Ferma ti

sopra u passu mortu di u ghjornu.

Ùn senti e voci

ghjà prighjunere di u bughju ?

Stà à sente a luna serena

cum’è un spiritu di a luce piena.

Da a valle di u ventu un trattu si pesa

ch’invita l’ombre à ghjucà.

U sonnu mi tenta

in ore dimenticate

i to ochji mi leganu

à un lettu di petre brusgiate.

Riaffacata in un ricordu

ti vecu senza pudè ti tuccà

cum’è sta luce chì fala fredda

accarizzendu l’arburi è u mare.