Sò - (L’animali corsi sò spiritosi)

(L’animali corsi sò spiritosi)


 

Sò u ghjallu cantatore 

U re di u pulinaghju

Eiu mi svegliu à l’albore

Ma rilloggiu ùn ne aghju

cuccurucu in clamore

 Subbitu à lu primu raghju      


Sò una sgualtra cabretta       

Chì corre per issi pasciali

Ùn mi piace d’esse stretta  

 Mancu appena in i stazzali

U mo nome hè Bianchetta

O Seguin sò corsa avali

                                                                                                                     Sò una rossa ghjallina                

Bizzichendu è raganendu

Facciu l’ove ogni matina

 I vi dò ùn i vi vendu

 Nascenu à la statina                                

Piuli gialli chjuchjulendu    

 

Sò cursinu valorosu

Curu pecure è muntoni

U m’aiutu hè preziosu

 Addestru i pagaglioni

Eiu sì sò curagiosu

Facciu più chè i patroni

 

Sò cignale solitariu              

Vistigatu da l’umani

Un machjone salutariu

È i fratelli guardiani

Nentru lu mo santuariu

 Mi ne ridu di i cani


 

 

 

Sò a volpe maliziosa

Chì ne face è pò ne face

Cù me nimu ùn si riposa

Arrubu ùn lasciu pace

Di burlà sò venturosa

Mostru di chè sò capace


Eiu sumerucciu corsu

Portu à zozzu i zitelli 

Ùn mi si mette lu morsu

Sò dolce cume l’agnelli

È nant’à lu mo parcorsu

Femu ride i spurtelli 


Sò a vacca nutritora

Ma mancate di rispettu

A rombu di tirà fora

Si ne falla u mo pettu

Sta mattina di bon’ora

Camprà vogliu un tenipettu


Sò un porcu grassu è tondu

Ùn facciu micca regime 

 M’allantonu di u mondu

Per campà sù l’alte cime 

Cume riposu prufondu 

 Un bel lettu di cuncime 

 

Sò cavallu muntagnolu

Mi n’impippu di e cità

Mi chjamanu machjaghjolu

Campu incù tranquillità

D’induv’ellu nasce Golu

A chi ùn hà core ùn ci stà

                                                    

Sò u ghjattu frisgiulatu

I topi sò i m’amichi

Un sò mai affammatu

Cume i ghjatti antichi

Da la ghjente aduttatu

Ma l’onori sò castichi.

           Cathy Campana