U chjassu

À Esther

In una stagione digià bella passata

di e nostre esistenze

-tù l’iniziave solu-,

ti dissi ch’elle ùn ci eranu vie.

Chì in davanti avie

a selva inscrutevule...

Tandu ùn pudie capì mi.

Principiavi una partita à scacchi.

Eo venia da l’anni torbidi

chì mi purtonu

una visione rotta di u mondu,

puru sì vitalista malgradu tuttu.

Ùn dubità ch’o vulissi per tè

una vita serena è piena.

Ghjè a megliu brama d’un babbu.

Ma temendu ch’un ghjornu

ti truvessi, in qualchì manera, avvolta

da bughju è lupi è ruvine,

m’affannai à averte ti.

Ùn ci sò strade prestabilite

per quelli chì cercanu a verità.

Ai francatu u sogliu, l’invisibile

linea d’ombra persunale.

Figura ti, da avà,

ch’è tù manuvri una nave

à mezu mare. Puderai,

in a timpesta, guidà ti cù i signali

luminosi è i simbuli astrali.

Ma nimu puderà purtà per tè

u to propriu viaghju.

Eppuru, ùn perdi a fede.

Ogni cosa ch’esiste sottu à e stelle

tene ghjustificatu u so destinu.

Scioglie lu pò occupà a vita.

Cuntempla dunque u mondu incù misura.

Tuttu u bè ch’è tù suminerai senza sperà nunda

ti serà resu cù sudisfazzione suprema.

Ùn ci hè altru chjassu

chè quellu chì suprana l’ostaculi.