma a superbia. Ma comu fà pà aguantà calcosa chì ùn si vedi, calcosa ghjuntu d’altrò. À chì vulia scappà è piglià à l’inghjò, ma ùn la li faciani à mova si. À chì scumbattia à sciabulati in u bughju, minendu u cumpagnu. Certi erani torri tonti aghjà.

In cor’ di u spaventu, solu u vechju Scribonius paria dicisu è sirenu.

In i strittoni nieddi, funi ammazzati tutti,

è i tamburi ribumbaiani sempri…