Santa Riparata di Bonifaziu

Ùn ci vole à marchjà tantu da scopre issu edifiziu stupendu chì ùn hà ancu cappiatu tutti i so secreti...

Saria di l’IXu seculu, vene à dì prima chì a cità di Bonifaziu fussi stata edificata. Parechje ipotesi parlanu di a so funzione di pettu à i pastori è i cultivatori di issi lochi. Hè stata ristaurata tale è quale cumu nanzu, in u 1983. Ma hè firmata sola è senza pussibilità d’accessu.

« À l’incuntrariu di ciò chì si puderia pensà, a pulicrumia di e petre d’origine ùn era micca pè un scopu esteticu ma imposta da u fattu chì issa cappella era stata fatta à u limite trà calcare è granitu, à tal puntu chì l’operai, racugliendu e petre chì li ci vulianu, è chì –segnu d’arcaisimu- ùn sò tagliate chè pocu pocu, l’anu chjappe à quandu bianche à quandu russicce in granitu.

Santa Reparata quale era?

A legenda dice chì issa giovana si ne scappò a sera stessa di u matrimoniu ch’ella era stata furzata à fà. Vulendu stà vergine, stà anonima è dà si sana à u Signore, circò un agrottu in un munasteru... d’omi vestendu si cun panni d’omu !

Piuttostu chè di palisà u so secretu, si lacò accusà d’un ingannu ch’ella ùn pudia mancu à pena avè fattu, è fù arrestata è po tumbata. A verità ùn si scuprì chè dopu à a so morta è, in segnu di riparazione, li si dete u nome di “Riparata”.

In Corsica hè dinù chjamata Liberata (liberata di qualsiasi suspettu) »

Tracciatu GPS