|
Deus ex machina
Porta SAINT-MICHEL. Mi scappava a
santa pacienza ! È ciò ch'ellu disse quellu
maladettu frate, mi ne battia i stifali.
Facia u passa è veni nantu à u puntellu,
cum'è una sparaventula impazzita à mezu à
una folla spargugliata. Si corre à vita
persa senza mancu avè tempu… à more. L'aspettavamu
! Ma cù i muvimenti suciali chì prumettianu
di durà una bella stundetta, s'imbruttavanu
l'affari. Figuremu ci un pocu chì a brama di
sciaccà mi ne una in bocca mi venia zeppa,
bench'eiu ùn fumessi più. Ma ch'ella sia !
Avia passatu à prò più di trenta minuti à
insaccà a nebbia "…è una
delegazione serà ricevuta in u dopu
meziornu à u Ministeru. I sindicati
dumandanu a creazione di una vintina di
posti per assicurà u mentenimentu di un
serviziu publicu cuerente è praticu per
tutti i viaghjatori. S'elli ùn ottenenu
suddisfazzione, i grevisti allergheranu u
cunflittu à l'altri settori di i trasp…".
Era u dispacciu radiufonicu annunziatu sta
mane da un giurnalista bellu infurmatu. Si
spiegavanu cusì i ritardi arregistrati nantu
à tutte e ligne di a trasversale Nordu-Sud.
Sunava meziornu è u ticchettu verde è giallu
in a mio manu, cumpustatu è digià servutu,
paria esse statu runzicatu da un turlaghjolu
di quelli famiti. Mi era callatu anzurella
per piglià lu in u pulvericciu mentre chì
Rinatulustrascarpi, un poveru disgraziatu mi
allisciulava a fiocca, lusciulone. A so
storia a mi avia conta. Cum'ellu era pussutu
cascà in un locu cusì disumanizatu, luntanu
di a so memoria persa è di ricordi passati,
mi era venuta à core di dumandà li lu. U
truverete anonimu, in sti lochi tristi,
ochjimaliziosu, inturchjulatu solu da u
pisacciu di l'anni, guardendu addinuchjatu,
fughje l'ore pazze. U so angulu di vista ùn
era chè una manera altra di campà un destinu
più…individuale ; ùn eranu di sicuru e
lusinghe di un omu sottumessu. Sò state
tronche e so osse ma u core in un stranu
corricorri balla la cuntradenza… Quelli chì
passavanu accantu à ellu, ùn li lampavanu
chè un'uchjata squisita di disdegnu, troppu
istituziunnalizati ch'elli eranu, per
imbruttà si a cuscenza cù un marginale
scartendu si di e regule stabilite da una
sucetà d'alienazione chì prutege sultantu i
soii. A miseria insiscchisce i sistemi
pulitichi, qualsiasi, ma anzituttu e
sopratraputentissime demucrazie :
- Fate a carità à Pinnatu chì hà credutu di
more è pò chì hè campatu.
È quand'ellu ùn dava di manu à i pedi di a
frattamaglia, calpighjendu u padulosu
chjassu di l'esistenza, a li pruvava cù un
vechju urganettu spasimosu impizzatu à
stracci russicci. Un ughjettu di museu dendu
piuttostu l'aspettu pateticu di un
diavulellu disarticulatu chì, corcia anima
cristiana, sputava i so pulmoni schjetti.
Ùn principiava tantu bè u seculu. Ognunu
circava a so spiritualità. Certi l'avianu
trova in e vitrine di e butteghe
spezializate, venduta fatta è lesta cum'è un
pruduttu di cunsumazione di i più currenti :
Credo in Spiritum, novanta
nove pagine, per duie baiocche ; ingullita
senza mancu troppu muderazione. Era quant'è
manghjà si un figu. Di regula, ciò ch'ellu
ne firmava di sta cerca di benistà, era
accatastatu in l'acqua torbida di i
cacatoghji. Ne cullava ancu a puzza in celu.
Certi atteppavanu alegretti l'alte cime per
interrugà si quassù nantu à e quistioni
esistenziali liate à un cunflittu internu
chì i smezava. Rifalavanu à spessu cù u
miccichile rossu è una bella puntura, per u
listessu prezzu d'altronde, ma cù puchissime
risposte. I benedica vè !
In a cunfusione, una donna di una certa età,
vestuta da dumenica, mughjulava davanti à u
pripostu pusatu daretu à u so finistrinu. A
cliente si ne cacciava cù u funziunariu
scuncertatu, bellu vergugnosu, incapace di
truvà li i rinsignamenti ch'ella bramava. A
soia a rivolta era menu… diceremu…mistica.
Beata.
- Ùn vogliu sapè sì una certa categuria di
persunale hà piantatu u travagliu. S'è vo ùn
avete chè quessa à fà, o zitellò, lasciate u
vostru futtogliu à quelli chì volenu da veru
serve a populazione.
- Zelatore, traditore, avia rispostu
bocchimilosu l'ausiliariu cun divuzione.
Averebbi vulsutu direge si ella versu a
gara, ma ahù, ùn ci hè manera. A situazione
s'ingattivia. In più di u mormu sordu di a
ghjente, sbucchendu à rivoccu à l'entre di i
prufondi è oscuri curridori, a voce aspra è
spirdata di a signurella mi abbambanava… Mì
la pò ! Ghjera un frastornu tamantu è u
fischjulime trizinante di i freni di a rama
chì mi anu scuzzulatu. Spatansciava, mi
sentia parte in una spezia di giracapu
angusciosu, sughjettu ch'eiu era à una
fubbia di u rinclusu. Ma u cumpartimentu
strettu ind'è u quale avia da cullà
diventava per mè un sbalargu tamantu. Da quì
à dui minuti averebbi da raghjunghje a ligna
numeru unu. Fendu mi chjassu, inguantò à
tempu una manechja, u signale annunziendu a
chjusura autumatica di e porte à sculiscia.
U prussimu arrestu ùn lu devia mancà. U
tempu di pusà mi ed eramu ghjunti à
destinazione, Porta NOTRE DAME.
Era falatu. U
locu ùn mi paria pò cusì pupulatu ; à
sente dì à quelli chì ci eranu scalati, ùn
si firmava mai di corre, à diritta o à manca,
à tutta passata. Nunda ! Tuttu calmu ! Sta
piantata mi permettia di sciogle mi l'anche,
chì stu cortu traghjettu mi hà fattu
ghjunghje a picondria. U trinichime
languente è serenu di u vitturone mi cacciò
l'estru. Un distributore di nutizie calde
caldette…è di buttigliucce fresche fresche.
Mi stava impalaficcatu davanti à un
missaghju scrivacciulatu in rossu nantu à
una insegna di publicità, trattendu di un
gruppu d'interessi internaziule. Dicia u
graffiti : ghjè un zitellu senza primura
cullettiva, ghjustu ghjustu un individuvu
!!! Si vedia cresce in ogni capitale,
ecunomiche o culturale, u ricusu di una
duminazione universale, matraversendu e
nuzioni d'identità è d'appartenenza. A
mundializazione sparghjia a so ombra pagna è
si risentianu digià i so effetti da gode
nantu à i menti uccidentali : un
candillucciu stellatu inficcatu cum'ellu ci
vole. Meroiche sulenne. Da liccassi ne u
ditu maiò. Averebbi vulsutu anch'eiu
manifestà a mio sulidarità versu u muvimentu
d'insurezzione, aghjustendu sottu un
vibrante No Passaran. Ùn sò s'ella hè
stata a paura di ritruvà mi manittatu in u
scagnu di pulizza, o s'ellu hè statu u fattu
chì ùn avia nunda per marcà lu, sia cum'ella
sia, mi ne sò fughjitu, l'andatura decisa è
pocu fieru di mè. Ma appressu à tuttu, una
sola paga l'esca dicerebbi a mio vechjuccia.
Cuntinuvò cusì versu a firmata seguente chì
mi purterà direzzione CHARLES DE GAULLE
. U pianu cunsultatu sottu à una lumera
debule mi precisò chì a currispundenza vinti
quattru era bè a fine di tutta sta ligna (aperta
u 18 d'uttobre di u 1973 è dichjarata
ufficialmente di ghjovu publicu d'interessu
lucale). Ùn la crederestede mancu !
Stinzava oramai u passu cum'ella a facia a
fauna virdighjante di quindi. Diventava unu
di quelli, erba ellerata di ceppu. Mi
santavugliava pensendu chì, di fatti, ùn era
ancu eiu chè un pruduttu di u mio imbiente,
accettendu a norma imposta da a forza
guvernativa. Un gustu amaru mi venia in
bocca. Un disgustu ancu. U stumacheghju di
l'altri, di sè stessu è di e fraule.
Festina lente à lenta lenta, chì ùn si
pò ritene u tempu. A via ferrata purtava
vagoni sani sani di esseri altieri ver' di a
fiara criscente di fine di tunellu, ch'elli
scaricavanu cum'è cunquistatori nantu à e
sponde vergine di una terra nova. A parabula
di i cechi. Pecurime di lana turchina. L'illusioni
acciarine, trapanendu u cadaveru fragicu
merzu di u vechju mondu impiccatu à l'arburu
di a cunniscenza, anu fattu nasce prumesse
scimeriche. L'unica verità ? Quella di e
catacombe per i dannati è i mausulei per l'eletti.
Ùn vi si hè pò statu dumandu o Ghjente,
sì u pesu di tantu marmaru vi era legeru ?
U spassighjime in stu dedale nascostu ùn mi
facia tantu prò. Mi seria forse venuta
megliu di tramutà mi in cità, ancu sottu à
un celu misgiugrisgiu di bassa stima. Ma
insù ci era una paralizia generale. Ùn
funziunava più nunda. Ùn vole dì ! Tantu da
quì à pocu... ma eccu ti la ! U furore è u
Trionfu assulutu, tiratu da tanti bianchi
cavalli accuppiati chì u portanu in maestà.
U lume di a vittura abbagliulava i
viaghjatori chì avianu da inghjuttisce si
nentru. In u mentre, immubilizata, avia da
assiste à l'attu unu di ste raprisentazioni
ghjucate tante è tante volte. S'aprianu
tandu e porte di u cumpartimentu. Si
sparghjia cusì a Civilizazione. Quella di l'Omu.
Eramu salvi. U ruminzulaghju rendia u feiu.
In a giaretta, ùn ci firmava mancu l'aria.
L'imbusche ùn sò più in u saccu. Hè scozzulu,
canta a botte. Mi arricurdava chì, piatta in
u fondu sottu à u malannu di pessima
rinomina è u viziu chì cunniscia propiu bè e
so faccindacce, a so luce ùn si era mai
spinta. Oghje ne hà una bella techja di
ingannà uni pochi di poveri tippi chì a
scunghjuravanu.
- Mi rumpite e stacche tutti
quant'è vo site !
Iè ! Quand'ellu ùn si pò dà altru, si dà
sperenza. A Sperenza. Una puchjuculaccia
perversa chì stuzzica u purcellame nanzu di
insanguinà lu. Da dumandà si s'è ognunu
porta l'uchjali, lesti à rinuncià à
stringhje u pugnu. Vigliacchina ? Debulezza
? Forse di sì, forse di nò ! Si difende omu
cum'ellu si pò. È a misura dui di a sinfunia
cù una partizzione da compie : un caccia è
metti cuntinuvu, à chì colla è à chì fala….
Era partuta a rama senza mè. D'un colpu,
spazzendu u locu diventatu silenziosu, mi
rendia contu ch'o firmava solu nantu à a
scalata. Ùn ci era più un fiatu. Mancu più
troppu bisognu di corre appressu à tuttu.
Era cundannatu eiu à persegue a
deambulazione in u labirintu di a mio vita.
I spezialisti mi davanu pocu tempu. L'ultime
nutizie ùn pudianu prulungà sta cumediola.
Ne vulia sorte una volta per sempre di
st'universu tramezatu. Ci serà forse un
suppulellu di culore à l'insù, una spera di
sole ; è u so lume à l'imbrunì mi purtava
versu u terminus di stu viaghju, bellu
cuntunque. Cundiscende di malavoglia.
Aghju decisu per oghje di ùn andà à
scimignulì mi cù uni pochi di capatoghji
inderni. Mi vogliu pò leghje stu
ghjurnalacciu ch'o tengu in manu dipoi nanzu.
Pigliu e scale versu u fora. Un ventulellu
mi pesa annantu à e so ale, accarezzendu mi
u visu. Lasciu l'ultimu metro è Terra
Nova daretu à mè. Volu cum'è un omu
liberatu. Ùn vegu più chè u mumentu induve
mi lasciaraghju cascà attavulinatu in
terrazza di un caffè nantu à U Vechju
Portu, davanti à un'acqua acitosa (orezzinca
fate u piacè) sciuppittente. À a salute…
|
