Date mi l’accunsentu di u pientu

chì troppu aspessu avà m’assalta,

quandu a vita ùn hà più sensu

è più baldanza l’alegria.

Fronde chì fate musica u ventu,

date mi u secretu d’armunia,

quandu u core brama cunfortu

abbattutu da a malincunia.

Site ninni nanna di notte di luna,

di speranza ricca lu cunsolu,

luce di stelle cun pena nisuna.

Sincera site una cadenza solu

di voce vostre racolte tutte in una,

canzona chì suave hè u so volu.