L’apparenza

statica saluta l’eccessi

L’apparenza statica saluta l’eccessi

Parlu di lampà ci à a prima finestra

da zitelli di mani oziose valutendu a to pelle,

è rompe ci, à bocca aperta, un labru.

Vogliu dì ùn sperà nunda è quantunque

buscà si una uppurtunità, in ogni manera.

Parlu d’ùn fà la per tè, di pedi chì

si sò imparati à ballà per mantene

l’equilibriu, è d’una certa memoria

trà i scordi di l’usi.

Davanti à u spuntaneu canibalisimu di i to

ochji, parlu, liberu di neutralità. Di mai

finì. Di qualchì presagiu. Ùn seguiteremu u rosariu

di mocculi di u fussaiu.

Cità diserta, lumi lasciati,

a statica apparenza hè sempre stata

u sutterfugiu di i terramoti.

Tendendu l’istintu pè u frusciu di a calma

manghjeremu paisaghji

cù e dite.