Fiancu à fiancu

Vene da più luntanu chè a luna

u silenziu chì fala da u celu

in a notte serena senza fine

nantu à e strade, sopr’à e case.

È ci achjappa chjinati fiancu à fiancu

è ci pare d’andà, chì ghjè un incantu,

propiu à mezu à u mare di u tempu

chì passa è trascorre

cum’è a speranza

u dolore è a vita

ch’è no gudimu inseme.

Intantu ci lascia

a pace di iss’ora

ch’o ti basgiu è tù poni la to manu

fresca nantu à u core.

Giovanni Maria CHERCHI